41433 اسكەري ءبولىمىنىڭ ساربازدارى امال مەرەكەسىن جىل سايىن اتاپ وتەدى. جاۋىنگەرلەر باۋىرساق ءپىسىرىپ, اقتان ءدام تاتىپ, ءتوس قاعىستىرىپ ءبىر ارقا-جارقا بولادى. كەيىن اسكەريلەردەن قۇرالعان ارتىستەر كورىسۋ كۇنى, مادەنيەت جانە ۇلتتىق سالت-ءداستۇر كۇنى جانە ۇلتتىق كيىم كۇنى دەپ مەرەكەنىڭ كورىگىن قىزدىرا تۇسەدى.
– 14 ناۋرىز ەجەلدەن قازاقتار اراسىندا جاڭا جىلدىڭ باسى بولىپ سانالدى. بۇرىن كورىسۋ كۇنى تەك باتىستا عانا تويلاناتىن, ال قازىر ول بارشا ەلىمىزگە تانىمال بولىپ كەلەدى. بۇل – قۋانارلىق جايت. ءبىز ءوز داستۇرلەرىمىز بەن ادەت-عۇرىپتارىمىزدى ساقتاپ, ۇرپاققا وسىنى ۇيرەتۋىمىز كەرەك. جان-جاقتان شاقىرىلعان ساربازدار امالدىڭ تاريحىن قىزىعۋشىلىقپەن تىڭدادى. كوپشىلىگى مۇنى العاش تويلاپ وتىرعانىن ايتتى. ناۋرىز – تەك تۇرعىنداردى ەمەس, اسكەري قىزمەتشىلەردى دە جاقىنداستىرادى. ويتكەنى اسكەري ۇجىمداعى مادەني-رۋحاني ءىس-شارالار دوستىق بايلانىستى ودان ءارى نىعايتا تۇسەدى, – دەدى 41433 اسكەري ءبولىم كومانديرىنىڭ ورىنباسارى, پودپولكوۆنيك مەيرام قاپپاسوۆ.
سونداي-اق ۇلىستىڭ ۇلى كۇنى اياسىندا اسكەريلەر «جان ەركەماي-اتىراۋ» قوعامدىق قورىنىڭ ەرەكشە قاجەتتىلىكتەرى بار بالالارعا ارنالعان ورتالىعىنا باردى. بالالارعا مەرەكەلىك كوڭىل كۇي سىيلاپ, تاتتىلەر مەن سىيلىقتار ۇلەستىردى. قوعامدىق قوردىڭ باسشىسى ءاليا قۇباەۆا: «سىزدەر ءبىزدىڭ, وتانىمىزدىڭ قورعاۋشىلارىسىزدار. كەستەنىڭ تىعىزدىعىنا قاراماستان, ءبىزدى قولداۋعا ۋاقىت تاپقاندارىڭىزعا, جاس تاربيەلەنۋشىلەرىمىزبەن جاقسىلىق, جىلۋلىقپەن بولىسكەندەرىڭىزگە, ولارعا جاعىمدى ەموتسيالار سىيلاعاندارىڭىزعا مىڭ العىس», دەپ يگى تىلەگىن جەتكىزدى.
ءوز كەزەگىندە اسكەري قىزمەتشىلەردىڭ وتباسى مۇشەلەرىمەن جۇمىستى ۇيىمداستىرۋ قىزمەتىنىڭ باسشىسى داريا شوكەنوۆا اتىراۋ گارنيزونىنىڭ جەكە قۇرامى بالالار مەن قارتتار ۇيىنە, وڭالتۋ ورتالىقتارىنا ۇنەمى بارىپ تۇراتىنىن ايتتى.
– باۋىرمالدىق, بىرلىك – بەرەكە باستاۋى. اتا-بابالارىمىز باعزىدان رۋحاني قۇندىلىقتاردى جوعارى باعالاعان. مۇنى «بىرلىك بولماي – تىرلىك بولماس» دەگەن ماقال-ماتەل, اڭىز-اڭگىمەمەن كەيىنگىلەرگە جەتكىزىپ كەلەدى. ءبىز دە قانمەن سىڭگەن ادەتپەن ەرەكشە بالالارعا ارنالعان الەۋمەتتىك ورتالىققا باردىق. جاس جاۋىنگەرلەر قازاقتىڭ حاندارى مەن باتىرلارىن سومداپ, بالالار مەرەكەنى جاقسى سەزىندى, – دەدى ول.
