«Jastar Talks» – 2020 جىلى ىسكە قوسىلعان جوبا. العاش قالا اكىمىمەن كەزدەسۋدەن باستالعان الاڭ بۇگىندە ەلورداداعى جاستار مادەنيەتى مەن ءومىرىن جاقسارتۋعا قاتىستى ساۋالداردى تالقىلايتىن, يدەيا ۇسىناتىن ورتاعا اينالعان.
– ءبىزدىڭ كوزدەگەن ماقساتىمىز – جاستاردىڭ جەكە جانە الەۋمەتتىك دامۋىنا ىقپال ەتۋ, ولاردىڭ بوس ۋاقىتىن ۇيىمداستىرۋ, شىعارماشىلىق تۇردە ءوزىن دامىتۋى ءۇشىن جاعداي جاساۋ. كەزدەسۋگە جاستاردى ىنتالاندىراتىنداي, ءوز سالالارىندا بەلگىلى ءبىر تاجىريبەسى بار سپورتشىلار, بلوگەرلەر, مەديا تۇلعالار جانە تاعى باسقالاردى تارتامىز. ءبىرى وزىنە دەگەن سەنىمسىزدىكتى قالاي جەڭگەنىن ايتسا, ەندى ءبىرى ماماندىق تاڭداۋ سىندى وزگە دە تۇيتكىلدى ماسەلەلەرگە توقتالادى, – دەدى «استانا جاستارى» جاستار رەسۋرستىق ورتالىعى جاستار باستامالارىن قولداۋ ءبولىمىنىڭ مامانى ايسۇلۋ قايىر.
جىل باسىنان بەرى جاستارعا ارنالعان پلاتفورمادا التى كەزدەسۋ وتكەن. سپيكەر رەتىندە مما بويىنشا الەم چەمپيونى امانجول وتەۋوۆ پەن مما بويىنشا قازاقستان چەمپيونى رۋسلان شانوسوۆ, شورت-ترەكتەن حالىقارالىق دارەجەدەگى سپورت شەبەرى ابزال اجعاليەۆ, 24KZ ارناسىنىڭ جۇرگىزۋشىسى, «President» ارنايى جوباسىنىڭ اۆتورى جانە جۇرگىزۋشىسى ءادىل بالتاباەۆ پەن حابار تەلەارناسىنىڭ ءجۋرناليسى, بلوگەر ءمولدىر دوسپاەۆا ارنايى شاقىرىلىپتى. تاياۋدا عانا بوكستان جاستار حالىقارالىق دارەجەدەگى سپورت شەبەرى جانە جاتتىقتىرۋشى مۇحيت امانتاەۆپەن جۇزدەسكەن. سپورتشى ءوز تاجىريبەسىمەن ءبولىسىپ, جاس بۋىن الدىندا ماماندىق تاڭداۋدىڭ ماڭىزىنا توقتالدى.
– ءار ماماندىقتىڭ ءوز ەرەكشەلىگى بولادى. كەي جاسوسپىرىمدەر وتباسىنداعى اتا-انالارىنا, اعا-اپكەلەرىنە قىزىعىپ, دارىگەر, قۇقىق قورعاۋ ورگاندارىنىڭ قىزمەتكەرى, سپورت شەبەرى بولىپ جاتادى. دەسەك تە, ەڭ الدىمەن, بەلگىلى ءبىر كاسىپتى مەڭگەرەر الدىندا «بۇل مەنىڭ قولىمنان كەلە مە؟» دەگەن ساۋال قويىڭىز. سالالاردىڭ قايسىسى جانعا جاقىن, ال قايسى سالادا جۇمىس ىستەگىڭىز كەلمەيدى, وسىنى انىقتاپ الۋ كەرەك. ءتىپتى شەشىم قابىلداۋ قيىن بولسا, قازىر ينتەرنەتتە كاسىبي قابىلەتىڭىزدى انىقتاپ بەرەتىن نەشە ءتۇرلى تەست بار, وسى تەست كومەگىمەن قانداي قابىلەتىڭىزدىڭ جەتىك ەكەنىن انىقتاۋ قيىن ەمەس, – دەدى مۇحيت امانتاەۆ.
ۇيىمداستىرۋشىلاردىڭ سوزىنشە, بۇگىندە مۇنداي الاڭداردى ىزدەيتىن جاستاردىڭ قاتارى كوپ. ءبىر كەزدەسۋدىڭ وزىندە ورتاشا ەسەپپەن 50-دەن اسا ازامات قاتىسادى ەكەن.
