ۇزاق ۋاقىت بويى «قر اگروونەركاسىپتىك كەشەنىن دامىتۋ» ۇلتتىق جوباسىن ىسكە اسىرۋ شەڭبەرىندە مەملەكەت سۋبسيديا رەتىندە بولىنگەن بيۋدجەت قاراجاتىن ۇرلاۋمەن اينالىسىپ كەلگەن قىلمىستىق توپ مەملەكەتكە 3 ملرد تەڭگەدەن استام شىعىن كەلتىرگەن. سوتقا دەيىنگى تەرگەۋ بارىسىندا 107 ملن تەڭگە ءوندىرىلىپ الىنعان. وعان قوسا كۇدىكتىلەردىڭ قۇنى 3,1 ملرد تەڭگە كولەمىندەگى مۇلكىنە تىيىم سالىندى.
قارجى مونيتورينگى اگەنتتىگى ءباسپاسوز قىزمەتىنىڭ مالىمەتىنشە, جەڭ ۇشىنان جالعاسقان قىلمىستىق امال-ارەكەتتەرگە ۇزىن سانى 49 ادام تارتىلعان. ونىڭ 13-ءى – ۇيىمداسقان توپتىڭ مۇشەسى. وسى 13 كۇدىكتىگە سۋبسيديالاردى جىمقىردى, سالىق تولەۋدەن جالتاردى, زاڭسىز كاسىپكەرلىكپەن اينالىستى, قىلمىستىق جولمەن الىنعان م ۇلىكتى زاڭداستىردى, لاۋازىمدى تۇلعالارعا پارا بەرگەن جانە قۇجاتتاردى قولدان جاساعان دەگەن ايىپ تاعىلىپ وتىر.
ۇيىمداسقان توپتىڭ باسشىسى ءوز باقىلاۋىنداعى كومپانيا قىزمەتىنە سالىقتىق تەكسەرۋ جۇرگىزگەن مەملەكەتتىك قىزمەتشىگە قاتىستى زورلىق-زومبىلىق ارەكەتتەرىن قولداندى دەگەن كۇدىككە ىلىگىپ وتىر.
اتالعان قىلمىستىق ىسكە قوستاناي, اقتوبە, سولتۇستىك قازاقستان, پاۆلودار, باتىس قازاقستان وبلىستارىنداعى 30 شارۋا قوجالىعىنىڭ باسشىلارى مەن وكىلدەرى كۇدىكتى رەتىندە تارتىلىپ جاتقانىن ايتا كەتۋ كەرەك. مۇنىڭ سىرتىندا, سوتقا دەيىنگى تەرگەپ-تەكسەرۋ اياسىندا قوستاناي وبلىستىق اۋىل شارۋاشىلىعى باسقارماسىنىڭ 3 بىردەي لاۋازىمدى قىزمەتكەرىنە اقشا قاراجاتىن ۇرلاۋعا جانە پارا الۋعا جاردەمدەستى دەگەن ايىپ تاعىلعان.
7 ۆەتەرينارلىق دارىگەر قۇجاتتاردى قولدان جاساعانى ءۇشىن, اقپاراتتىق جۇيەگە كورىنەۋ جالعان اقپارات ەنگىزگەنى ءۇشىن, سونداي-اق زاڭسىز سىياقىلار العانى ءۇشىن ايىپتالىپ وتىر.
قوستاناي وبلىسى
