مەرەكە اياسىندا كەزىندە شارۋاشىلىقتىڭ ىرگەسىن قالاسقان اۋىلدىڭ قادىرلى اقساقالدارىنا سىي-قۇرمەت كورسەتىلىپ, توردەن ورىن بەرىلدى. سەرىكتەستىك باسشىسى ەركىن بۇقانوۆ ەلگە, ەڭبەك ارداگەرلەرىنە ىزگى لەبىزىن ارناپ, ون شاقتى زەينەتكەرگە مەڭدىقارا شيپاجايىنا تەگىن جولداما تابىس ەتتى.
اسىل تۇقىمدى مال شارۋاشىلىعىمەن قاتار, ەليتالى بيداي تۇقىمىن وسىرۋمەن داڭقى شىققان ءىرى شارۋاشىلىق ناۋرىز مەرەكەسى قارساڭىندا اۋىل مەكتەبىنىڭ كومپيۋتەرلىك سىنىبى مەن بالاباقشاداعى ويىن بولمەسىن جاڭارتىپ بەرىپ وتىر. اۋىلدىڭ الەۋمەتتىك ينفراقۇرىلىمىنىڭ دامۋىنا جىل سايىن قارجى قۇيىپ وتىرعان «قارقىن» اگروفيرماسىن جىل بويى قايىرىمدىلىقپەن اينالىسادى دەسەك, قاتەلەسپەيمىز. ماسەلەن, قازاق-ورىس سىنىبى ارالاس اۋىل مەكتەبىندە بۇگىندە 180-گە جۋىق بالا وقىپ جاتىر.
– قازىر وقۋشىلاردىڭ مەكتەپتە ىشەتىن ىستىق تاماعىنا دەيىن سەرىكتەستىك قارجى ءبولىپ وتىر. تاياۋدا ەركىن سايران ۇلى مەكتەپ وقۋشىلارىنا 1,5 ملن تەڭگەگە IT-كابينەت سىيلادى. بۇل سىنىپتا 11 كومپيۋتەر, 1 نوۋتبۋك, پرينتەر بار. كابينەت تولىقتاي ۆەب-كامەرا مەن ينتەرنەتپەن قامتىلعان. سەرىكتەستىك ءوز قارجىسىنا جىل سايىن مەكتەپتى جوندەۋدەن وتكىزىپ وتىرادى. سپورت زالىمىزدىڭ توبەسىن جوندەپ, بۇكىل ەسىكتەردى جاڭارتىپ بەردى. قىسقى ماۋسىمدا مەكتەپ عيماراتىن جىلىتاتىن وتىن ءتۇسىرىپ بەرەدى. بۇگىن, مىنە, كورىسۋ كۇنىنە وراي كوپبالالى وتباسىندا تاربيەلەنىپ جاتقان 20 شاقتى بالاعا مەرەكەلىك بازارلىق ۇلەستىرىپ بەردى. مەكتەپتە بالالاردى قازاقتىڭ ءداستۇرلى مادەنيەتى مەن ۇلتتىق مۋزىكاسىنا تاربيەلەيتىن «جەتىگەن» سىنىبى جۇمىس ىستەيدى. بۇل دا – وسى «قارقىن» سەرىكتەستىگىنىڭ باسشىسى ەركىن سايران ۇلىنىڭ قارجىلاي قولداۋىمەن قولعا الىنىپ وتىرعان جوبا, – دەيدى مەكتەپ ديرەكتورى جاندوس كەڭەسباەۆ.
اۋىلدىڭ بالاباقشاسى مەن مادەنيەت ءۇيى دە – سەرىكتەستىكتىڭ مەنشىگىندە. ءىشى-سىرتى كەلىسكەن, الىستان كوز تارتىپ, اۋىلدىڭ اجارىن اشىپ تۇرعان بۇل ەكى عيمارات تا بۇگىندە ەل يگىلىگىنە قىزمەت ەتىپ جاتىر. اۋىل بالاباقشاسىندا ەكى توپ بار. ءبىرىنشىسى بالالارعا قازاق تىلىندە, ەكىنشىسى ورىس تىلىندە تاربيە بەرەدى. سابيلەردىڭ بارلىعى تەگىن تاماقتانادى. بالاباقشاعا كەرەكتى توسەك-ورىن, توسەنىش, ىدىس اياق, وقۋ-تاربيە, ويىن قۇرالدارىنىڭ ءبارىن اگروفيرما تاۋىپ بەرىپ وتىر.
– «قارقىندا» شيرەك عاسىرعا جۋىق ەڭبەك ەتتىم. قازىر زەينەتكەرمىن, قوستانايدا تۇرامىن. ەركىن بالامىز ناۋرىز مەرەكەسىنە وراي, ارنايى كولىك جىبەرتىپ, جاستارعا باتا بەرىڭىز دەگەن سوڭ, ارنايى كەلىپ وتىرمىن. كەزىندە وسى اۋىلدىڭ ءبىر كىرپىشىن قۇلاتپاي امان ساقتاپ قالعان سايران بالكەن ۇلىمەن بىرگە جۇمىس ىستەدىك. وتپەلى كەزەڭنىڭ ىستىق-سۋىعىنا توزدىك. حالقىمىز «اكە كورگەن وق جونار» دەگەن ماتەلدى بەكەر ايتپاعان, مەن بۇگىن ەركىنگە وتە ريزامىن. «يگەرە بىلمەگەن جەردى جاماندايدى, باسقارا بىلمەگەن ەلدى جاماندايدى» دەگەن جامان اتاققا قالدىرماي, اكەسى امانات ەتىپ قالدىرعان قارقىندى كوتەرىپ, ەلدىڭ دە كوڭىلىن تاۋىپ, جاعدايىن جاساپ بەرىپ, ءارى قاراي دامىتىپ جاتىر. اۋىلدىڭ بۇگىنگى بەرەكەلى تۇرمىس-تىرشىلىگى كوڭىل قۋانتادى», دەيدى ەڭبەك ارداگەرى قىدىركەش جولماعامبەتوۆ.
مادەنيەت ۇيىندە وتكەن سالتاناتتى ءىس-شارادان كەيىن, ءتۇرلى ۇلت وكىلدەرىنىڭ وتاۋى تىگىلگەن اۋىلدىڭ ورتالىق كوشەسىندە كورىسۋ مەرەكەسى باستالدى. وتاۋ-وتاۋدى ارالاعان اۋىل تۇرعىندارى ناۋرىز داستارقانىنان ءدام تاتىپ, قۇشاقتاسىپ كورىسىپ, ءتوس قاعىستىرىپ, ءبىر-بىرىنە پەيىل ءبىلدىرىسىپ جاتتى.
قوستاناي وبلىسى,
مەڭدىقارا اۋدانى,
قارقىن اۋىلى
