ينفوگرافيكانى جاساعان – امانگەلدى قياس, «EQ»
«مۇعالىم بولۋ – جۇرەك جىلۋىن, مەيىرىم شۋاعىن, ادامگەرشىلىك قاسيەتىن وقۋشى بويىنا دارىتۋ. مۇعالىم مارتەبەسى – شاكىرتكە اتا-اناسىنداي بولىپ تاربيە بەرۋ. ولارمەن بىرگە قۋانا ءبىلۋ, ۋاقىت ارناۋ», دەيدى 2023 جىلى «ۇزدىك پەداگوگ» اتانعان استانا قالاسىنداعى «№93 مەكتەپ-ليتسەيىنىڭ قازاق ءتىلى مەن ادەبيەتى ءپانىنىڭ مۇعالىمى نۇرگۇل داريۆحان. بۇل ناعىز ۇستازدىڭ جۇرەكتەن شىققان, 10 جىلدىق تاجىريبەسىنەن تۇيگەن ويى.
بىلىكتى مۇعالىم بار ءبىلىمىن بۇگىن الدىندا پارتادا وتىرعان, ەرتەڭ ۇلتتىڭ بولاشاعىنا اينالاتىن وقۋشىلاردىڭ بويىنا ءسىڭىرىپ جاتىر. ول مۇعالىم ۇنەمى ىزدەنىستى توقتاتپاۋعا ءتيىس ەكەنىن ايتادى.
«مەن سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىن قازاق ءتىلى مەن ادەبيەتىنىڭ مۇعالىمى ماماندىعى بويىنشا ءتامامدادىم. فيلولوگيا عىلىمدارىنىڭ ماگيسترانتىمىن. ۇستازدىق ەڭبەك ءوتىلىم – 10 جىل. اتاقتى قانيپا بىتىباەۆانىڭ تەحنولوگيالارى سىن تۇرعىسىنان ويلاۋ, وي تاستاۋ, ويلانتۋ, ويلاۋ, دامىتا وقىتۋ ادىستەرىن قازاق ءتىلى مەن ادەبيەتى ساباعىندا قولدانۋ ارقىلى ۇلتىن, ادەبيەتىن, ءتىلىن سۇيەتىن تۇلعا قالىپتاستىرۋعا ءوز ۇلەسىمدى قوسىپ جاتىرمىن. ۇزدىك پەداگوگ بولۋ – ۇزدىكسىز ءبىلىم الىپ, ىزدەنىپ, سونى شاكىرت بويىنا سىڭىرە ءبىلۋ دەگەن ءسوز. اباي اتامىزدىڭ ناقىل سوزىمەن ايتساق, «اقىرىن ءجۇرىپ, انىق باسۋ». سەبەبى مۇعالىم – ءوزىنىڭ ءبىلىمىن ۇزدىكسىز جەتىلدىرىپ وتىرعاندا عانا مۇعالىم, ال وقۋدى, ىزدەنۋدى توقتاتقان كەزدە ونىڭ مۇعالىمدىگى دە جويىلادى», دەيدى ول.
ۇستازدىڭ ەڭبەگى قاشاندا وقۋشىلارىنىڭ ناتيجەسىنەن كورىنىپ, سونىمەن باعالانادى. مۇعالىم شاكىرتى شىڭعا شىققان سايىن ءوزى دە بيىكتەي بەرمەك. نۇرگۇل داريۆحاننىڭ دا كوپتەگەن جەتىستىككە جەتكەن وقۋشىلارى بارشىلىق.
«حالىقارالىق, رەسپۋبليكالىق, قالالىق وليمپيادالاردا جەڭىمپاز اتانعان وقۋشىلارىم بار. مىسالى, اقنۇر تۇياقباي مۇقاعالي ماقاتاەۆ حالىقارالىق قورىنىڭ ءبىلىم گرانتىن يەلەندى. باۋىرجان بەكماعانبەت رەسپۋبليكالىق بالالار وقۋىنىڭ جەڭىمپازى اتاندى. ايبەك بايجۇما رەسپۋبليكالىق قازاق ءتىلى مەن ادەبيەتى ءپانى وليمپياداسىنىڭ جەڭىمپازى بولسا, جاننۇر ساعىناي, بالنۇر امانگەلدى – رەسپۋبليكالىق ابايتانۋ وليمپياداسىنىڭ جۇلدەگەرلەرى. ءاربىر سايىسقا وقۋشىلارىما ءوز بەتىمەن ىزدەنىپ, دايىندالۋىنا باعىت-باعدار بەرىپ, كومەكتەسەمىن», دەيدى مۇعالىم.
ال كۇنسۇلۋ امانتايقىزى قوعامدىق تاماقتانۋ جانە سەرۆيس كوللەدجىندە 18 جىل بويى ساباق بەرىپ كەلەدى. بىلىكتى ماماننىڭ تاجىريبەسى دە, تۇيگەنى دە, ومىرگە, وندىرىسكە دايارلاعان شاكىرتتەرى دە كوپ. سول شاكىرتتەر قازىر الەمنىڭ ءار ەلىندە جۇمىس ىستەپ ءجۇر.
«مەن جۇمىس كۇنىمدى ستۋدەنتتەرگە ءدارىس وقۋدان باستايمىن, سودان كەيىن وقۋ زەرتحاناسىندا تاجىريبەلىك ساباقتار وتكىزەمىن. توپتىڭ كۋراتورى رەتىندە وقۋ, تاربيە, عىلىمي زەرتتەۋ جۇمىستارىمەن دە اينالىسامىن. سونداي-اق بىزدە ينكليۋزيۆتى وقىتۋ توپتارى بار. ەرەكشە ءبىلىم بەرۋ قاجەتتىلىگى بار ستۋدەنتتەرگە دە ساباق بەرەمىن. بۇل – مەنىڭ جۇمىسىمنىڭ تاعى ءبىر جاۋاپتى تۇسى. بۇعان قوسا ستۋدەنتتەرىمدى قوعام ومىرىنە ۇنەمى بەلسەندى ارالاسۋعا تاربيەلەپ وتىرامىن. ويتكەنى ولاردىڭ ارقايسى ءبىر كەتىككە قالاناتىن كىرپىش. ءبىزدىڭ مىندەتىمىز – ۇيرەتىپ, باعىتتاۋ. كوللەدجدە ەڭبەك ەتكەن ۋاقىت ارالىعىندا الدىمنان 200-دەن استام شاكىرت تۇلەپ ۇشتى. مەن ولاردى ماقتان تۇتامىن. بارلىعى دەرلىك وقىعان سالاسى بويىنشا كاسىبي مامان بولىپ, ەلىمىزدە, ءتىپتى الەم ەلدەرىندە قىزمەت ەتىپ ءجۇر», دەيدى پەداگوگ.
كۇنسۇلۋ حاليدا وقىتۋشىلىق جانە كۋراتورلىق جۇمىستاردان باسقا, ستۋدەنتتەرگە, جاس ماماندارعا شەبەرلىك سىنىپتارىن دا وتكىزەدى. وندا وقىتۋشى تاجىريبەسىمەن ءبولىسىپ, كورسەتەدى. سونىمەن قاتار ۇزدىك پەداگوگ ءوزىن شىڭداپ, كاسىبي تۇرعىدان وسۋگە, تاربيەلەۋگە ەرەكشە كوڭىل بولەتىنىن ايتادى.
«مەن جىل سايىن استاناداعى جانە ەلىمىزدىڭ باسقا ايماقتارىنداعى كاسىپورىنداردا بىلىكتىلىكتى ارتتىرۋ كۋرستارىنان, تاعىلىمدامادان وتەمىن. سونىمەن قاتار ءارتۇرلى سەمينار مەن كونفەرەنتسياعا قاتىسامىن. قازىرگى كەزدە كوللەدج باسشىلىعى حالىقارالىق ىنتىماقتاستىق بويىنشا بەلسەندى جۇمىس جۇرگىزىپ, باسقا وقۋ ورىندارىمەن مەموراندۋمدارعا قول قويدى. وسى ورايدا فينليانديادا, تاتارستاندا, ياكۋتيادا تاعىلىمدامادان ءوتىپ, ونداعى ارىپتەستەرىممەن تاجىريبە الماسىپ, ءبىلىمىمدى شىڭداۋعا مۇمكىندىك الدىم. سونىمەن قاتار سالاماتتى ءومىر سالتىن ۇستانامىن. قالالىق دەڭگەيدەگى ۇستەل تەننيسى مەن ۆولەيبولدان سپورتتىق جارىستارعا ءجيى قاتىسامىن. بۇعان قوسا قازىرگى زاماننىڭ قاجەتتىلىگىنە اينالعان الەۋمەتتىك جەلىنى دە مەڭگەرگەن ءجون دەپ ويلايمىن. YouTube-تە جەكە ارنام بار. وندا مەن ءوزىمنىڭ شەبەرلىك دارىستەرىمدى بەينەساباق رەتىندە جۇكتەپ وتىرامىن. جالپى, ۇستاز ارقاشان ءوزىن دامىتىپ وتىرۋى قاجەت. مەن ءوز جۇمىسىما جاۋاپكەرشىلىكپەن ءارى ماحابباتپەن قارايمىن, ويتكەنى مەن ءوز سالامنىڭ كاسىبي ماماندارىن تاربيەلەپ وتىرمىن.
استانا قالاسى №8 مەكتەپ-ليتسەيىنىڭ باستاۋىش سىنىپ مۇعالىمى سەرىككۇل سەكسەنباەۆانىڭ ەڭبەك ءوتىلى 26 جىل. ول ماماندىعىنا كاسىپ دەپ ەمەس, ومىرلىك ميسسياسى رەتىندە قارايدى. وقۋشىلاردىڭ الدىنداعى ۇلكەن جاۋاپكەرشىلىكتى بار جۇرەگىمەن سەزىنەدى.
«مەنىڭ بالا كۇنگى ارمانىم, انام سياقتى, ارداقتى ۇستازدارىم سياقتى ۇستاز بولۋ ەدى. مەن ۇستازدىقتىڭ اۋىر جۇگىن ارقالاۋدى ءوز جۇرەك قالاۋىممەن تاڭدادىم. سوندىقتان ماماندىعىم ماقتانىشىم دەپ ايتا الامىن. «ماعان جاقسى مۇعالىم بارىنەن دە قىمبات», دەپ ىبىراي التىنسارين اتامىز ايتقانداي, دۇنيەدەگى ماماندىق اتاۋلىنىڭ تورەسى – ۇستازدىق. مۇعالىم – بارلىق ماماندىق يەسىن تاربيەلەيتىن, ۇيرەتەتىن, ءبىلىم نارىمەن سۋسىنداتاتىن جان. مۇعالىم بەرگەن تاربيە ءاربىر جاننىڭ ومىرىنە جول سىلتەر شامشىراق سياقتى. سوندىقتان دا ۇلاعاتتى ۇستازدارعا بۇكىل ادام بالاسى باس يەدى. ۇستاز – بىلگەنىن ۇيرەتۋشى عانا ەمەس, تۇلا بويى تۇنعان ونەگە, اق تىلەۋلى انا سياقتى بارلىق ادامنىڭ بويىنان جاقسىلىق ىزدەيتىن ىزگى نيەت يەسى دەپ ايتار ەدىم. ۇستازدار جايىندا باۋىرجان مومىش ۇلى: «ۇستازدىق – ۇلى قۇرمەت. سەبەبى ۇرپاقتاردى ۇستاز تاربيەلەيدى. بولاشاقتىڭ باسشىسىن دا, داناسىن دا, عالىمىن دا, ەڭبەكقور ەگىنشىسىن دە, كەنشىسىن دە ۇستاز وسىرەدى», دەگەن بولاتىن. مىنە, بۇگىنگى تاڭدا مەن وزىمنەن وزعان شاكىرتتەردى تاربيەلەپ كەلەمىن. شەبەر ۇستاز ۇزدىكسىز ىزدەنىستە بولىپ, قوعام سۇرانىسىنا ساي ءبىلىمدى, شىعارماشىل, ءوزىن ءوزى دامىتىپ, جەتىلدىرە الاتىن بولۋى قاجەت دەپ ويلايمىن», دەيدى مۇعالىم.
ەڭبەكتىڭ ەلەنۋى ءونىمدى ءىس اتقارىپ, قوعامعا ۇلەس قوسىپ جاتقانىڭدى سەزدىرەدى. بۇل دا – مارتەبە. «بيىلعى وقۋ جىلىندا وتكەن رەسپۋبليكالىق «ۇزدىك پەداگوگ» بايقاۋىنا قاتىسۋ مەن ءۇشىن ۇلكەن جەڭىس بولدى دەپ ايتا الامىن. مەنىڭ 26 جىلدىق ەڭبەگىمنىڭ ناتيجەسى دەپ تۇسىنەمىن», دەيدى سەرىكگۇل ابباسقىزى.
