فوتو: ixbt.com
پوليتسيا «سەرگەك» باقىلاۋ كامەرالارى, ازىرگە, كولىكتىڭ سارى تۇسىنەن ءوتۋ فاكتىلەرىن تىركەمەيتىنىن ايتتى. الايدا جول-پاترۋلدىك پوليتسياسى مۇنداي ارەكەتتى بايقاسا, ايىپپۇل سالۋعا قۇقىلى. الداعى ۋاقىتتا باعدارشامنىڭ سارى تۇسىنەن ءوتۋ جاعدايلارىن تىركەيتىن پيلوتتىق جوبا ەنگىزىلۋى مۇمكىن.
«قازاقستان رەسپۋبليكاسى جول قوزعالىسى ەرەجەسىنىڭ 5-تاراۋى 24-تارماعى 3) تارماقشاسىنا سايكەس باعدارشامنىڭ سارى ءتۇسى جانعاندا قوزعالىسقا تىيىم سالاتىنىن ەستەرىڭىزگە سالامىز. سوندىقتان بۇل قۇقىق بۇزۋشىلىق پوليتسەيلەردىڭ نازارىنا ىلىكسە, جۇرگىزۋشى باعدارشامنىڭ تىيىم سالاتىن تۇسىنە وتكەنى ءۇشىن جاۋاپكەرشىلىككە تارتىلۋى مۇمكىن», دەدى الماتى پوليتسيا دەپارتامەنتىنىڭ ءباسپاسوز قىزمەتى.
قازىرگى ۋاقىتتا «سەرگەك» باقىلاۋ كامەرالارى مىناداي زاڭبۇزۋشىلىقتاردى تىركەۋگە قاۋقارلى:
- جىلدامدىقتى اسىرۋ;
- تۇتاس سىزىقتى كەسىپ ءوتۋ;
- قوسارلانعان تۇتاس سىزىقتى كەسىپ, كەرى اينالۋ;
- بەلگىلەنبەگەن جەردە تۇرۋ/توقتاۋ;
- باعدارشامنىڭ تىيىم سالىنعان تۇسىنە ءوتۋ.
الماتى قالالىق دەپارتامەنتى پيلوتتىق جوبا نەگىزىندە قاۋىپسىزدىك بەلدىكتەرىن تاقپاۋ جانە جاياۋ جۇرگىنشىلەر وتكەلىندە جاياۋ جۇرگىنشىلەردى وتكىزبەۋ دەرەكتەرىن «سەرگەك» باقىلاۋ كامەرالارى تىركەپ, ايىپپۇل جازىلاتىنىن ەسكە سالدى.
