60-قا جۋىق ەتنوستى ءبىر ساحنادا توعىستىرعان ايتۋلى كەشتە 200-دەي ادام ونەر كورسەتتى. مۇندا وركەسترلەر, بي انسامبلدەرى جانە اسپاپتىق انسامبلدەر باس قوسقان. ۇجىمنىڭ قۇرامىنا ەلىمىزدە تۇراتىن ەتنوس وكىلدەرىنىڭ اراسىنان ۇزدىك 20 ءبيشى مەن مۋزىكانت ارنايى كاستينگ ارقىلى تاڭدالىپتى. ولاردىڭ ەرەكشە ءارى ەكسكليۋزيۆتى بي كومپوزيتسيالارىن قويۋعا رەسەي, تاتارستان, وزبەكستاننان شاقىرىلعان كورنەكتى شەتەلدىك ماماندار جانە قازاقستاننىڭ ەڭبەك سىڭىرگەن قايراتكەرلەرى اتسالىسقان. قاتارىندا وزبەكستاننىڭ ەڭبەك سىڭىرگەن قايراتكەرلەرى ەۆەلينا پروتاسوۆا, وديلبەك وريپوۆ, رەسەيدىڭ ەڭبەك سىڭىرگەن ءارتىسى, رەسەيدىڭ ەڭبەك سىڭىرگەن ونەر قايراتكەرى, ومبى مەملەكەتتىك ورىس حالىق حورىنىڭ باس بالەتمەيستەرى زۋفار تولبەەۆ, تاتارستاننىڭ حالىق ءارتىسى, تاتارستاننىڭ مەملەكەتتىك ءان-بي ءانسامبلىنىڭ پەداگوگ-حورەوگرافى ليايسان حامەتوۆا بار. دايىندىقتى حورەوگرافتار انەل ماراباەۆا, ايدا بەكيشوۆا, بالەتمەيستەر جاڭاتاي قوجابەكوۆ پەن تۇساۋكەسەر-كونتسەرتتىڭ رەجيسسەرى سايان مىرزا جۇرگىزگەن.
– ىرىكتەدىك, اراسىندا قابىلەتى بارىن الدىق. بۇل ءانسامبلدىڭ قۇرامىنداعى بيشىلەر قازاقستاننىڭ ءار وڭىرىنەن كەلدى. سونىڭ ىشىندە گرۋزين, ورىس, قازاق, تاتار, ۇلت وكىلدەرىنەن قۇرالعان ونەرپازدار بار. دايىندىعىمىز ءبىر اي بولدى. بۇل – وتە از ۋاقىت. سوعان قاراماي, وسى كونتسەرتتى وتكىزۋگە تىرىستىق. ءانسامبلدىڭ ماقساتى – ەلىمىزدە تۇراتىن ءتۇرلى ەتنوس وكىلدەرىنىڭ تاتۋ-ءتاتتى, بىرلىكتە ءومىر ءسۇرىپ جاتقاندىعىن كورسەتۋ. ونەردە باس بىرىكتىرۋ. شەتەلدەردەن شاقىرىلعان بالەتمەيستەرلار وتە جوعارى دەڭگەيدە بي قويىلىمدارىن قويا ءبىلدى, – دەدى حورەوگراف جاڭاتاي قوجابەكوۆ.
بەيبىتشىلىك جانە كەلىسىم سارايىنا تۇساۋكەسەر كونتسەرتتى كورۋگە جينالعان حالىقتىڭ قاراسى قالىڭ بولدى. ونەرپازدارمەن بىرگە ولار دا ەل اۋزىنداعى ەستى اندەردى شىرقاپ, بي بيلەدى. وسىلايشا, انسامبل مۇشەلەرىنىڭ عانا ەمەس, تۇرعىنداردىڭ دا بىرلىگى بەكەم ەكەنىن كورسەتتى. جوبانىڭ رەجيسسەرى, ۇيىمداستىرۋشىسى قارلىعاش اجيەۆا قىسقا عانا ۋاقىتتا وتە قاجەت جانە تاماشا جاستار ۇجىمىن قۇردىق دەپ وتىر.
– «Birlik» ءانسامبلىنىڭ ەرەكشەلىگى ەلىمىزدە تۇراتىن ەتنوس وكىلدەرىنىڭ ارتىستەرىنەن جاساقتالىپ وتىر. وتانىمىزداعى ءار حالىقتىڭ ونەرى مەن مادەنيەتىن, فولكلورىن, ءتىپتى ۇمىتۋعا اينالىپ بارا جاتقان قۇندىلىقتارىن كورسەتۋدى كوزدەدىك. ۇجىمنىڭ بىرەگەي رەپەرتۋارى ەلىمىزدەگى 130 ەتنوستىڭ مۋزىكالىق مۇراسى مەن ونەرىن قامتيدى. ولاردىڭ ارقايسىسىنىڭ ءانى مەن بيىنەن بولەك اسپاپتارى – ءوز الدىنا ءبىر توبە. وعان قوسا ەلىمىزدەگى ەتنوستاردان قۇرالعان انسامبل ارقىلى رۋحاني تۇتاستىقتى ايگىلەگىمىز كەلەدى, – دەدى قارلىعاش اجيەۆا.
جاندى اسپاپتىق سۇيەمەلدەۋمەن الەم حالىقتارىنىڭ بيلەرىن كاسىبي دەڭگەيدە ورىنداۋشىلاردى تاماشالاۋعا مادەنيەت جانە اقپارات ءمينيسترى ايدا بالاەۆا, سەنات جانە ءماجىلىس دەپۋتاتتارى, ديپلوماتيالىق كورپۋس, قازاقستان حالقى اسسامبلەياسى مەن ەتنومادەني بىرلەستىكتەردىڭ وكىلدەرى قاتىستى. سونداي-اق دۋماندى كەشكە شەتەل ەلشىلەرى دە كەلىپ, اسەرلەرىمەن ءبولىستى.
– وزگە ەلدەردىڭ مادەنيەتىنە دەگەن شەكسىز قۇرمەتتى كورىپ, قازاق حالقىنىڭ تەكتىلىگىنە تاعى ءبىر مارتە قايران قالىپ تۇرمىن. ونەردە شەكارا جوق. ول دوستىقتى بەكىتە تۇسەتىن التىن كوپىر ىسپەتتى. ونىڭ ناق دالەلىن «Birlik» ءانسامبلى پاش ەتتى. ونەرپازدارعا مەن قاتتى ءتانتى بولدىم, – دەدى ەو وكىلدىگىنىڭ قازاقستانداعى توراعاسى كياستۋتيس يانكاۋسكاس.
كەشتەگى قۇرمەتتى قوناقتىڭ ءبىرى – بەلارۋس ەلشىسى پاۆەل ۋتيۋپين. انسامبل قۇرامىندا شەتەل ساياساتكەرىنىڭ قىزى دا ونەر كورسەتتى. ولار ۇلتىنىڭ مادەني كودىن ساقتاۋعا اتسالىسىپ, قوعامعا قىزمەت ەتۋگە مۇمكىندىك بەرگەنى ءۇشىن حالقىمىزعا العىسىن جاۋدىردى.
– بارشا قازاقستاندىقتاردى العىس ايتۋ كۇنىمەن قۇتتىقتايمىن. بۇل – 120-دان استام ەتنوستى بىرىكتىرەتىن مەرەكە. سوڭعى حالىق ساناعى بويىنشا بەلارۋستار قازاقستانداعى ۇلتتار اراسىندا ون ءبىرىنشى ورىندا تۇرعانىن كوردىم. تاۋەلسىز قازاقستاندا تۇرىپ, ەلدى دامىتۋعا ۇلەس قوسىپ جاتقان ەتنوستاردىڭ ىشىندە بەلارۋستار دا بار ەكەنىن ماقتان ەتەمىن. سوندىقتان بەلارۋستار وركەندەگەن تاۋەلسىز قازاقستاننىڭ دامۋىنا ءوز ۇلەستەرىن قوسىپ جاتقانىنا قۋانامىز. سوندىقتان قازاقستاندىقتارعا بەيبىتشىلىك, جاقسىلىق تىلەيمىن. كەش جوعارى دەڭگەيدە ءوتتى. بۇل ەلدىڭ تىنىس-تىرشىلىگىن انىق كورسەتە ءبىلدى. قىزىم دا ونەر كورسەتىپ, ماڭىزدى ءىس-شارادا بەلارۋس مادەنيەتىمەن ءبولىستى, – دەدى بەلارۋستىڭ قازاقستانداعى توتەنشە جانە وكىلەتتى ەلشىسى پاۆەل ۋتيۋپين.
ال كانادانىڭ قازاقستانداعى توتەنشە جانە وكىلەتتى ەلشىسى الان حەمسون العىس ايتۋ كۇنىنە ارنالعان كونتسەرتكە العاش رەت قاتىسقانىن جاسىرمادى.
– كونتسەرت وتە قىزىقتى ءوتتى. ءتۇرلى ەتنوس ونەرپازدارىنىڭ ونەرلەرىن كوردىك. مەنىڭ اتا-انام مۋزىكانتتار. سودان بولار, وزگە حالىقتاردىڭ شىعارماشىلىعىمەن تانىسقان ۇنايدى. كانادادا العىس ايتۋ كۇنى بار. ورتاعا, قايىرىمدى جاندارعا, جالپى بۇكىل جاقسىلىقتىڭ باستاۋىنا العىس ايتامىز. قازاقستاندا مۋلتيمادەنيەتتى كورسەتە الاتىن كۇننىڭ بارى قانداي كەرەمەت, – دەدى الان حەمسون.
كونتسەرت كوپتىڭ قۇرمەتىمەن «جولىمىز ءبىر» انىمەن قورىتىندىلاندى. وسىلايشا, «Birlik» ءانسامبلى ءبىر تۋدىڭ استىنا بىرىككەن جولىمىزدىڭ ەشقاشان ايىرىلمايتىنىن مەڭزەدى.
