كوللاجدى جاساعان – قونىسباي شەجىمباي, «EQ»
ءىىم-ءنىڭ رەسمي وكىلى شىڭعىس الەكەشەۆتىڭ ايتۋىنشا, رەسپۋبليكا كولەمىندە وتكىزىلگەن «قاۋىپسىز جول» جەدەل-پروفيلاكتيكالىق ءىس-شاراسىنا 9,5 مىڭ پوليتسيا قىزمەتكەرىمەن بىرگە باسقا دا مەملەكەتتىك ورگانداردىڭ مىڭعا جۋىق وكىلى جۇمىلدىرىلدى. اكتسيا اياسىندا جول قاۋىپسىزدىگى ەرەجەسىن بۇزعان 360 مىڭنان استام قاتىسۋشى اكىمشىلىك جاۋاپكەرشىلىككە تارتىلعان. سونداي-اق پاترۋلدىك كولىكتەردە ورناتىلعان اۆتوماتتاندىرىلعان بەكىتۋ قۇرالدارىنىڭ ارقاسىندا جىلدامدىق رەجىمىنەن اسىپ كەتۋدىڭ 87 مىڭنان استام فاكتىسى انىقتالىپ وتىر. بۇدان باسقا 9 مىڭنان استام كولىك ايىپپۇل تۇراعىنا قامالعان.
مينيسترلىك وكىلىنىڭ سوزىنشە, جول-كولىك وقيعالارىنا جانە ولاردىڭ سالدارىنىڭ اۋىرلىعىنا اسەر ەتەتىن سەبەپتەردىڭ ءبىرى – جولداردىڭ جاعدايى. سوندىقتان وپەراتسيا اياسىندا كوشە-جول جەلىسىن زەرتتەۋگە دە ماڭىز بەرىلدى. بۇل بويىنشا قۇقىق قورعاۋ ورگاندارى قىزمەتكەرلەرى 8 مىڭ تەكسەرۋ جۇرگىزىپ, جول قاۋىپسىزدىگىنە تەرىس اسەر ەتەتىن 23 مىڭنان استام اقاۋدى انىقتاعان. انىقتالعان اقاۋلاردى جويۋ بويىنشا ءتيىستى قىزمەتتەرگە 8 مىڭعا جۋىق ۇيعارىم بەرىلدى. سونىمەن بىرگە جولداردى كۇتىپ ۇستاۋعا جاۋاپتى 1 179 لاۋازىمدى ادام اكىمشىلىك جاۋاپكەرشىلىككە تارتىلعان.
بۇل باعىتتاعى جۇمىس ءالى دە جالعاسىپ جاتقانىن ايتقان شىڭعىس امانگەلدى ۇلى: «جول ۇستىندە ادامداردىڭ ءومىرى مەن دەنساۋلىعىنا سانالى تۇردە قاۋىپ توندىرەتىن ماس جۇرگىزۋشىلەردىڭ ارەكەتى ەرەكشە باقىلاۋعا الىنادى. مەملەكەت باسشىسى جازانىڭ بۇلتارتپاستىعى قاعيداتىن ساقتاۋ قاجەتتىگىن بىرنەشە رەت اتاپ ءوتىپ, كولىكتى ماس كۇيىندە جۇرگىزۋ – قىلمىس ەكەنىنە نازار اۋدارعان بولاتىن. الايدا ماس كۇيدە كولىك جۇرگىزگەنى ءۇشىن جاۋاپكەرشىلىكتىڭ قاتاڭداتىلۋىنا قاراماستان, وڭىرلەردە كۇن سايىن وسىنداي قۇقىق بۇزۋشىلىقتار جاساۋ, ونىڭ ىشىندە بۇرىن كولىك جۇرگىزۋ قۇقىعىنان ايىرىلعان ادامداردىڭ دا ماس كۇيىندە كولىكتى باسقارۋ فاكتىلەرى انىقتالادى. اۆتوكولىكتى ماس كۇيىندە باسقارعانى ءۇشىن زاڭنامادا 15 تاۋلىككە قاماۋعا الۋ جانە 7 جىلعا جۇرگىزۋشى كۋالىگىنەن ايىرۋ كوزدەلگەن. ال اۆتوكولىكتى ماس كۇيىندە قايتا باسقارعانى ءۇشىن ءومىر بويى جۇرگىزۋشى كۋالىگىنەن ايىرۋ جانە 10 جىلعا دەيىن تۇرمەدە وتىرۋ قىلمىستىق جاۋاپكەرشىلىگى قاراستىرىلعان. بيىلدىڭ وزىندە وسىنداي 227 ادام انىقتالدى. ولاردىڭ باسىم بولىگى سوتتالدى», دەدى.
ونىڭ ايتۋىنشا, مۇنداي قىلمىستىق قۇقىق بۇزۋشىلىقتاردى جاساۋ جۇرگىزۋشىلەردىڭ بەلگىلەنگەن شەكتەۋلەردى سانالى تۇردە ەلەمەۋىن كورسەتەدى. سوت باسقارۋ قۇقىعىنان ايىرسا دا قايتادان ماس كۇيىندە كولىك جۇرگىزەتىندەر ازاماتتاردىڭ ءومىرى مەن دەنساۋلىعىنا قاۋىپ ءتوندىرىپ وتىر. وكىنىشكە قاراي, مۇنداي قىلمىستار كوبىنەسە تۋىستارى مەن جاقىندارىنىڭ ءۇنسىز كەلىسىمىمەن جاسالادى. ياعني قۇقىعىنان ايىرىلعان ادامنىڭ قايتادان ماس كۇيىندە كولىك جۇرگىزۋىنە مۇمكىندىك بەرەدى. ايتكەنمەن قىلمىستىڭ سوڭى ورنى تولماس وكىنىشكە الىپ كەلەتىنىن قۇقىق بۇزۋشى مەن تۋىستارى دا تىم كەش تۇسىنەدى. سول ءۇشىن اكتسيا اياسىندا پوليتسيا جۇرگىزۋشىلەرگە عانا ەمەس, ولاردىڭ تۋعان-تۋىستارى مەن جاقىندارىنا دا جاۋاپسىزدىق جول ۇستىندەگى قايعىلى جاعدايدىڭ ارتۋىنا الىپ كەلەتىنىن, وزگەلەردىڭ الدىنداعى جاۋاپكەرشىلىكتى ءتۇسىنۋ قاجەت ەكەنىن ەسكەرتەدى.
