قىستان امان شىققان حالىقتىڭ ءبىر-بىرىمەن مارە-سارە بولىپ جۇزدەسەتىن كورىسۋ كۇنىنىڭ شىن مانىندە شاپاعاتى مول. امال – ءار ادامنىڭ جاقىنىنا جىلى ءسوز ايتىپ, جىل سايىن ءبىر-بىرىمەن اماندىقتا جۇزدەسۋىن تىلەيتىن ساۋاپ مەيرامى. بۇل كۇنى جاسى كىشىلەر ۇلكەن كىسىلەرگە ارنايى ات باسىن بۇرىپ, سالەم بەرەدى, باتاسىن الادى. وسىنداي يگى عۇرىپتى جالعاپ ينتەرنەت-رەداكتسيا ءبولىمىنىڭ قىز-جىگىتتەرى «Egemen Qazaqstan» گازەتىندە ۇزاق جىلدار بويى قىزمەت ەتكەن ارداگەر جۋرناليست جانات ەلشىبەك اعامىزدىڭ ۇيىنە ارنايى باردىق. اعامىز ءبىزدى جىلى شىرايمەن قارسى الدى. ەسىكتەن ۇيگە كىرە سالا ۇيدەگىلەردىڭ كەڭپەيىلدى كوڭىلىنىڭ ءوزى ءبىزدى قۋانىشقا بولەدى. ۇيىندەگىلەر دەگەنىم, قالامگەردىڭ ۇلى مەن كەلىنى, نەمەرەلەرى ەدى. ال جەڭگەمىز بۇل كۇنى جۇمىستا ەكەن.
ءوزىن ارنايى ىزدەپ كەلگەنىمىزگە ريزاشىلىعىن بىلدىرگەن ارداگەر جۋرناليست اڭگىمەسىن جۋرناليستيكا توڭىرەگىندە باستادى. ال ءبىز ۇيىپ تىڭداي بەردىك. جاستاردى كورىپ, جاستىق شاعى ەسكە ءتۇستى مە ەكەن دەپ تە توپشىلادىق. جۋرناليستيكاداعى سارا جولى قالاي باستالعانىنان باستاپ ءتۇرلى قىزىقتى ەستەلىكتەرىن ايتىپ بەردى. «جاۋقازىن», «قارلىعاش», «قوش بول, تەڭىز…», «ۋاقىت-سىناپ», «تاعدىر جەلى» سىندى تۋىندىلاردىڭ اۆتورى قازىر «جۋرناليستيكا جۇمباعى» اتتى كىتاپ جازىپ جاتىر ەكەن. بۇل شىعارما دا بۇيىرتسا وقىرماننىڭ ىستىق ىقىلاسىنا كەنەلەرى انىق.
بۇدان سوڭ ءبارىمىز داستارقان باسىنا جايعاستىق. كورىسۋ كۇنى قازان تولىپ, داستارقاننىڭ ءتۇرلى ءتاتتى-دامدىمەن جايناپ تۇرعانى ارقا-جارقا بولعان اعايىننىڭ قۋانىشىن ەسەلەي تۇسكەندەي كورىندى. وسىدان-اق بۇل وتباسىنىڭ ناۋرىزدى تويلاۋعا ەرەكشە ءمان بەرەتىنىن اڭعاردىق. قالامگەر دە بۇل ۇلىق مەيرامنىڭ ءمان-ماڭىزى تۋرالى ايتا وتىردى.
«قازاق ەجەلدەن ناۋرىز مەرەكەسىن تويلاعان. بىراق ۇلى دەرجاۆا سالت ءداستۇرىمىزدى تىيىپ وتىرعان ساتتەر دە بولدى. ونىڭ ءوزىن ەسەيىپ قالعان ءبىزدىڭ ءوزىمىز كەيىن بىلدىك. ونىڭ ءبارى قيتۇرقى ساياساتتىڭ جولى ەكەن. ال كەيىن ءوز الدىنا تاۋەلسىز ەل بولعالى مەرەكە ەش تىيىمسىز تويلانا باستادى. الايدا تاۋەلسىز ەل بولعانىمىزعا وتىز جىلدان استام ۋاقىت وتسە دە ناۋرىز ءالى دە ويداعىداي تويلانىپ جاتقان جوق. ءيا, قازىر ەشكىم ەشكىمنىڭ قولىن بايلاپ, يدەياسىن جوققا شىعارمايدى. ءاز ناۋرىزدى ءوز بيىگىندە تويلاۋدى دامىتۋ – ء ار ۇرپاقتىڭ ماقسات-مۇددەسى», دەدى ج.ەلشىبەك.
بۇدان سوڭ ول كورىسۋ كۇنى اعايىن اراسىنداعى ەسكى وكپە-رەنىش كەشىرىلىپ, ارازدىق ۇمىتىلاتىنىن, بۇل كۇنى تابيعاتپەن بىرگە ادام جانى دا جاڭارىپ, تازارىپ مۇنتازداي كۇيگە تۇسەتىنىن ايتتى. «التى اي بويى قىس بولاتىن وڭىرلەردە كۇن مەن اي تەڭەسىپ, جەر دۇنيە كوگەرگەندە سامارقاننىڭ كوك تاسى ءجىبيدى. وسى ءبىر ۋاقىتتا ەل قىستاۋدان شىعىپ, كورشىلەرىنە, اعايىن-جەكجاتتارىنا بارىپ سالەم بەرەدى. كورىسۋ اعايىننىڭ وسىلايشا امان-ساۋلىعىن سۇراۋ يدەياسىنان شىققان. سوڭعى جىلدارى بۇل جاقسى ۇردىسكە اينالدى. ناۋرىزدىڭ 14-ىنەن باستالاتىن كورىسۋ كۇنى – باۋىرمالدىق پەن تاتۋ-ءتاتتى ىقىلاستىڭ سيمۆولى. حالىق امال مەرەكەسىنەن باستاپ ون شاقتى كۇن ءتۇرلى ءىس-شارا ۇيىمداستىرعان. مىسالى ەڭبەك, تۋعان جەر, دوستىق, قولونەر, ءداستۇر, سالت-عۇرىپتارىمىزدى وركەندەتۋ تاقىرىپتارىندا جۇيەلى تۇردە تويلانىپ كەلەدى. ال وسىعان مۇرىندىق بولۋ ءار ۇرپاقتىڭ مىندەتى», دەدى ول.
«جاقسى اداممەن وتكىزگەن جارتى ساعات, جامانمەن وتكىزگەن مىڭ كۇنگە تاتىماس» دەگەندەي قالامگەردىڭ قاسىندا وتكەن ەكى ساعاتىمىز زىمىراي وتە شىقتى. از ۋاقىتتىڭ ىشىندە ءبىراز تاعىلىمدى دۇنيەگە قانىقتىق. اعامىزدىڭ باتاسىن الىپ, كەزەكتى كەزەكشىلىگىمىزدى اتقارۋعا كەتتىك.
