باسقوسۋدا پوليتسيا ۆەدومستۆوسىنىڭ وكىلدەرى پوليتسەيلەردىڭ كۇندەلىكتى قىزمەتىندە, قاۋىپسىزدىكتى قامتاماسىز ەتۋدە, قۇقىقبۇزۋشىلىقتىڭ الدىن الۋدا جانە قىلمىسقا قارسى كۇرەستە قولداناتىن زاماناۋي تەحنولوگيالارعا كەڭىنەن توقتالدى. ىشكى ىستەر ءمينيسترى ەرجان سادەنوۆ قۇقىق قورعاۋ سالاسىندا زاماناۋي تەحنولوگيالاردى كەڭىنەن قولدانۋ مەملەكەت باسشىسىنىڭ جۇكتەگەن مىندەتتەرىنىڭ ءبىرى ەكەنىن اتاپ ءوتتى.
«قازىر بىزدە سالانى بيۋروكراتيادان ارىلتۋ جانە وڭتايلاندىرۋ ۇدەرىسى بەلسەندى جۇرگىزىلىپ جاتىر. پوليتسيا قىزمەتكەرلەرىنىڭ باستى نازارى قۇقىقبۇزۋشىلىقتار مەن قىلمىستاردىڭ الدىن الۋعا, وزدەرىنىڭ نەگىزگى مىندەتتەرىن ورىنداۋعا باعىتتالعان. تسيفرلىق شەشىمدەر ازاماتتاردىڭ قاۋىپسىزدىگىن قامتاماسىز ەتۋ كەزىندە ءتارتىپ ساقشىلارى جۇمىسىنىڭ تيىمدىلىگىن ارتتىرۋعا عانا ەمەس, سونداي-اق ىقتيمال قۇقىق بۇزۋشىلاردى تارتىپكە كەلتىرۋگە دە كومەكتەسەدى», دەدى ءىىم باسشىسى. قوعامدىق قاۋىپسىزدىكتى قامتاماسىز ەتۋ ماقساتىندا مينيسترلىك جاپپاي بەينەباقىلاۋ جوباسىن ىسكە اسىرىپ جاتىر. قازىرگى تاڭدا ەلىمىزدە 1 ملن 318 مىڭ بەينەكامەرا جۇمىس ىستەيدى. ونىڭ ىشىندە پوليتسيانىڭ جەدەل باسقارۋ ورتالىقتارى مەن كەزەكشى بولىمدەرىنە 274 مىڭ كامەرا قوسىلعان.
جىل باسىنان بەرى كامەرالاردىڭ كومەگىمەن 96 مىڭعا جۋىق اكىمشىلىك قۇقىقبۇزۋشىلىق تىركەلىپتى. 1,5 مىڭ قىلمىس اشىلىپ, 870 مىڭ جول ءجۇرۋ ەرەجەلەرى بۇزۋ دەرەگى انىقتالعان. جينالعاندارعا ازاماتتاردىڭ قاۋىپسىزدىگىن قامتاماسىز ەتۋ جانە قۇقىقتىق ءتارتىپتى قورعاۋ بويىنشا جاساندى ينتەللەكتىنى پايدالانۋ مۇمكىندىكتەرى كورسەتىلدى. قاج مەكەمەلەرى مەن قىزمەتتىك ءۇي-جايلارداعى ۇزدىكسىز بەينەباقىلاۋ, سمارتجەتوندار, دابىل باتىرمالارى, حابارلامالاردى قابىلداۋدىڭ كوپارنالى جۇيەسى جانە جول ءجۇرىسى قاعيدالارىن بۇزۋشىلاردى انىقتاۋعا كومەكتەسەتىن «قورعاۋ» جۇيەسى تانىستىرىلدى.
ينتەرنەتتەگى الاياقتىققا قارسى ءىس-قيمىل جونىندەگى «CyberPol» جوباسى دا ءسوز بولدى. پوليتسيا بايلانىس وپەراتورلارىمەن بىرلەسىپ, اۋىسپالى نومىرلەردەن جاسالاتىن قوڭىراۋلارعا تەحنيكالىق توسقاۋىل قويىپتى. سونىڭ ارقاسىندا 44 ملن-نان استام قوڭىراۋ بۇعاتتالعان. بۇل ءوز كەزەگىندە زارداپ شەككەندەردىڭ سانىن 2,5 ەسەگە قىسقارتۋعا مۇمكىندىك بەردى. بۇعان قوسا ەلدەن تىس جەرگە شىعارىلعالى جاتقان شامامەن 246 ملن تەڭگە دەر كەزىندە انىقتالعان.
سونداي-اق قىلمىستىق ۇدەرىستى جانە پوليتسيانىڭ حالىققا كورسەتەتىن مەملەكەتتىك قىزمەتتەرىن تسيفرلاندىرۋ ماسەلەسى قارالدى. وسىلايشا, فورۋم زاماناۋي اقپاراتتىق تەحنولوگيالار سالاسىنداعى ءىرى ديالوگ الاڭىنا اينالدى. ءىس-شاراعا قاتىسۋشىلار ءوز ۇسىنىستارىن ايتىپ, پىكىرلەرىمەن ءبولىسىپ, وزدەرىن تولعاندىرعان ساۋالدارىن جولدادى.
