«قازاق ميفتەرى مەن ەرتەگىلەرىنىڭ جەلىسىندە بالالار سپەكتاكلىن قويۋعا دايىندالىپ جاتقانىمىزدا باقىت قايىربەكوۆ ءتۇرلى اۋىرتپاشىلىق پەن تاعدىر تالايىنا قاراماستان بارلىق كەدەرگىنى ەڭسەرە بىلگەن شۇيگىن ءشوپ ەلىنىڭ وت حانشايىمى تۋرالى سيۋجەتتى قىسقا-نۇسقا بايانداپ بەرگەن بولاتىن. وسى ءاپسانانىڭ ءوزى حالقىمىزدىڭ بويىنداعى ومىرلىك كۇش-قۋاتىن اڭعارتسا كەرەك», دەيدى قويۋشى رەجيسسەر مۋكارام اۆاحري.
بالەت شۇيگىن ءشوپ ەلىندە بولعان وقيعانى سۋرەتتەيدى. مەرگەن ەسىمدى جاس جىگىت پەن وت حانشايىمى جانە ونىڭ اتا-اناسى – كۇن قۇدايى كۇنسۇلۋ مەن ءتاڭىر بىرلەسىپ جۇمىر جەردى توپان سۋ مەن ماڭگىلىك ايازدان, اجداھا جۇتتىڭ قاھارىنان قۇتقارىپ قالادى. كەز كەلگەن ەرتەگىدەگى سياقتى مۇندا دا جاقسىلىق ز ۇلىمدىقتى جەڭىپ, كورەرمەن قاۋىمعا ىزگىلىك پەن عاجايىپقا تولى الەمدى پاش ەتەدى.
«وت قىز» – كومپوزيتور كارينا ابدۋللينانىڭ تەاترىمىزدا ساحنالانعان ەكىنشى تۋىندىسى. بۇل جولى وعان ۇلكەن جاۋاپكەرشىلىك جۇكتەلدى. سەبەبى بولمىسى سان قىرلى كەيىپكەرلەردىڭ عانا ەمەس, قويىلىم تاقىرىبىن اشا تۇسەتىن پارتيتۋرا شىعارۋى كەرەك بولاتىن. بالەت مۋزىكاسى, راسىندا دا, وتە اسەرلى بولدى. ىرعاعى ەرەكشە, ۇلتتىق ناقىشتاعى اۋەندەرى قۇلاققا جاعىمدى ءارى بىردەن جادىڭدا جاتتالىپ قالادى», دەيدى تەاتردىڭ كوركەمدىك جەتەكشىسى نۇرلان كانەتوۆ.
بالەتتە وت قىزدى – دارينا قايراشەۆا, مەرگەندى – ەرقانات ەرماعامبەت, مەرگەن سۋىردى – ارتەمي سەيالوۆ, داۋىلدى – ۋەسلي كارۆالو, ايدى – ريزا قاناتقىزى, كۇنسۇلۋدى ايگەرىم كەلەمەدەنوۆا باستاعان اكتەرلەر ءانسامبلى جوعارى دارەجەدە ورىنداپ شىقتى.
سونىمەن قاتار ايتۋلى قويىلىمنىڭ ستسەنوگرافياسى دا اسەمدىگىمەن كوز تارتادى. زاماناۋي, ءتۇرلى تەحنيكالىق جانە مۋلتيمەديالىق شەشىمى دە قىزىقتى, ال كوستيۋمدەرى كوركەمدىگىمەن كوڭىل باۋرايدى. تۋىندىنىڭ تاعى ءبىر ماڭىزدى ەرەكشەلىگى – حورەوگرافياسى. كوپشىلىك ساحنالار مەن دۋەتتەردە مۋكارام ءاۆاحريدىڭ تابىستى ىزدەنىمپازدىعى اڭعارىلدى. ءبىر قاراعاندا قاراپايىم كورىنەتىن قيمىلدار ءار كەيىپكەردىڭ كوركەم بەينەسىن اشا تۇسكەنى ءسوزسىز.
