ءىس-شارانىڭ اشىلۋ سالتاناتىنا قورعانىس مينيسترلىگى تاربيە جانە يدەولوگيالىق جۇمىستار دەپارتامەنتىنىڭ باستىعى, ادىلەت پولكوۆنيگى تىلەۋحان باسقوجاەۆ, تۇركيانىڭ قازاقستانداعى ەلشىسى مۇستافا كاپۋدجى پارلامەنت دەپۋتاتتارى جانە زيالى قاۋىم وكىلدەرى قاتىستى.
ادىلەت پولكوۆنيگى تىلەۋحان باسقوجاەۆ شاناققالا شايقاسىنداعى جەڭىس تۇرىك حالقىن بىرىكتىرىپ, ولاردىڭ بويىنا بولاشاققا دەگەن سەنىم ۇيالاتقانىن اتاپ ءوتتى.
«109 جىل بۇرىن تۇركيا ءوز تاريحىنداعى ەڭ اۋقىمدى ءارى قاندى شايقاستاردىڭ بىرىندە تاريحي جەڭىسكە جەتتى. بۇل ورايدا وداقتاستاردىڭ اسكەرىن ويسىراتا جەڭگەن ۇلى قولباسشى, ءداۋىردىڭ كوشباسشىسى مۇستافا كەمال اتاتۇرىكتىڭ ءرولىن اتاپ وتكىم كەلەدى. بۇگىنگى فوتوكورمە – تۇرىك جاۋىنگەرلەرىنىڭ جەڭىلمەيتىن رۋحىن, ەرلىگى مەن قاھارماندىعىن بەينەلەيتىن كورنەكى تاريحي قۇرال. بۇل ءىس-شارا ەكى ەل اراسىنداعى مادەني-تاريحي بايلانىستاردى نىعايتۋعا ىقپال ەتەتىنىنە سەنىمدىمىن», دەدى ول.
ءوز كەزەگىندە توتەنشە جانە وكىلەتتى ەلشى مۇستافا كاپۋدجى كورمەنى ۇيىمداستىرۋعا كومەك كورسەتكەن قورعانىس مينيسترلىگىنە جانە قازاقستان قارۋلى كۇشتەرىنىڭ مەملەكەتتىك تاريحي-اسكەري مۇراجايىنا العىسىن ءبىلدىردى. سونداي-اق كورمەنىڭ وتۋىنە مۇرىندىق بولعان يۋنۋس ەمرە ينستيتۋتى مەن ترت ارناسىنا دا ريزاشىلىعىن جەتكىزدى.
«1915 جىلدىڭ 18 ناۋرىزى – تۇرىك ەرلىگى تاريحىنداعى ەڭ قۇرمەتتى دە جارقىن بەتتەردىڭ ءبىرى. بۇل جەڭىس تۇرىك ۇلتىنىڭ بولمىس جولىنداعى كۇرەسىنىڭ بەلگىسى, باتىلدىق, قايسارلىق جانە وتانعا دەگەن سۇيىسپەنشىلىككە تولى رۋحتىڭ شىنايى كورىنىسى.تۇرىك حالقى شاناققالاداعى قايتالانباس كۇرەستىڭ ارقاسىندا بارشا جاپا جەككەندەرگە ءۇمىت بولىپ, ال كوپتەگەن وتار ەلدەر شاناققالادان كەيىنىرەك ءبىزدىڭ ازاتتىق سوعىسىمىزدان العان شابىتپەن ءوز كۇرەستەرىن باستادى. وسى تۇرعىدان العاندا شاناققالا جەڭىسى – تۇرىك حالقىنىڭ ەمەس, بالقاننان افريكاعا, ەۋروپادان ازياعا دەيىنگى 100 ميلليونداعان باۋىرلارىمىزدىڭ ورتاق جەڭىسى», دەدى.
سونداي-اق ول كورمەگە قويىلعان فوتوسۋرەتتەر ۇلى جەڭىسكە جەتۋ جولىنداعى وقيعالاردى ەسكە تۇسىرۋمەن قاتار, باتىرلىق داستانىن كەلەشەك ۇرپاققا جەتكىزۋگە كومەگىن تيگىزەتىنىن تىلگە تيەك ەتتى. تۇركيا مەن قازاقستان اراسىنداعى دوستىق جانە باۋىرلاستىق بايلانىستار وسىنداي شارا ارقىلى كورىنىس بەرىپ, تامىرىن تەرەڭدەتە تۇسەتىنىن ايتا كەلىپ: «باۋىرلاس قازاق حالقىنىڭ شاناققالا جەڭىسىنىڭ ماڭىزدىلىعىن ءتۇسىنۋى جانە بۇل جەڭىستىڭ تۇرىك ۇلتى ءۇشىن قانشالىقتى قۇندى ەكەنىن باعالاۋى ءبىز ءۇشىن ۇلكەن قۋانىش», دەدى.
ءماجىلىس دەپۋتاتى ابزال قۇسپاننىڭ ايتۋىنشا, كەزىندە بۇل سوعىستى بۇكىل الەم باقىلاپ وتىردى. سول كەزەڭدە بارلىعى تۇرىكتەر انتانتا ەلدەرىن جەڭە المايدى دەپ ويلاعان. بىراق تۇرىك جاۋىنگەرلەرىنىڭ مىزعىماس رۋحى تۇرىك حالقىنىڭ تاريحىندا عانا ەمەس, الەمدىك تاريحتا دا «التىن ارىپتەرمەن» جازىلۋعا الىپ كەلدى.
تۇرىك مادەنيەت ورتالىعى ديرەكتورىنىڭ مىندەتىن اتقارۋشى الماگۇل يسينا: «كورمەگە قاتىسقان جاستار جەڭىس تۋىنىڭ قانداي جولمەن كەلەتىنىن ءتۇسىنىپ جاتىر. مىسالى, بۇل جولدا تۇرىك حالقى مىڭداعان زيالى قاۋىمىنان ايىرىلدى. وسى مايداندا انادولى مەن ىستامبۇلدان اعىلعان 400 مىڭعا جۋىق ەرىكتى اسكەردىڭ 250 مىڭى تاۋەلسىزدىك جولىندا جاندارىن پيدا ەتتى. شاناققالا جەڭىسىنەن كەيىن ۇلت-ازاتتىق كۇرەس جالعاسىپ, 1923 جىلى 29 قازاندا مۇستافا كەمال اتاتۇرىك باسشىلىعىمەن تۇركيا رەسپۋبليكاسى قۇرىلدى. وسى تۇرعىدان العاندا شاناققالا جەڭىسىنىڭ ۇلت ىرگەتاسىنىڭ قالاۋداعى ءرولى وراسان. تۇرىك حالقىنىڭ ۇلت-ازاتتىق كۇرەس جولىنداعى تاريحىمەن تانىسقىسى كەلەتىندەر بولسا, كورمەگە قويىلعان فوتوسۋرەتتەردى 20 ناۋرىزعا دەيىن تاماشالاي الادى», دەيدى.
سالتاناتتى ءىس-شارادا قازاقستان قارۋلى كۇشتەرى ۇلتتىق اسكەري-پاتريوتتىق ورتالىعىنىڭ ورتالىق اسكەري وركەسترى «امانگەلدى يمانوۆ» مارشىن ورىندادى. ال «بەلەس» توبى «شاناققالا ءانى» مەن شايقاسقا قاتىسقان كوكورىم جاستارعا ارنالعان «15 جاسار بوزبالا» شىعارمالارىن حالىق نازارىنا ۇسىندى.
