فوتو: primeminister.kz
ياساۋي كەسەنەسى – تۇركىستاننىڭ ساۋلەت-تاريحي كەشەنىنىڭ ءبىرى, وعان جىل سايىن 1 ملن-نان استام ادام كەلىپ, زيارات ەتەدى. كەسەنەنىڭ قالپىن ساقتاۋ جونىندەگى جۇمىستار – تابيعي جاعدايلار اسەرىنە بايلانىستى جانە بىرەگەي ساۋلەت ەسكەرتكىشى مەن يۋنەسكو-نىڭ دۇنيەجۇزىلىك مۇرا نىسانىنىڭ ساقتالۋىن قامتاماسىز ەتۋگە باعىتتالعان.
كۇردەلى جوندەۋ جۇمىستارى بىلتىرعى تامىز ايىنان باستاپ جۇرگىزىلىپ كەلەدى. قازىرگى ۋاقىتتا كەسەنەدە سىرتقى ورتا مەن كليماتتىق فاكتورلاردىڭ اسەرىن ولشەيتىن داتچيكتەر ورناتىلعان.
عىلىمي-رەستاۆراتسيالىق جوندەۋ جۇمىستارى جالعاسىپ جاتىر. ۇكىمەت باسشىسى مادەني ەسكەرتكىشتى ساقتاۋ بويىنشا جۇرگىزىلىپ جاتقان جۇمىستاردىڭ ماڭىزدى ەكەنىن اتاپ ءوتتى.
«قوجا احمەت ياساۋي كەسەنەسى – تەك قازاق حالقىنىڭ ەمەس, بۇكىل ادامزاتتىڭ اسىل مۇراسى. مەملەكەت باسشىسى كەسەنەنىڭ تاريحي كەلبەتىن ساقتاۋعا قاتىستى تاپسىرما بەردى. بۇل – ءبىزدىڭ ورتاق مىندەتىمىز. كەسەنەنىڭ جاي-كۇيىن ەرەكشە باقىلاۋدا ۇستاۋ قاجەت», دەدى ولجاس بەكتەنوۆ.
پرەمەر-مينيستر ۇكىمەت تاراپىنان جۇرگىزىلىپ جاتقان جۇمىستارعا بارلىق قولداۋ شارالارى كورسەتىلەتىنىن اتاپ ءوتتى.
