جاۋاپكەرشىلىگى جوعارى مەكەمەدەگى ءتارتىپتى كىرپىك قاقپاي كۇزەتەتىندەردىڭ قاتارىندا قاراۋىل باسشىسى, سەرجانت بولات ابىشەۆ تە بار. قىزىلوردا وبلىسىنىڭ قازالى اۋدانىنان كەلگەن ول وسى اسكەري بولىمدە 2010 جىلدان بەرى قىزمەت اتقارادى. العاشىندا بولىمشە كومانديرى, كەيىن اعا مامان-قاراۋىل باسشىسىنىڭ كومەكشىسى, ءبىر جىل روتا ستارشيناسى بولدى. ءۇش جىلدان بەرى قاراۋىل باسشىسى بولىپ قىزمەت ەتەتىن ول: ء«بىزدىڭ مىندەتىمىزگە تۇرمەدەگى ءتارتىپ پەن زاڭسىز زات اينالىمىن بولدىرماۋ كىرەدى. ءبىر سوزبەن ايتقاندا, مەكەمەنىڭ ءىشى دە, سىرتى دا ۇلتتىق ۇلان جاۋىنگەرلەرىنىڭ قاتاڭ باقىلاۋىنا الىنعان. قىزمەتىمدى اتقارۋ بارىسىندا ءتۇرلى قاۋىپپەن بەتپە-بەت كەلەتىن كەزدەر بولادى. بىرنەشە جىل بۇرىن تىيىم سالىنعان زاتتاردى تۇرمەگە لاقتىرعان ازاماتتاردى ۇستاعان كەزىمىز دە ەسىمىزدە», دەيدى.
وسى ابىرويلى قىزمەتى ءۇشىن «ەرلىگى ءۇشىن» مەدالىن العان. ونىڭ ايتۋىنشا, بۇل جەردە بوستاندىقتىڭ بوز الا تاڭىن بوس وتكىزگەن, سالدارىنان باسەكەدەن قالىپ, باسقانىڭ باعىنا جارماسقان تالاي ادام وتىر. ولاردى قوعامنان ءبولىپ تۇرعان بيىك قابىرعا عانا. ەركىندىكتەگىلەر مەن باس بوستاندىعىنان ايىرىلعانداردىڭ اراجىگىن ءبولىپ تۇرعان تاعى ءبىر ماڭىزدى بوگەت – قاراۋىل. سوندىقتان جاۋىنگەرلىك قىزمەتكە تۇسكەن ساربازدارعا جۇكتەلەتىن جاۋاپكەرشىلىك جۇگى اۋىر. ساربازدار قىراعىلىقتان بولەك, ۇستاعان قارۋىن كۇتىپ-باپتاي الاتىن بولۋى جانە قاجەت جاعداي تۋىنداعاندا قولدانا بىلۋگە ءتيىس. ولارعا قىزمەت بارىسىندا قاتەلىك جىبەرۋگە بولمايدى.
وسىدان ءتورت جىل بۇرىن ءوزىنىڭ باتىل ارەكەتىمەن ەل ەسىندە قالعان بولات ابىشەۆ ءۇيىنىڭ ماڭىندا جۇمىس ىستەپ جاتادى. كەنەت بوگدە ءبىر دىبىستارعا ەلەڭ ەتە قالعان ول كورشىلەس ۇيلەردىڭ ءبىرى وتقا ورانا باستاعانىن بايقايدى. ەش ويلانباستان وتقا ورانىپ جاتقان ۇيدەگى گاز باللونىن سىرتقا شىعارىپ, جالعىز باستى ەگدە جاستاعى ءۇي يەسىنە كومەك قولىن سوزادى. سول ارالىقتا وزگە دە ادامدار توڭىرەككە جينالا قالعان ەكەن. گازعا قارسى باسكيىمدى كيىپ ءۇي يەسىنىڭ ايتقان جەرىنەن ءبىرشاما قۇجاتتاردى دا الىپ شىعادى.
اسكەري بولىمدەگى قاراۋىل باستىعىنان بولەك, ونىڭ كومەكشىلەرى دە وسال ەمەس. سوندىقتان ول ءوزىنىڭ كومەكشىلەرىنە دە زور سەنىم ارتادى. سونداي كومەكشىلەرىنىڭ ءبىرى – 3660 اسكەري ءبولىمىنىڭ ءۇشىنشى اتقىشتار روتاسىنىڭ اعا مامانى – قاراۋىل باستىعىنىڭ كومەكشىسى, ەفرەيتور اماناي ەرجان ۇلى. ون جىلدان بەرى اسكەري قىزمەتتە جۇرگەن ول دا بۇل سالاعا بالا كۇنىنەن قۇشتار بولىپتى. 5-اتقىشتار روتاسى 3-ۆزۆودىنىڭ سارباز-اتقىشى قىزمەتىنەن باستاعان ول قازىر قاراۋىل باستىعىنىڭ كومەكشىسى لاۋازىمىنا تاعايىندالىپتى.
– ءبىز بەكەتتەگى ساقشىلاردى ۋاقتىلى اۋىستىرىپ, سوتتالۋشىلاردىڭ قاشۋىنا جول بەرمەيمىز. قاراۋىل باسشىسى ۇيىقتاپ جاتقان كەزدە ونىڭ ءبىرىنشى كومەكشىسى جاۋاپكەرشىلىكتى ارقالايدى. روتادان قاراۋىل بويىنشا ساباق الىپ شىققان جىگىتتەر جاۋىنگەرلىك قىزمەتكە تۇسەدى. قاراۋىلعا بارلىعى 20 ادام شىعادى. ولاردىڭ 14-ءى سارباز. ساربازداردى جاۋىنگەرلىك قىزمەتكە جىبەرمەي تۇرىپ, الدىن الا سۇحبات جۇرگىزەمىز. قانداي كۇيدە ەكەنى, كىمدەرمەن سويلەسكەنى جايلى سۇرايمىز. ولار ءبىر تاۋلىك بىزبەن جۇرەتىندىكتەن, بار سىرىن جاسىرماي ايتادى. ەگەر الاڭداتارلىق جاعدايلار بارىن سەزسەك روتا كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارىن حاباردار ەتەمىز, – دەيدى ەفرەيتور اماناي ەرجان ۇلى.
بۇل كۇندەرى مۇندا 40 مارتە قاراۋىل قىزمەتىنە تۇسكەن قاتارداعى بىلىسبەك تۇرلىبەك سەكىلدى ساربازدار دا قارۋىن اسىنىپ, وتانىنا قالتقىسىز قىزمەت ەتىپ ءجۇر. شىمكەنت قالاسىنداعى وقۋىن اياقتاعان سوڭ بىردەن اسكەرگە كەلگەن ول جاۋىنگەرلىك قىزمەت اتقارۋدان قاشپاۋ كەرەكتىگىن ايتتى. ونىڭ بۇل ويىن وزگە قارۋلاستارى دا قۇپتايدى. «اسكەرگە كەلگەن سوڭ ءومىردىڭ, اتا-انانىڭ قادىرىن ءتۇسىندىم. جاڭا دوستار تاپتىم. ءبىزدىڭ قىزمەت – سوتتالعانداردىڭ قاشىپ كەتپەۋىن قاداعالاۋ. ولاردىڭ سىرتتاعى ادامدارعا زاردابى تيمەۋى ءۇشىن بارىمىزدى سالىپ ءجۇرمىز», دەيدى اباي وبلىسىنان كەلگەن قاتارداعى جاۋىنگەر الىشەر ورازحان. تاعى ءبىر سارباز, قاتارداعى جاۋىنگەر دانيال ماناتبەك دزيۋدومەن شۇعىلداناتىن, سپورتقا بەيىم شىمىر جىگىت. «وتان وتباسىنان باستالادى. اتا-انام تىنىش ۇيىقتاسىن دەپ, بىزدەر وسىندا قىزمەت اتقارىپ ءجۇرمىز. بولاشاقتا اسكەري بولىمدە قىزمەت ەتكىم كەلەدى. سوندىقتان وسى باستان اسكەري سالانىڭ قىر-سىرىن ۇيرەنۋگە قىزىعۋشىلىق تانىتىپ ءجۇرمىن», دەيدى اعىنان جارىلعان جاۋىنگەر. مىنەكەي, وسىنداي ۇلاندارى بار ۇلتتىق ۇلاننىڭ مەملەكەتىمىزدىڭ تۇراقتىعىن قالىپتاستىرىپ, ىرگەتاسىن بەكەمدەۋدە قوسار ۇلەسى زور.
