«استانا» حالىقارالىق قارجى ورتالىعىندا ورنىقتى دامۋ جونىندەگى ديرەكتور بولىپ تاعايىندالعانعا دەيىن احقو اكىمشىلىگىندە جانە ونىڭ جاسىل قارجى ورتالىعىندا (green finance intelligence ديرەكتورى, باسقارۋشى ديرەكتور, باس ديرەكتورىنىڭ ورىنباسارى) ءارتۇرلى لاۋازىمدا 7 جىل جۇمىس ىستەدىم. كومانداممەن بىرگە قازاقستاننىڭ ۇلتتىق جاسىل تاكسونومياسىن جانە جاسىل جوبالاردى سۋبسيديالاۋ سحەماسى تۋرالى ءتيىستى زاڭنامانى ازىرلەۋمەن اينالىسقان ەدىك. سونداي-اق 2022 جىلدىڭ جەلتوقسانىندا قابىلدانعان ەۋرازيالىق ەكونوميكالىق وداقتىڭ جاسىل جوبالارىنىڭ مودەلدىك تاكسونومياسىن دا ازىرلەۋگە قاتىستىق. «استانا» حالىقارالىق قارجى ورتالىعىنا قىزمەتكە شاقىرعان كەزدە, قۋانا كەلىستىم. ويتكەنى العان ءبىلىمدى, جيناعان تاجىريبەنى ىسكە جاراتۋ, ەلدىڭ قارجى نارىعىنا ۇلەس قوسۋ ۇلكەن ارمانىم بولاتىن. ونىڭ ۇستىنە اعىلشىن ءتىلىن جەتىك مەڭگەردىم. بىراق ونى قولدانباساڭ, جەتىمسىرەپ قالادى. بۇل رەتتە احقو تاپتىرماس جۇمىس ورنى بولدى. مۇندا ءبىز نەگىزىنەن شەتەلدىك ينۆەستورلارمەن جۇمىس ىستەيمىز, ونىڭ ۇستىنە ورتالىقتىڭ رەسمي ءتىلى – اعىلشىن ءتىلى. وسىندا جۇمىس ىستەۋ ارقىلى تىلدىك داعدىم دا, كاسىبي بىلىكتىلىگىم دە شيراپ, اشىلىپ كەلە جاتىر.
ورنىقتى دامۋ سالاسى, ESG ۇستانىمدارىن ايقىنداۋ وتاندىق قارجى نارىعىنىڭ ماڭىزدى سالاسىنا اينالىپ كەلە جاتىر. وسى باعىتتىڭ دامۋىنا ءبىلىمىم مەن تاجىريبەمدى جۇمساپ ءجۇرمىن. «جاسىل» وبليگاتسيالاردىڭ ءمانى مەن ماڭىزىن قاراپايىم ادامدار تۇگىلى مەملەكەت, قارجى ۇيىمدارىنىڭ ءوزى ەندى عانا ءتۇسىنىپ جاتقاندىقتان, قىزمەت اياسىن كەڭەيتۋگە ءبىزدىڭ كومەگىمىز قاجەت. 2060 جىلعا دەيىن كومىرتەگى بەيتاراپتىعىنا قولجەتكىزۋ تۋرالى مەملەكەتتىك ستراتەگيا قابىلدانعانى جالپىعا ءمالىم. ارينە, ول ءۇشىن قوماقتى قارجى كەرەك. ونىڭ ىشىندە «جاسىل» ينۆەستيتسيانىڭ ورنى ەرەكشە.
سول ستراتەگيا قابىلدانعانعا دەيىن دە «جاسىل» قارجى تۇجىرىمداماسىنىڭ توڭىرەگىندە جۇمىس ىستەدىك. ەۋروپالىق قايتا قۇرۋ جانە دامۋ بانكى ماماندارىمەن بىرلەسىپ قازاقستانعا ارنالعان «جاسىل» قارجىلاندىرۋ كونتسەپتىسىن جازىپ شىقتىق. سول كەزدە «جاسىل» وبليگاتسيالار احقو الاڭىندا جاڭا قۇرال رەتىندە ەنگىزىلۋى كەرەك دەگەن تۇجىرىمعا كەلگەن ەدىك. پاندەميا كەزىندە «جاسىل» عانا ەمەس, الەۋمەتتىك وبليگاتسيالاردىڭ دا الەۋەتى ءتۇسىپ كەتتى. قازىرگى ۋاقىتتا «جاسىل» دا, الەۋمەتتىك تە كىرەتىن ورنىقتى دامۋ تۇجىرىمداماسىنىڭ ءوسىپ-وركەندەۋىنە اتسالىسىپ كەلە جاتىرمىز. ەلىمىزدەگى «جاسىل» ەكونوميكانىڭ بولاشاعى جارقىن. ءتيىمدى «جاسىل» ينۆەستيتسيالاۋ باستامالارىن ىسكە اسىرۋ بىرتىندەپ باستالىپ جاتىر. قازاقستان دامۋ بانكىنىڭ بىلتىر «استانا» بيرجاسىندا «جاسىل» وبليگاتسيالار ورنالاستىرۋى – سونىڭ دالەلى. سونىمەن قاتار احقو بىلتىر قازان ايىنان بەرى حالىقارالىق قارجىلىق ورتالىقتار قاۋىمداستىعىنا مۇشە. سونىڭ شەڭبەرىندە ءبىز Gender Finance Charter دەپ اتالاتىن باستاماعا قوسىلدىق. ول جەردە گەندەرلىك قارجى قۇرالدارىن العا تارتۋ, قارجى سالاسىنداعى ايەلدەردىڭ قىزمەتىن ناسيحاتتاۋ دەگەن مىندەتتەرمەن اينالىسامىز. بيىل ماۋسىم ايىندا وتەتىن ءداستۇرلى Astana Finance Days كونفەرەنتسياسى اياسىندا وسى قارجى نارىعىنداعى ايەلدەر بەلسەندىلىگى جونىندە ارنايى سەسسيا ۇيىمداستىرامىز دەپ جوسپارلاپ وتىرمىز. جالپى, سوڭعى ۋاقىتتا نارىقتاعى ايەل ازاماتتاردىڭ بەلسەندىلىگى, ىسكەرلىگى ءجيى بايقالىپ جاتىر. بۇل وتە جاقسى ءۇردىس.
8 ناۋرىز – مەن ءۇشىن ماڭىزى جوعارى مەرەكە. مەيرامدا مىندەتتى تۇردە اناما جانە تۋعان اپكەمە حابارلاسىپ قۇتتىقتايمىن, گۇل جىبەرەمىن. مەرەكە كەزىندە گرۋزيادا ءىسساپاردا بولايىن دەپ تۇرمىن. بىراق جۇمىس بىتكەن سوڭ كەشكىلىك مەيرامحاناعا بارىپ, مەرەكەلىك كوڭىل-كۇيدى سەزىنەمىز دەپ ويلايمىن. بيىل بۇيىرتسا, سۇيىكتىم ەكەۋمىز باس قۇراپ, وتاۋ قۇرۋدى جوسپارلاپ وتىرمىز.
ايگۇل كۋساليەۆا,
«استانا» حالىقارالىق قارجى ورتالىعى (احقو) اكىمشىلىگىنىڭ ورنىقتى دامۋ جونىندەگى ديرەكتورى
