فورۋم بارىسىندا Nazarbayev University وقۋ ءىسى جونىندەگى ۆيتسە-پروۆوستى لورەتتا و’دوننەلل ۋنيۆەرسيتەت قاۋىمداستىعىنىڭ ايەلدەر كاسىپكەرلىگىن قولداۋ تاجىريبەسى جانە NU بۇۇ-دىڭ تۇراقتى دامۋ ماقساتتارىنا قول جەتكىزۋدەگى مىندەتتەمەسى, ونىڭ بەسىنشىسى – گەندەرلىك تەڭدىك ماقساتى بويىنشا قازاقستاننىڭ سالىستىرمالى تۇردە جاقسى كورسەتكىشكە يە ەكەنىن اتاپ ءوتتى.
«گەندەرلىك تەڭدىك بارىمىزگە وتە ماڭىزدى. NU-دا cتۋدەنتتەردىڭ 50 پايىزى – قىزدار. مۇعالىمدەر اراسىندا نازىك جاندىلاردىڭ قاتارى 50 پايىزعا جەتپەيدى. بۇل ءۇشىن ءالى جۇمىس ىستەۋ قاجەت. بۇۇ-نىڭ مالىمەتى بويىنشا, ايەلدەر دۇنيە جۇزىندەگى جۇمىس ۋاقىتىمەن 70 پايىز ەڭبەك ەتىپ, الەمدىك تابىستىڭ تەك 10 پايىزىن عانا الادى ەكەن. سوندىقتان ەكونوميكالىق مۇمكىندىكتى كەڭەيتۋ كەرەك. سونداي-اق تۇرمىستىق زورلىق-زومبىلىق تۇرعىسىنان قاۋىپسىزدىك ماسەلەسى دە وزەكتى», دەدى ول.
ال ءماجىلىس دەپۋتاتى جۇلدىز سۇلەيمەنوۆا قازاق قىزدارىنىڭ ءبىلىمى مەن بەلسەندىلىگىن ەرەكشە ايتتى.
ساراپشىلار ەلىمىزدە ايەلدەردىڭ ەڭبەگى جەتكىلىكتى دەڭگەيدە باعالانبايتىنىن, ستاتيستيكا بويىنشا ولار وتباسى مەن ونىڭ مۇشەلەرىنە قىزمەت كورسەتۋگە ءۇش ەسە كوڭىل بولەتىنى تۋرالى ماعلۇمات جاريالاعان.
سونداي-اق جوعارىدا ايتىلعان ءۇش ۋنيۆەرسيتەت بىرلەسكەن «قازاقستاننىڭ جوعارى وقۋ ورىندارىنداعى گەندەرلىك ءبىلىم بەرۋدىڭ عىلىمي تۇجىرىمداماسى: تەوريالىق جانە ادىستەمەلىك نەگىزدەرى» اتتى اۋقىمدى عىلىمي جوباسى اياسىندا Nazarbayev University كىتاپحاناسى گەندەر بويىنشا ەلەكتروندى بيبليوگرافيالىق رەسۋرس ازىرلەگەن. وندا سەنىمدى دەرەككوزى عانا ەمەس, قازاق تىلىندە دە گەندەرلىك ستاتيستيكا بويىنشا اقپاراتتار قامتىلعان.
سونىمەن قاتار جوبا شەڭبەرىندە ءۇش جوعارى وقۋ ورنىنىڭ عالىمدارى گەندەرلىك اكادەميالىق پاندەردىڭ دەرەك قورىن قۇرۋدى, «الەۋمەتتانۋ جانە الەۋمەتتىك جۇمىس, ەكونوميكا, فيلولوگيالىق باعدار» اتتى جاڭا پانارالىق ءبىلىم بەرۋ ءمودۋلى مەن ەلىمىزدەگى گەندەرلىك ءبىلىم ماسەلەلەرى بويىنشا ەلەكتروندىق اقپارات كاتالوگىن دايىنداۋدى كوزدەپ وتىر.
