ەلمۇرات 1991 جىلى تاشكەنت وبلىسى, بوستاندىق اۋدانىنىڭ قىزىل تۋ اۋىلىندا دۇنيەگە كەلدى. بالا كەزىنەن كۇرەسكە قىزىققان ونى اتا-اناسى 13 جاسىندا تۇركىستانداعى بەكزات ساتتارحانوۆ اتىنداعى سپورتتاعى دارىندى بالالارعا ارنالعان مەكتەپ-ينتەرناتقا وقۋعا جىبەردى. بىرەر جىل ەلمۇرات سول جەردە شەبەرلىگىن شىڭدادى. ءتۇرلى تۋرنيرلەردى ۇتىپ, ءوزىنىڭ مىقتىلىعىن سان مارتە دالەلدەگەنىمەن, جەرگىلىكتى ماماندار ونى كەرەك قىلمادى. ءتىپتى بىلىكتى دەگەن وتاندىق باپكەرلەردىڭ ءوزى ەلمۇراتتىڭ كەلەشەكتە مىقتى بالۋانعا اينالاتىنىن بىلمەدى. ءسويتىپ دارىندى جاسقا رەسپۋبليكامىزدىڭ باس كومانداسىنان ورىن بۇيىرمادى.
وسىدان كەيىن ەلمۇرات تاسمۇراتوۆ امالسىز مەكتەپ-ينتەرناتتى تامامداعاننان كەيىن قايتا تۋعان جەرىنە, وزبەكستانعا ورالدى. بۇل – 2010 جىل ەدى. «التىن كەزدىك قاپ تۇبىندە جاتپايدى» دەمەكشى, كوپ ۇزاماي ە.تاسمۇراتوۆ وزبەكستاننىڭ جەڭىل سالماقتاعى باس بالۋانىنا اينالدى.
ءوزىنىڭ العاشقى اۋىز تولتىرىپ ايتارلىقتاي تابىسىنا ەلمۇرات 2012 جىلى قول جەتكىزدى. وڭتۇستىك كورەيانىڭ كۋمي قالاسىندا وتكەن ازيا چەمپيوناتىندا ول كۇمىس مەدالدى موينىنا ءىلدى. سودان كەيىن وزبەكستاننىڭ تۋى استىندا ونەر كورسەتەتىن قازاق بالۋانىنىڭ سپورتتىق مانسابىندا ورلەۋ كەزەڭى باستالدى. تارقاتىپ ايتساق, 2013 جانە 2014 جىلدارى ە.تاسمۇراتوۆ الەم چەمپيوناتىندا قولاعا قول جەتكىزسە, 2018 جىلى كۇمىسپەن كۇپتەلدى. 2013-2020 جىلدار ارالىعىندا ازيانىڭ بەس دۇركىن چەمپيونى اتاندى. قانداسىمىز اتالعان جارىستاردىڭ فينالدىق سايىستارىندا ابدۋلمۇحامماد پاپي (يران), سينوبۋ وتا (جاپونيا), يۋن ۆون چحول (سولتۇستىك كورەيا), ۋرماتبەك اماتوۆ (قىرعىزستان) جانە سون دجين سوپ (وڭتۇستىك كورەيا) سىندى ساڭلاقتارعا سان سوقتىردى. تاعى ءبىر رەت ول كۇمىس مەدالدى يەلەندى.
ەلمۇرات تاسمۇراتوۆ 2016 جىلى برازيليانىڭ ريو-دە-جانەيرو قالاسىندا الاۋى تۇتانعان وليمپيا ويىندارىندا دا اتوي سالدى. قولا مەدال ءۇشىن تارتىستا قىرعىز ارسەن ەراليەۆتى ەڭسەرگەن ول جەڭىس تۇعىرىنا كوتەرىلدى. ءدال سول ساتتە كورشى كىلەمدە المات كەبىسباەۆ تا كۇرەسكەن ەدى. وكىنىشكە قاراي, قازاق بالۋانى نورۆەگيالىق اندرە بەرگكە ەسە جىبەرىپ, بەسىنشى ورىندى قاناعات تۇتتى.
جالپى, اسا ءىرى حالىقارالىق جارىستاردا ەلمۇرات پەن الماتتىڭ جولدارى ءجيى قيىستى. كەبىسباەۆتىڭ دا ەسىمى قالىڭ كورەرمەنگە جاقسى تانىس. ول – الەم چەمپيوناتىنىڭ بەس جانە ازيا ويىندارىنىڭ ەكى دۇركىن جۇلدەگەرى. سارى قۇرلىقتىڭ باستى دوداسىندا قازاق بالۋانى 2 التىن, 3 كۇمىس جانە 2 قولا مەدالدى ولجالادى. قوس قانداسىمىزدىڭ ايقاسىندا بىردە الماتتىڭ اسىعى الشىسىنان تۇسسە, ەندى بىردە ەلمۇراتتىڭ باق جۇلدىزى جاندى.
وزبەكستاننىڭ اتاقتى بالۋانى 2021 جىلى سپورتتىق مانسابىن اياقتاعانى جايىندا رەسمي تۇردە مالىمدەدى. سودان كەيىن ول شاكىرت تاربيەلەي باستادى. بۇل كۇندەرى ەلمۇرات ز ۇلىپقار ۇلى اتالعان مەملەكەتتىڭ ۇلتتىق قۇراماسىنىڭ اعا جاتتىقتىرۋشىسى قىزمەتىن اتقارىپ جاتىر.
