ونى العاش رەت اق جەلەڭ كيگەن قىز-جىگىتتەرمەن بىرگە اسكەر قاتارىنا جاڭادان الىنىپ, شەكارا باسقارماسىنىڭ تابالدىرىعىنان ەندى اتتاعان جاس ساربازداردى مەديتسينالىق تەكسەرۋدەن وتكىزىپ جاتقان ساتىندە كوردىك. جۇمىسىنا جانىمەن بەرىلگەن بىلىكتى مامانعا اسكەري سالاعا قالام تەربەيتىن تىلشىلەردىڭ دە, ءوز ارىپتەستەرىنىڭ دە قۇرمەتى ەرەك.
ۇقك شەكارا قىزمەتى الماتى وبلىستىق دەپارتامەنتىنە قاراستى قاراساي اۋدانى بويىنشا شەكارا باسقارماسىنىڭ مەديتسينالىق قامتاماسىز ەتۋ بولىمشەسىنىڭ باسشىسى, مايور ماقسات تىلەۋعابىلوۆانى اينالاسى ءوز ءىسىنىڭ بىلگىرى رەتىندە بىلەدى. قىزىلوردا وبلىسىنىڭ ارال قالاسىندا دۇنيەگە كەلگەن كەيىپكەرىمىزدىڭ ءومىرى اسكەري سالامەن ورىلگەن. ومىرلىك سەرىگى ەربول دا – شەكاراشى وفيتسەر.
سەمەي قالاسىنداعى مەملەكەتتىك مەديتسينا اكادەمياسى تابىستىرعان ەرلى-زايىپتىلار ارمانعا بىرگە قانات قاعىپ, وزدەرى ءبىلىم العان وقۋ ورداسىندا وقىتۋشى بولىپ ەڭبەك جولىن باستاعان. بۇل – ەلىمىزدە مەملەكەتتىك تىلگە ەرەكشە نازار اۋدارىلىپ, وقۋ ورىندارىندا قازاق بولىمدەرى كوپتەپ اشىلىپ جاتقان 2000 جىلداردىڭ باسى بولسا كەرەك. سوندىقتان شەكارا قىزمەتىنىڭ ساپىنا شاقىرىلعانعا دەيىن ازاماتتىق ءبىلىم وشاقتارىندا ءوزىنىڭ ماماندىعىنا ساي جۇمىس ىستەگەن ماقسات سەرىكبايقىزىنىڭ عىلىمي-پەداگوگيكا ءوتىلى 14 جىلدى قۇرايدى. ەكى وقۋ قۇرالىنىڭ, 10 عىلىمي ەڭبەكتىڭ تەڭ اۆتورى.
ول اناسىنا قاراپ بوي تۇزەپتى. اناسى كۇلاش مايدانبايقىزى ارال قالاسىندا ۇزاق جىلدار بويى مەدبيكە بولىپ جۇمىس ىستەگەن. بۇل تۋرالى ماقساتتىڭ ءوزى بىزگە بەرگەن سۇحباتىندا بىلاي دەپ اعىنان جارىلعان: «مەن ساباقتان كەيىن كوبىنە انامنىڭ جۇمىس ورنىنا باراتىنمىن. سوندا انام سەكىلدى مەدبيكەلەر مەن دارىگەرلەردىڭ الدارىنا كەلگەن ادامداردى قالاي ەمدەگەندەرى, ولاردىڭ ناۋقاستارعا كورسەتكەن ەرەكشە ىقىلاسى مەن قامقورلىعى جادىمدا جاڭعىرا بەردى. وسىدان كەيىن مەن دە اسكەري دارىگەر بولۋدى ۇيعاردىم».
2008 جىلى جولداسى ەربول تىلەۋعابىلوۆ شەكاراشىلار قاتارىنا قابىلدانىپ, قازاق-قىتاي شەكاراسىنىڭ بويىندا ورنالاسقان جاركەنت شەكارا جاساعىنا جىبەرىلەدى. وسىلايشا, ماقسات ءۇشىن گارنيزوننان-گارنيزونعا كوشۋ باستالادى. جاڭا ورتاعا كەلە سالىپ, ءوزىنىڭ ماماندىعىنا ساي وسىنداعى «ديانا» مەديتسينالىق كوللەدجىنە جۇمىسقا قابىلدانىپ, ستۋدەنتتەرگە ساباق بەرۋگە كىرىسەدى. بۇل قىزمەتى شەكاراشى جولداسىنىڭ لاۋازىمى ءوسىپ, شونجى شەكارا جاساعىنا مەديتسينا قىزمەتىنىڭ باسشىسى بولىپ تاعايىندالعانعا دەيىن جالعاسادى. ماقسات مۇندا دا جۇمىسسىز وتىرمايدى. شونجى مەديتسينالىق كوللەدجىنە وقىتۋشى بولىپ كىرەدى. ال ءبىر جىلدان كەيىن ءوزى دە يىعىنا قوس جۇلدىز تاعىپ, الماتى ىرگەسىندەگى قاراساي شەكارا جاساعىنا قىزمەتكە الىنادى. وسىدان كەيىن اسكەري تارتىپكە ساي جولداسى دا وسىنداعى اسكەري بولىمدەردىڭ بىرىنە اۋىستىرىلادى.
قازىر بۇل اسكەري ۇجىم قاراساي اۋدانى بويىنشا شەكارا باسقارماسى دەپ اتالادى. ماماندىعىنا ادال ماقسات سەرىكبايقىزىنىڭ لاۋازىمىنا قوسا, يىعىنداعى كىشكەنتاي جۇلدىزدارى ۇلكەيىپ, مايور دارەجەسىنە جەتكەن. ءوزى 2021 جىلدان بەرى مەديتسينالىق قامتاماسىز ەتۋ بولىمشەسىن باسقارادى.
ءبىزدىڭ كەيىپكەرىمىزدىڭ ۇستانىمى – كاسىبي شەبەرلىك ءھام سارباز ساۋلىعىنا ساپالى قىزمەت جاساۋ. بۇگىنگە دەيىن تالاي شەكاراشى ماقسات حانىمنىڭ ەم-دومىن الىپ, دەنەسىن دەندەگەن دەرتىنە قوش ايتقان. وسىنداي ەرلىككە پارا-پار ەڭبەگى ءۇشىن ول – «مەديتسينا سالاسىنىڭ ۇزدىگى» اتانۋعا ابدەن لايىق جان. بۇدان وزگە, قۇرالايدى كوزگە اتقان مەرگەندىگى بار. اڭعا شىقپايدى, ارينە. دەپارتامەنتتىڭ قالا ىرگەسىندەگى پوليگونىنا بارىپ, نىسانا كوزدەۋدەن سىناق تاپسىرعان كەزدە ارۋلار ىشىنەن وفيتسەرگە تەڭ كەلەتىن جان تابىلماعان.
كوپبالالى انا. قىزدارى – جانەركە, ارۋجان, ۇلدارى – بەيبارىس, بەكسۇلتان. شەكاراشى وفيتسەرلەردىڭ تۇلا بويى تۇڭعىشتارى جوعارى ءبىلىمدى, ءوز ماماندىعىمەن جۇمىس ىستەيدى. ارۋجان – اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ستۋدەنتى. بەيبارىس 8-سىنىپتا وقيدى. ال ۇيدەگى ەڭ كىشىلەرى بەكسۇلتان 5 جاستا.
ءاۋ باستا ءوزى ءبىلىم العان وقۋ ورداسىندا وقىتۋشى بولىپ ەڭبەككە ارالاسقان ماقساتتىڭ شاكىرتتەرىن بۇگىندە ەلىمىزدىڭ تۇكپىر-تۇكپىرىنەن كەزدەستىرۋگە بولادى. ولاردىڭ دەنى شەكارا قىزمەتىندە. مايور حانىمنان ءدارىس العان ءالىمحان كارىمباەۆ دەگەن سارباز بۇگىندە رەسەيدىڭ سانكت-پەتەربۋرگ قالاسىنداعى بىرنەشە عاسىرلىق تاريحى بار اسكەري-مەديتسينالىق اكادەميانىڭ ەكىنشى كۋرسىندا وقيدى.
ءبىز مايور ماقسات تىلەۋعابىلوۆانى «مەديتسينا سالاسىنىڭ ۇزدىگى» اتانۋعا ابدەن لايىق دەپ بەكەر ايتىپ وتىرعان جوقپىز. كوكتەم مەن كۇز ايلارىندا جاستاردى اسكەرگە شاقىرۋ ناۋقانى باستالعان بويدا ماقسات باستاعان اسكەري مەديتسينا قىزمەتكەرلەرىنىڭ تولاسسىز جۇمىسى قىزا تۇسەدى. بۇعان ەل شەبىندەگى شەكارا بولىمشەلەرىن قوسىڭىز. البەتتە, شەكارا شەبىن كىرپىك قاقپاي كۇزەتەتىن اسكەري قىزمەتشىلەر تەمىردەن جارالماعان. ولار دا اياق استى اۋىرىپ قالۋى مۇمكىن. وسىندايدا, ءبىرىنشى بولىپ شەشىم قابىلدايتىن ماقسات سەرىكبايقىزى. سارباز شەكارا باسقارماسىنىڭ مەديتسينالىق لازارەتىنە جەتكىزىلىپ, ءتيىستى ەم-دومىن قابىلداۋعا كىرىسكەنگە دەيىن دامىل تاپپايدى. جاعدايدى ءوزىنىڭ باقىلاۋىندا ۇستاپ وتىرادى. «بوساڭسۋ – بىزگە جات» دەيتىنى سوندىقتان.
الماتى
