فوتو: top-news.kz
ءىس-شاراعا ءوڭىر زيالىلارى, مادەنيەت سالاسىنىڭ قىزمەتكەرلەرى, قالا تۇرعىندارى قاتىستى. مەرەكەگە جينالعان كوپشىلىككە سەرىكباي وسپانوۆ, اقىلبەك شاياحمەت سىندى ەل ماقتانىشىنا اينالعان اقىندار جىردان شاشۋ شاشىپ, باتا بەردى. قازاقستان جازۋشىلار وداعى وبلىستىق فيليالىنىڭ توراعاسى جانۇزاق ايازبەك امال كۇنىنىڭ نىشانىن تەك ساحنادان قىزىقتاپ قويماي, تۇرمىس سالتىنا ەنگىزۋ جولدارىن قاراستىرۋ كەرەك دەگەن ۇسىنىس ايتتى.
«قازاقتا «بارماساڭ, كەلمەسەڭ – جات بولاسىڭ» دەگەن ءسوز بار. بۇگىنگى ءىس-شارانىڭ تاريحي ءمانى زور. ەل اراسى سۋىپ بارا جاتقان كەزدە ەل اعالارى الىس-جاقىن اعايىندى قايتسەك تاتۋلاستىرامىز دەگەن ماسەلە كوتەرىپ وتىرعان. ەل مەن ەلدى, اعايىن مەن باۋىردى جاقىنداستىراتىنسونداي كۇننىڭ ءبىرى – وسى امال مەرەكەسى. قۇلدىراڭداعان بالا كەزىمدە اجەمىز ناۋرىز مەيرامىنىڭ قارساڭىندا اياق-استىنان توسەك تارتىپ قالدى. اتام قانشا اينالىپ, تولعانسا دا, ەش ەم قونبادى ما, ءبىراز ۋاقىت باسىن كوتەرە المادى. سونىمەن ناۋرىز مەيرامى باستالعان جايما-شۋاق كۇندەردىڭ بىرىندە ساۋ ەتىپ اۋىلعا ءبىر توپ ادام كەلدى. سويتسەك, ولار اجەمنىڭ توركىنى ەكەن. ءبىر-بىرىمەن قاۋىشىپ جاتقانى ەمىس-ەمىس ەسىمدە. سول كەزدە اجەم باسىن كوتەرىپ, بىردەن تۇرىپ كەتكەنىنە تاڭعالدىق. توركىندەرىمەن ون جىل كورىسپەگەن ەكەن. «كورىسكەندە ادام ەرەكشە تولقيدى ەكەن عوي. جۇرەك تەبىرەنىپ, ءوزىنىڭ دەرتىنەن جازىلىپ كەتەدى ەكەن-اۋ!», دەپ ەدىك سوندا. كەلەشەكتە وسى امال كۇنىن ساحنادان ومىرگە قالاي ەنگىزەمىز, قايتسەك كۇندەردىڭ كۇنىندە ومىرىمىزدەي بولىپ تۇرمىسىمىزعا اياق باسادى دەگەن وي ءجيى مازالايدى. ول ءۇشىن بارلىعىمىزدىڭ ارامىزدا كوپتەن كورمەي جۇرگەن كىسىلەردى ۇيگە شاقىرۋ ءداستۇرى قالىپتاسسا ءجون بولار ەدى. سونى جاستارعا تاجىريبە رەتىندە كورسەتسەك يگى», دەدى قالامگەر.
وسىلايشا, تويعا جينالعان جۇرت ويعا باتىپ تارقاستى. ال كەشكىلىك قالا ورتالىعىندا ءوڭىر ونەرپازدارى ۇيىمداستىرعان «امال كەلدى, جىل كەلدى» اتتى تەاترلاندىرىلعان مەرەكەلىك كونتسەرت ءوتتى.
قوستاناي وبلىسى
