فوتو: gov.kz
پرەزيدەنت قاسىم-جومارت توقاەۆ ءوزىنىڭ ءار جولداۋىندا بۇل ماسەلەگە ەرەكشە ءمان بەرەدى. سايلاۋالدى باعدارلامالارىندا دا اتالعان تاقىرىپتى ءجيى كوتەرەدى. ماسەلەن, مەملەكەت باسشىسى 2019 جىلعى «بارشاعا ورتاق يگىلىك! ساباقتاستىق. ادىلدىك. ورلەۋ» سايلاۋالدى باعدارلاماسىندا: ء«بىز جەمقورلىقتىڭ ءتۇپ-تامىرى جويىلعانشا كۇرەسەمىز. جەمقورلىق مەملەكەت پەن قوعامنىڭ ىرگەسىن سوگىپ, ۇلتتىق قاۋىپسىزدىككە ۇلكەن قاۋىپ توندىرەدى, مەملەكەتتىڭ دامۋىنا توسقاۋىل قويادى», دەپ ايتقان ەدى. سول سياقتى 2022 جىلى «ادىلەتتى قازاقستان: ءبارىمىز جانە ارقايسىمىز ءۇشىن. قازىر جانە ءاردايىم» سايلاۋالدى باعدارلاماسىندا دا سىبايلاس جەمقورلىققا قارسى ىمىراسىز كۇرەس جالعاستىرىلا بەرەتىندىگىن مالىمدەدى. مۇددەلى مەملەكەتتىك ورگانداردىڭ وسى ماڭىزدى مىندەتتى ورىنداۋعا باعىتتالعان جۇمىسىنىڭ ناتيجەلىلىگى جىلدان-جىلعا ءبىرشاما ارتا تۇسكەنى كوڭىلگە ءۇمىت ۇيالاتادى.
باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ مالىمەتىنشە وتكەن جىلى ەلىمىزدە 1461 جەمقورلىق قىلمىس تىركەلگەن ەكەن. بۇل الدىڭعى جىلمەن (1530) سالىستىرعاندا 4,5 پايىز از. دەرەكتەر استانا مەن 4 وڭىردە بۇل ىندەت ودان ءارى ۇدەي تۇسكەنىن كورسەتىپ وتىر. استانا قالاسىندا 2022 جىلى 152 جەمقورلىق قۇقىق بۇزۋشىلىق اشكەرەلەنگەن. ال وتكەن جىلى ونىڭ سانى 196-عا جەتىپتى. قوستاناي وبلىسىندا 78-دەن 97-گە دەيىن, پاۆلودار وبلىسىندا 43-تەن 47-گە دەيىن, ۇلىتاۋ وبلىسىندا 14-تەن 41-گە دەيىن, اباي وبلىسىندا 8-دەن 31-گە دەيىن ۇلعايعاندىعى دا كوڭىل كونشىتەدى. بۇل فاكتىلەر ەلىمىزدە جەمقورلىق دەندەپ بارا جاتقانىن كورسەتىپ وتىر.
مەنىڭشە, بۇل جات ادەتكە قارسى يممۋنيتەتتى مەكتەپ جاسىنان قالىپتاستىرۋ كەرەك. جاستايىنان ادىلەتتىلىك, ىزگىلىك, ءتارتىپ دەگەندى تولىعىمەن ۇعىنعان بالا ەسەيە كەلە مۇنداي ابەستىككە بارۋعا ءسال دە بولسا ويلانار ەدى. قازىر ەلدەگى 90-نان استام ۋنيۆەرسيتەتتە «سىبايلاس جەمقورلىققا قارسى مادەنيەت نەگىزدەرى» اتتى ءپان جۇرگىزىلەتىنى بەلگىلى. وسىنداي پاندەردى مەكتەپ قابىرعاسىنان باستاپ ەنگىزۋدى قولعا الۋ كەرەك. مەملەكەت باسشىسى قول قويعان 2022-2026 جىلدارعا ارنالعان سىبايلاس جەمقورلىققا قارسى تۇجىرىمدامانى جۇزەگە اسىرۋدىڭ قادامدارىن ءتۇسىندىرىپ, مەملەكەت تاراپىنان اتقارىلىپ جاتقان شارالار تۋرالى اقپاراتتاندىرۋ ماڭىزدى. زاڭدى قاتايتقانمەن, ادامنىڭ ساناسى تۇزەلمەسە, ەشتەڭە وزگەرمەيدى. سوندىقتان, ەڭ الدىمەن, حالىقتىڭ ساناسىن وياتۋعا جۇمىس ىستەۋ كەرەك.
ايدىن ادەنوۆ,
قازاقستان رەسپۋبليكاسىنىڭ سوت اكىمشىلىگى اسكەري سوتى دەپارتامەنتىنىڭ
ىشكى قاۋىپسىزدىك ءبولىمىنىڭ باس مامانى
