فوتو: استانا قالالىق پد ءباسپاسوز قىزمەتى
31 جاستاعى رەسەي ازاماتى اسا ءىرى كولەمدە ەسىرتكى زاتتارىن وندىرگەنى, سونداي-اق اقپاراتتىق-تەلەكوممۋنيكاتسيالىق جەلىلەردى پايدالانا وتىرىپ ساتقانى ءۇشىن ىزدەۋدە جۇرگەنى انىقتالدى.
ول 2019 جىلدىڭ سوڭىنان باستاپ رەسەيلىك ەڭ ءىرى «Hydra» داركنەت-ماركەتىنىڭ ينتەرنەت-پلاتفورماسىندا «Mr.SANDERS» دەگەن اتپەن ەسىرتكى ساتاتىن دۇكەن قۇرعان. ءسويتىپ ەسىرتكىنى جاسىرىن ورىندار ارقىلى تاراتىپ وتىرعان. وعان قوسا, ومبى وبلىسىندا جالدامالى پاتەرلەردە مەفەدرون ەسىرتكى زاتىن جاپپاي وندىرگەن.
ەسىرتكى ساتۋشى ءوزى جاساعان ءدارىحانانىڭ تەرەزەسىنە جاسىرىناتىن ورىنداردىڭ سيپاتتاماسىن جۇكتەپ سالعان.
«سينتەتيكا» ساتىپ الۋشىلار تولەمدەردى «Hydra» شوتىنا اۋدارۋ ارقىلى جۇزەگە اسىرعان. سودان كەيىن قاراجات اۆتوماتتى تۇردە «Mr.SANDERS» دۇكەنىنە تيەسىلى كريپتوۆاليۋتا بيرجاسىنىڭ ءاميانىنا اۋدارىلعان.
ۇستالعان ازاماتقا رەسەي فەدەراتسياسى قك-ءنىڭ 228-بابىنا سايكەس اسا ءىرى كولەمدە ەسىرتكىنى زاڭسىز ءوندىرۋ جانە ساتۋ بويىنشا ايىپ تاعىلىپ وتىر. اتالعان ازاماتتى حالىقارالىق ىزدەۋگە رەسەيدىڭ ومبى وبلىسى ءىىمب جاريالاعان. قازىرگى ۋاقىتتا ايىپتالۋشى ۋاقىتشا ۇستاۋ يزولياتورىنا قامالدى, ەكستراديتسيالاۋ ماسەلەسى شەشىلىپ جاتىر.
