كوللاجدى جاساعان – الماس ماناپ, «EQ»
قازىر كيبەرقىلمىس ءورشىپ تۇر. تەحنولوگيانىڭ دامۋىمەن اككىلەردىڭ ءادىس-تاسىلدەرى دە كۇن سايىن جاڭارىپ جاتىر. ءبىرى ءوزىن پوليتسيا قىزمەتكەرىمىن دەپ تانىستىرىپ, الدەبىرەۋلەر مۇلكىن يەمدەنبەكشى بولعانىن ايتىپ دۇرلىكتىرەدى. ەندى ءبىرى بانك مەنەدجەرىنىڭ اتىن جامىلىپ, قارا نيەتىن جۇزەگە اسىرادى. جوعارعى سوتتىڭ ازاماتتىق ىستەر جونىندەگى سوت القاسىندا الاياقتىق قىلمىستىڭ قۇربانى بولعان جابىرلەنۋشىنىڭ قۇقىعى قورعالدى.
– جوعارعى سوتتىڭ ازاماتتىق ىستەر جونىندەگى سوت القاسىنىڭ قاراۋىندا ينتەرنەت الاياقتىق سوت ءىسى قارالدى. ايەل بەلگىسىز بىرەۋلەردىڭ نۇسقاۋىمەن ارەكەت ەتىپ, نەسيە راسىمدەپ, كەيىن ءوز پاتەرىن باسقا ادامعا ارزانداتىلعان باعامەن ساتىپ, العان اقشاسىن جاۋاپكەرلەردىڭ ەسەپشوتتارىنا تۇگەل اۋدارىپ بەرگەنىن ايتقان. وسىلايشا, ول ءتورت جاۋاپكەردەن نەگىزسىز بايۋ سوماسىن ءوندىرۋ تۋرالى تالاپ قويۋمەن سوتقا جۇگىندى. اۋداندىق پوليتسيا ءبولىمى الاياقتىق فاكتىسىمەن قىلمىستىق ءىس قوزعادى. جەرگىلىكتى سوتتار بەلگىسىز تۇلعالاردىڭ ارەكەتىندە الاياقتىق بەلگىلەرى بار ەكەنىن, تيىسىنشە, جابىرلەنۋشىگە قىلمىسپەن كەلتىرىلگەن ماتەريالدىق زالالدى وتەۋ قىلمىستىق ءىس اياسىندا شەشىلۋگە ءتيىس دەگەن ۋاجبەن جاسالعان شاعىمدى قاناعاتتاندىرۋدان باس تارتقان. شاعىمدانۋشى سوت اكتىلەرىمەن كەلىسپەي, كاسساتسيالىق سوت القاسىنا شاعىمدانعان. سوت القاسى انىقتاعانداي, پاتەردى ساتۋ الدىندا شاعىمدانۋشىعا بەلگىسىز بىرەۋ حابارلاسىپ, ءوزىن پوليتسيا قىزمەتكەرىمىن دەپ تانىستىرىپ, الاياقتار ونىڭ پاتەرىن يەمدەنبەك بولعانىن ايتقان. ارتىنشا شاعىمدانۋشىعا ءوزىن ۇلتتىق بانكتىڭ مامانى دەپ تانىستىرعان باسقا ادام قوسىلعان. ونىڭ كورسەتۋى بويىنشا, ايەل ەكىنشى دەڭگەيلى بانكتەردەن قارىزعا قاراجات الۋعا ءوتىنىش جازىپ, كەيىن ونى جاۋاپكەرلەرگە اۋدارعان. وسى ادامداردىڭ ىقپالىمەن شاعىمدانۋشى ءوز پاتەرىن ساتىپ جىبەرگەن. تۇسكەن قارجى جاۋاپكەرلەردىڭ ءبىرىنىڭ ەسەپشوتىنا جىبەرىلگەن, – دەدى جوعارعى سوت سۋدياسى بايان توقتاروۆا.
الايدا جاۋاپقا تارتىلۋشىلاردىڭ ءبىرى كارتالارىن جوعالتىپ الدىم دەسە, ەندى ءبىرى اقشانىڭ تۇسپەگەنىن ايتىپ اقتالعان. بۇل رەتتە سوت القاسى ەكىنشى دەڭگەيلى بانكتەردەن الىنعان تۇبىرتەك تۇرىندە ۇسىنىلعان دالەلدەمەلەر جابىرلەنۋشىنىڭ ءتورت جاۋاپكەرگە 19 ميلليون تەڭگەدەن استام قاراجات اۋدارعانىن انىقتاپ بەردى.
– ەگەر جاۋاپكەر كارتاسىن جوعالتسا, بىردەن كەز كەلگەن قىزمەتتى بۇعاتتاۋعا ءتيىس ەدى. وعان بەلگىسىز بىرەۋلەردەن اقشا اۋدارىلعانىن كورسە, ول الدىمەن اقشانىڭ قايدان, كىمنەن, نە ءۇشىن تۇسكەنىن بانككە بارىپ, انىقتاۋى قاجەت. كەيىن تۇسكەن قارجىنى بىردەن يەسىنە قايتارۋى كەرەك. بۇل جاعدايدا جاۋاپ بەرۋشى ونى ىستەمەگەن. سوت القاسى تالاپ قويۋشىدان ولاردىڭ ەسەپشوتتارىنا اقشا قاراجاتتارى تۇسكەنى انىقتالعاندىقتان, جاۋاپكەرلەر بۇل سومالاردى الۋدىڭ زاڭدى نەگىزدەرىن دالەلدەمەگەندىكتەن, ءىس بويىنشا جاۋاپكەرلەردىڭ نەگىزسىز بايۋى بولعان دەگەن قورىتىندىعا كەلدى. اقشا تۇسكەننەن كەيىن جاۋاپكەرلەر ونى الۋ سەبەپتەرىن انىقتاۋ شارالارىن قولدانباعاندىقتان, سوت القاسى ولاردىڭ كەيىنگى ارەكەتتەرىن, اقشانى باسقا تۇلعالارعا نەگىزسىز اۋدارىپ قارجىعا ءوز قالاۋى بويىنشا يەلىك ەتۋ دەپ سانادى, – دەدى جوعارعى سوت سۋدياسى.
كەيىنگى ۋاقىتتا وزگە ادامنىڭ الەۋمەتتىك جەلىدەگى اككاۋنتىن پايدالانىپ, قارجىلاي كومەك سۇرايتىن الاياقتاردىڭ ارەكەتى دە كۇشەيىپ كەتتى. بۇعان دەيىن تانىمال تۇلعالاردىڭ, الەۋمەتتىك جەلى بەلسەندىلەرىنىڭ جالعان اككاۋنتتارىن جاساۋ ارقىلى ازاماتتاردان اقشا سۇراۋ ءجيى كەزدەسەتىن بولسا, ەندى الاياقتار قاراپايىم ازاماتتارعا دا كوشكەن. ياعني كەز كەلگەن ادامنىڭ اتىن جامىلىپ, Whatsapp-تان جاقىن تۋىستارى, دوستارى نە وزگە تانىستارىنا حات جازۋ ارقىلى بەلگىلى ءبىر بانك كارتاسىنا اقشا اۋدارۋ سۇرالادى. كوزسىز سەنگەندەردى اككىلەر وسىلايشا سان سوقتىرادى. سوندىقتان ماماندار بارىنشا قىراعى, اباي بولۋعا كەڭەس بەرەدى.
