ديانانى وزگە ونەرپازداردان وقشاۋلاپ كورسەتىپ تۇراتىن ءبىر ەرەكشەلىگى – ول سوناۋ جىتىقارا اۋدانىندا ون ءبىر جىل بويى ورىس مەكتەبىندە وقىپ, وزگە ءتىلدى ورتادا ەسەيىپ بويجەتتى. ءبىرىنشى سىنىپتان-اق مەكتەپ ساحناسىنان كورىنىپ, «جىتىقارا ارۋى», «جىتىقارا داۋسى» سياقتى ونەر بايقاۋلارىنىڭ جەڭىمپازى اتانعان بالاۋسا قىز مەكتەپتى تامامداعان سوڭ, تىلدىك قورىنىڭ تايىزدىعىنا قاراماستان, تاۋەكەلگە بەل بۋىپ الماتىعا اتتانىپ, اناۋ-مىناۋ ەمەس, ت.جۇرگەنوۆ اتىنداعى قارا شاڭىراققا كەلىپ قۇجاتىن تاپسىرادى.
«اللا قولداپ, ءوزىم ارمان ەتكەن ونەر اكادەمياسىنا دا قابىلداندىم. مەنىڭ بويىما ساحنا مەن ءتىل قۇدىرەتىن قاتار سىڭىرگەن – وسى ءبىلىم ورداسى. ءار ءرولدى ويناعان سايىن, تۋعان ءتىلدىڭ قادىر-قاسيەتىن ۇعىنىپ, تەرەڭىنە بويلاي بەردىم. ماعان ءتىل ۇيرەتكەن – ساحنا, تەاتر دەسەم بولادى. كەيىن قوستاناي ساحناسىندا ەڭ العاش اقىن قىز زياش قالاۋوۆانىڭ ءرولىن وينادىم. سول كەزدەگى تەاترىمىزدىڭ باس رەجيسسەرى ەرسايىن تولەۋباي اعامىز تاجىريبەمنىڭ جوقتىعىنا قاراماستان, وسى ءرولدى سەنىپ تاپسىردى. ءبىرىنشى قويىلىم. سۇيەكتى ءرول. العاش جۇرەكسىنگەنىم دە راس. بىراق سپەكتاكل اياقتالعان سوڭ, زال تولى كورەرمەننىڭ قوشەمەتىن كورىپ, كوڭىلىم ورنىنا ءتۇستى. سودان بەرى كوپتەگەن قويىلىمدا باستى رولدەردى ويناپ كەلەمىن. كەز كەلگەن ءرول مەن ءۇشىن جاڭا الەم, جاڭا ءومىر. قاي كەيىپكەرىمنىڭ دە جان دۇنيەسىن, قۋانىش-قايعىسىن, بولمىس-مىنەزىن ءوز جۇرەگىممەن تەرەڭ سەزىنىپ المايىنشا, ول ءرولدى ويناي المايمىن», دەيدى ساحنا شەبەرى.
ديانانىڭ بويىنداعى تالانت قۋاتىن كوپشىلىك كورەرمەن عانا ەمەس, كاسىبي تەاتر ماماندارى دا جوعارى باعالايدى. اللا تاعالانىڭ ءوزى تال بويىنا ونەر بىتكەننىڭ ءبارىن ءۇيىپ-توگىپ بەرە سالعان سياقتى: ءان سالادى, بي بيلەيدى. ءوزى بەينەلەگەن كەيىپكەرىنىڭ جان دۇنيەسىن تەرەڭ تۇسىنەتىن ىشكى ءدراماتيزمى وتە مىقتى. كەز كەلگەن ءرولدى, مەيلى كومەديا, مەيلى دراما, مەيلى پلاستيكالىق, مۋزىكالىق سپەكتاكلدەر بولسىن, جەرىنە جەتكىزىپ وينايدى.
«ديانا قىزىمىز كوپتەگەن ۇلكەن رولدەردە وينادى. مىسالى, شىڭعىس ايتماتوۆتىڭ «انا – جەر-انا» تراگەدياسىنداعى ءاليماننىڭ ءرولىن ايتۋعا بولادى. مەن جۇمىسقا كەلگەن جىلى رەجيسسەر نۇرلان ابدىقادىروۆ وسى سپەكتاكلدى دايىنداپ, پاندەمياعا بايلانىستى كورەرمەنگە قويىپ ۇلگەرمەي كەتىپ قالعان ەكەن. مەن سول سپەكتاكلدى الاتىنىن الىپ, قوساتىنىن قوسىپ, وزىمشە قويدىم. رەپەتيتسيا بارىسىندا مايدانعا كەتكەن كۇيەۋىنەن قارا قاعاز كەلگەن ءاليماننىڭ ومىردەن ءتۇڭىلىپ ءوز-وزىنە قول جۇمساماق بولىپ, وراقتى الا سالىپ, ءوزىنىڭ تاماعىنان ورىپ جىبەرگىسى كەلەتىن كورىنىس بار. ءاليمان وراق الىپ جۇگىرگەن كەزدە ايەلدەر قولىنان ۇستاپ قالىپ جىعىلادى. سودان كەيىن كەلەتىن ءبىر ءماتىن بار: «اپا, مەنى سوعىسقا جىبەرىڭىزشى! مەن فاشيستەردى ءولتىرىپ كەلەمىن» دەيدى. وسى ءبىراۋىز ءسوزدىڭ ىشىنەن سونداي ءبىر شاراسىزدىق, سونداي ءبىر قايسارلىق, ايەلگە عانا ءتان نازىك السىزدىك ءتارىزدى بىرنەشە بوياۋ قاتار شىقتى عوي. رەپەتيتسيادا وتىرىپ ءوز كوزىممەن كورگەن سونداي ءبىر ءسات بۇكىل جان دۇنيەمدى جىلاتىپ جىبەرگەن ەدى. بۇل جاعىنان كەلگەندە ديانا وتە كەرەمەت اكتريسا. جالپى, ديانا قالالىق, وبلىستىق دەڭگەيدەگى مادەني ءىس-شارالارعا دا ۇلگەرىپ جۇمىس جاسايدى. ۇيدەگى وتاعاسىنا, بالا-شاعا, اتا-اناسىنا – بارىنە ۇلگەرىپ شاپقىلاپ ءجۇرىپ ءبارىن تىندىرادى. ديانا تەاترعا بەرىلگەن جان. قانداي قيىن ساتتەر بولسىن, كەز كەلگەن ساتتە وسى دياناعا سەنىم ارتامىز. ءسوزىڭدى جەردە قالدىرمايدى. مىسالى, كەشە عانا ءبىر اكتريسامىز استانادان قوستانايعا جەتە الماي جولدا قالىپ قالىپتى. ەندى ونىڭ ورنىنا تەز ارادا دايىندالىپ, ءرولدى ويناپ بەرۋ كەرەك قوي. سول جاۋاپكەرشىلىكتى ديانا ءوز موينىنا الدى. ول «سىعان سەرەناداسىنداعى» يزولدانى, «شولپاننىڭ كۇناسىندەگى» شولپاندى, ايتەۋىر ءبىزدىڭ تەاترىمىزداعى باستى رولدەردىڭ ءبارىن ويناپ شىقتى. تەاتر ۇجىمى كوپتەگەن حالىقارالىق بايقاۋلارعا ءجيى شىعىپ تۇرادى. مۇنداي شىعارماشىلىق ساپارلاردا كورەرمەننىڭ كوزىنە ەڭ الدىمەن ديانامىز ىلىگەدى. سوندىقتان ديانا قوستاناي تەاترىنىڭ بۇگىنگى بەت-كەلبەتى دەسەك تە ارتىق بولمايدى», دەيدى ءى.وماروۆ اتىنداعى قوستاناي وبلىستىق قازاق دراما تەاترىنىڭ كوركەمدىك جەتەكشىسى باتىربەك شامبەتوۆ.
قوستاناي وبلىسى
