جاڭا ورتالىقتىڭ اشىلۋ راسىمىنە وبلىس اكىمى قۇمار اقساقالوۆ پەن «سامۇرىق-قازىنا» اق كورپوراتيۆتىك باسقارۋ, الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ قاتىستى.
مۇندا ءبىر جارىم جاستان ون سەگىز جاسقا دەيىنگى بالالاردىڭ اتا-انالارىنا دا كومەك كورسەتىلەدى. ءتۇرلى تەراپيا كابينەتى, سونداي-اق الەۋمەتتىك-تۇرمىستىق باعدارلاۋ, پسيحولوگ جانە دەفەكتولوگ كابينەتتەرى جۇمىس ىستەيدى.
«كوكتەمنىڭ العاشقى مەرەكەسى العىس كۇنى قارساڭىندا وبلىستا وسى ورتالىقتى اشۋ باستاماسى قولداۋ تاپتى. قالا ورتالىعىندا جەكە تۇرعان عيمارات تاڭدالدى, ونىڭ اۋدانى 2 355 شارشى مەتردى قۇرايدى. بۇل – رەسپۋبليكاداعى ەڭ ۇلكەن ورتالىقتاردىڭ ءبىرى. قايتا قۇرۋدى جۇرگىزۋ ءۇشىن وبلىستىق بيۋدجەتتەن 700 ملن تەڭگەگە جۋىق قاراجات ءبولىندى, شتات بىلىكتى ماماندارمەن جاساقتالدى. بۇل جەردە 100-دەن اسا مامان جۇمىس ىستەيدى. جالپى, وڭىرىمىزدە اۋتيزم دياگنوزى انىقتالعان 400-گە جۋىق بالا بولسا, سونىڭ 200-دەن استامى قوستاناي قالاسىندا تۇرىپ جاتىر. سول سەبەپتى اۋىلدىق جەرلەردە دە وسىنداي ورتالىق بولىمدەرىن اشۋعا سۇرانىس بار. الداعى ۋاقىتتا ءار اۋدان ورتالىعىنان اشامىز دەگەن جوسپارىمىز بار», دەدى اكىم.
عيبرات اۋعانوۆتىڭ ايتۋىنشا, اتالعان مەكەمە بالالاردىڭ ورتاعا بەيىمدەلۋىنە, وزدەرىنىڭ ەرەكشە قابىلەتتەرى مەن تالانتتارىن دامىتۋعا, بىلىكتى كومەك الۋعا مۇمكىندىك بەرەدى. ورتالىقتا بالالارعا عانا ەمەس اتا-انالارعا دا بالالاردى دامىتۋ مەن تاربيەلەۋدىڭ ءارتۇرلى ماسەلەسى بويىنشا قىزمەتتەر كورسەتىلەتىنىن اتاپ وتكەن ءجون.
قازىردىڭ وزىندە ورتالىققا 50 بالا تىركەلىپ, ارنايى الەۋمەتتىك قىزمەتتەر الا باستادى. جاڭا ورتالىقتا وقىتۋ باعدارلامالارى, ءارتۇرلى تەراپيا جانە وڭالتۋ ءادىسى بار.
بۇعان دەيىن قوردىڭ قولداۋىمەن رۋدنىيدا نەيرو-ورتوپەديالىق بۇزىلىستارى بار بالالارعا ارنالعان وڭالتۋ ورتالىعى اشىلعان. وعان 600 ەرەكشە بالا بارادى.
قوستاناي وبلىسى
