فوتو: www.sb.by
سوچي فەستيۆالىنە ناۋرىزدىڭ 1-7 ارالىعىندا 190 مەملەكەتتەن بارلىعى 20 مىڭ ادام كەلگەن. قازاق جاستارىنان بولەك باسقوسۋعا وزبەكستاننان 200-دەن استام, تاجىكستاننان – 275, ءۇندىستاننان – 360, كونگو دەموكراتيالىق رەسپۋبليكاسىنان – 100, بانگلادەشتەن – 95, ارگەنتينادان 100-گە جۋىق وكىل قاتىسقان. ءار دەلەگات اشىلۋ سالتاناتىندا ءوز ەلدەرىنىڭ تۋلارىن كوتەرىپ, الاڭدى ءجۇرىپ وتكەن. كەيىن «روزا حولل» كونتسەرت كەشەنىندە III ۇلتتىق ينتەرنەت-كونتەنت سىيلىعىنىڭ العاشقى جەڭىمپازدارىن ماراپاتتادى.
– مەنىڭ ويىمشا, ينتەرنەتتى دامىتۋ ينستيتۋتى ءوز جۇلدەسىن وسىندا, دۇنيەجۇزىلىك جاستار فەستيۆالى كەڭىستىگىنە اۋىستىرعانى وتە دۇرىس سياقتى. ويتكەنى ءاربىر دەلەگات, ءاربىر قوناق, ءاربىر ساراپشى ءدال وسى نوميناتسياعا لايىقتى. سەبەبى سىزدەر الەمنىڭ جاقسى جاققا باعىت الۋىنا, دامۋىنا سەبەپشىسىزدەر. ءبىزدىڭ ولكەگە كەلۋ وسى جەردەگى ارقايسىڭىزعا وڭاي بولمادى. ءبىز بىلمەيتىن كەدەرگىلەردى ەڭسەرىپ, جانىمىزدا تۇرسىزدار. سول ءۇشىن سىزدەرگە ەرەكشە ءىلتيپاتىمدى بىلدىرەمىن, – دەدى رەسەي فەدەراتسياسى پرەزيدەنتى اكىمشىلىگى باسشىسىنىڭ ءبىرىنشى ورىنباسارى سەرگەي كيريەنكو.
تورتكۇل دۇنيەگە كوز تىككەن اۋقىمدى ءىس-شاراعا رەسەيلىك جاستار ءىسى جونىندەگى فەدەرالدى اگەنتتىك جانە بىرنەشە ۆەدومستۆو ۇيىتقى بولعان. فەستيۆال قاتىسۋشىلارى حالىقارالىق جاس كاسىپكەرلەر قاۋىمداستىعىن قۇرۋ تۋرالى دەكلاراتسياعا قول قويدى. مۇندا جاس كاسىپكەرلەر ءۇشىن ارنايى ءىس-شارالار ۇيىمداستىرىلىپ, بيزنەستىڭ وزەكتى ماسەلەلەرى تالقىلاندى.
– قوعامداستىق دۇنيەجۇزىلىك جاستار فەستيۆالىنىڭ مۇراسىنا اينالادى. ءبىلىم, تاجىريبە جانە رەسۋرستارمەن الماسۋ ورتالىعى رەتىندە ارنايى قۇرىلعان پلاتفورما بولاشاقتا قاتىسۋشىلارعا ءوز بيزنەسىن دامىتۋعا, ءار مەملەكەتتىڭ بيزنەس ورتاسىن زەرتتەۋگە, كاسىپكەرلەرگە جاڭا نارىقتارعا شىعۋعا, بايلانىستار جەلىسىن كەڭەيتۋگە جانە كاسىپكەرلىك قىزمەتتە جاڭا بيىكتەرگە جەتۋگە كومەكتەسەدى, – دەدى رف جاستار ءىسى جونىندەگى فەدەرالدى اگەنتتىك باسشىسىنىڭ كەڭەسشىسى ولەگ ماكاروۆ.
سوچيدەگى بۇكىلالەمدىك جاستار فەستيۆالىنىڭ قاتىسۋشىسى, وتانداسىمىز پەريزات جاڭبىرباەۆا جاستار فورۋمنىڭ اتموسفەراسىمەن ءبولىستى.
«مۇنداي ورتالاردا الەمنىڭ ءار بۇرىشىنان كەلگەن جاستار قارىم-قاتىناس جاسايدى, تانىسادى, جاڭا اسەرگە بولەنەدى. ولاردىڭ ءومىر ءسۇرۋ دەڭگەيىمەن تانىسىپ, وي-ءورىسىن كەڭەيتەدى. بۇل مەنىڭ رەسەيگە العاشقى ساپارىم. يگى ءىس-شارا مەن كۇتكەندەگىدەن دە وتە جوعارى دەڭگەيدە ۇيىمداستىرىلعان», دەدى بەلسەندى.
باعدارلاما اياسىندا مادەنيەت جانە اقپارات ۆيتسە-ءمينيسترى ەۆگەني كوچەتوۆ قىرعىزستان, قىتاي, وزبەكستان, تاتارستان دەلەگاتسيالارىنىڭ باسشىلارىمەن بىرقاتار ەكىجاقتى كەزدەسۋ وتكىزدى. قىرعىزستاننىڭ مادەنيەت, اقپارات, سپورت جانە جاستار ساياساتى ءمينيسترىنىڭ ورىنباسارى مارات تاعاەۆپەن كەزدەسۋ بارىسىندا تاراپتار ەكىنشى قازاق-قىرعىز جاستار فورۋمىن وتكىزۋ ماسەلەلەرىن تالقىلادى.
سونداي-اق ەۆگەني كوچەتوۆ بۇكىلقىتاي جاستار فەدەراتسياسى توراعاسىنىڭ ورىنباسارى ليۋ كايمەن ومىردەگى ءتۇرلى سالا بويىنشا جاستارعا تەڭ مۇمكىندىكتەر جاساۋ, جاستار كاسىپكەرلىگىن قولداۋ مەن دامىتۋ جانە جاستاردىڭ قوعامدىق-ساياسي ومىرگە بەلسەنە قاتىسۋى جايىندا سويلەستى. كەزدەسۋلەر قورىتىندىسى بويىنشا جاستار ساياساتى سالاسىنداعى ىنتىماقتاستىقتى نىعايتۋ تۋرالى كەلىسىمگە كەلىپ, بيىلعا ارنالعان ەكىجاقتى ءىس-شارالار جوسپارى بەلگىلەندى.
جابىلۋ سالتاناتىنا رەسەي فەدەراتسياسىنىڭ پرەزيدەنتى ۆلاديمير پۋتين ارنايى قاتىستى. ول دۇنيەجۇزىلىك جاستار فەستيۆالىنىڭ قاتىسۋشىلارىمەن پىكىر الماسىپ, ءسوز سويلەدى.
