پرەزيدەنت اكىمشىلىگى, قازاقستان حالقى اسسامبلەياسى حاتشىلىعى جانە مادەنيەت جانە اقپارات مينيسترلىگى ۇيىمداستىرعان رەسپۋبليكالىق ءىس-شارادا قيلى زامان, كۇردەلى كەزەڭدە ەلىمىزگە قونىس تەپكەن ءتۇرلى ەتنوس وكىلىنىڭ ۇرپاعى تەلەكوپىر فورماتىندا قوناقجاي قازاق حالقىنا, جەرىنە العىسىن جەتكىزدى. جيىلعاندار يىق تىرەسە بىرگە ەڭسەرگەن ۋاقىتتى ەسكە الدى. ءىس-شاراعا قازاقستان حالقى اسسامبلەياسى توراعاسىنىڭ ورىنباسارى – پرەزيدەنت اكىمشىلىگى قازاقستان حالقى اسسامبلەياسى حاتشىلىعى مەڭگەرۋشىسى مارات ءازىلحانوۆ, مادەنيەت جانە اقپارات ۆيتسە-ءمينيسترى دانيار قادىروۆ, پارلامەنت دەپۋتاتتارى, قحا جاستارى جانە ەتنو-مادەني بىرلەستىك وكىلدەرى قاتىستى. اسسامبلەيا ۇزدىكتەرىنە «العىس» توسبەلگىسى تابىستالدى.
– ماقسات – ءارتۇرلى سالالاردا جانە كاسىپتەردە ادال قىزمەت ەتىپ, ازاماتتىق ەرلىك جاساپ, ەلدىڭ دامۋىنا ۇلەسىن قوسىپ جۇرگەن, سونداي-اق ءتۇرلى وقيعالار مەن جاعدايلار كەزىندە بەلسەندىلىك پەن ازاماتتىق ۇستانىمىن تانىتقان قازاقستاندىقتارعا العىس ايتۋ. اسسامبلەيا وڭىرلەردە, استانادا 250-دەن استام ءتۇرلى فورماتتا ءىس-شارا وتكىزىپ جاتىر. مۇنداعى باستى ماقسات – ادام مەن ادامدى, ۇلىس پەن ۇلىستى, ۇلت پەن ۇلتتى جاقىنداستىرۋ, باۋىرلىق سەزىمدى وياتۋ, جۇرەگىڭدەگى ءار ادامعا دەگەن ماحابباتىڭدى, جىلى سەزىمىڭدى ءبىلدىرۋ, سول ارقىلى الىستى جاقىنداۋ, جاقىندى تۋىستىرۋ, – دەدى مارات ءازىلحانوۆ.
مەرەكەلىك ءىس-شارادا استاناداعى كوپبالالى ەكى وتباسى كۇتپەگەن جەردەن قۋانىشقا كەنەلدى. قوس شاڭىراققا سول جاعالاۋدا ورنالاسقان سۋ جاڭا پاتەر كىلتى تابىستالدى. جاڭا قونىسقا يە بولعانداردىڭ ءبىرى – بەردياروۆتار وتباسى. وتاسقانىنا 18 جىل تولعان شاڭىراق سەگىز بالا تاربيەلەپ وتىر. ەكى كۇن بۇرىن كەنجەسى دۇنيەگە كەلگەن.
– جاتاقحانانىڭ اياداي بولمەسىن 8 جىل جالداپ تۇردىق. 18 شارشى مەتردە 5 جىل تۇرىپپىز. كەيىن وتباسىم ۇلكەيگەن سوڭ, ەكىنشى بولمەسىن الدىق. بىرەر كۇن بۇرىن سەگىزىنشى پەرزەنتىم دۇنيە ەسىگىن اشتى. ەسىمىن اتاسى شاحنازار دەپ قويدى. بۇل ۇلكەن ريزىق سول شاحنازارىمنىڭ نەسىبەسىمەن كەلىپ تۇر ەكەن. اللا رازى بولسىن, – دەيدى قالا تۇرعىنى داۋلەت بەردياروۆ.
قايىرىمدىلىقتىڭ شاپاعاتىن جالعىزباستى انا مەيرامگۇل شىڭعىسباەۆا دا كوردى. وعان دا مەرەكەدە 1 بولمەلى باسپانا بۇيىردى. كوپبالالى وتباسىنا باسپانا سىيلاپ قۋانتقان كاسىپكەر – قازاقستان حالقى اسسامبلەياسىنىڭ مۇشەسى ءارى اسسامبلەيا توراعاسىنىڭ ورىنباسارى اكبارجان يسمايلوۆ. «قازاق حالقىنا دەگەن العىس سوزبەن عانا ەمەس, ىسپەن دە كورسەتىلۋگە ءتيىس», دەيدى ول.
اسسامبلەيانىڭ «قايىرىمدىلىق كەرۋەنى» الەۋمەتتىك جوباسى بيىل وسىنداي يگى ىستەرمەن باستالدى. اكتسيا اياسىندا 9 جىل بويى بارلىق ايماقتا يگى ءىس-شارالار ۇيىمداستىرىلىپ كەلەدى. اشىپ ايتساق, ۇيىم مۇشەلەرى قارتتار مەن بالالار ۇيلەرىندە كونتسەرتتىك باعدارلامالار ۇيىمداستىرىپ, كوپبالالى جانە مۇقتاج وتباسىلارعا ازىق-ت ۇلىك سەبەتتەرىن تاراتادى. بىلتىردىڭ وزىندە ۇيىمنىڭ ۇيىتقى بولۋىمەن ەل بويىنشا باس-اياعى 1 ملرد 700 ملن تەڭگەگە ءتۇرلى قايىرىمدى ءىس جاسالىپتى. وعان قوسا مەرەكەلىك وتىرىستا ەتنوسارالىق بىرلىكتى نىعايتۋ ماقساتىندا «شاڭىراق» شىعارماشىلىق بايقاۋى ىسكە قوسىلعانىن جاريالادى.
