فوتو: قر پارلامەنتى سەناتىنىڭ ءباسپاسوز قىزمەتى
ماۋلەن اشىمباەۆتىڭ ايتۋىنشا, بيشىمباەۆتىڭ ءىسى بويىنشا ناقتى نۇكتە قويىلعاننان كەيىن قوعامدا ەلەۋلى وزگەرىستەر ورىن الادى.
«بيشىمباەۆتىڭ ءىسى اياقتالعاننان كەيىن, سونداي-اق ءبىز قاراستىرىپ جاتقان تۇرمىستىق زورلىق-زومبىلىق ءۇشىن جاۋاپكەرشىلىكتى كۇشەيتۋ تۋرالى زاڭ قابىلدانعاننان كەيىن قوعامدا ەلەۋلى وزگەرىستەر بولادى. ءبىزدىڭ قوعام قازىردىڭ وزىندە وزگەرگەن. سالىستىرمالى تۇردە وتكەن جىلعا قاراعاندا قازىر ادامدار وتباسىنداعى زورلىق-زومبىلىق فاكتىلەرىن باسقاشا قابىلدايدى. سونداي-اق ادامدار ۇندەمەي وتىرمايدى, ايەلدەر نارازىلىعىن ءبىلدىرىپ, بۇل تۋرالى اشىق ايتا الادى», دەدى سەنات توراعاسى.
سونىمەن قاتار سەنات توراعاسى سوت شەشىمى ءادىل بولاتىنىن العا تارتتى.
«سوت شەشىمى ءادىل جانە زاڭدى بولاتىنىنا ەش كۇمانىم جوق. سوت تا, جوعارعى سوت باسشىلىعى دا قوعام الدىنداعى جاۋاپكەرشىلىگىن تۇسىنەدى دەگەن ويدامىن», دەدى ماۋلەن اشىمباەۆ.
