ءماجىلىس سپيكەرى, «Amanat» توراعاسى ەرلان قوشانوۆ اۋىلدى دامىتۋ ماسەلەسى مەملەكەت باسشىسىنىڭ ەرەكشە باقىلاۋىندا ەكەنىن اتاپ ءوتتى. وسى ورايدا, پارتيا قوعامدا كەڭ قولداۋ تاپقان «اۋىل اماناتى» جانە «جەر اماناتى» سىندى ەكى جوبا ازىرلەدى. «اۋىل اماناتى» – اۋىلدى دامىتۋدىڭ جاڭا درايۆەرى. جالپى العاندا, 2029 جىلعا قاراي جوبا اياسىندا 1 ملن اۋىل تۇرعىنىن قامتىپ, 350 مىڭ جاڭا جۇمىس ورنىن اشۋ جوسپارلانىپ وتىر. العاش رەت ەل تاريحىندا اتالعان ماقساتقا 1 تريلليون تەڭگە كولەمىندە قوماقتى قاراجات ءبولىندى.
«اۋىل اماناتى» – پرەزيدەنتتىڭ سايلاۋالدى باعدارلاماسىنا ەنگىزىلگەن بىرەگەي جوبا. جوبادا اۋىل تۇرعىندارىنىڭ تۇرمىسىن جاقسارتۋدىڭ ناقتى ءارى تۇسىنىكتى تەتىكتەرى قاراستىرىلعان. ەڭ باستىسى, قاراجاتى تولىق شەشىلگەن. ءبىر جىلدىڭ ىشىندە جوبانىڭ تيىمدىلىگىن كورىپ وتىرمىز. بارلىق مەملەكەتتىك ورگان مەن اكىمدىك «اۋىل اماناتى» جوباسىن ساپالى جۇزەگە اسىرۋعا ءتيىس. نەگىزگى مىندەت تە وسى بولۋى كەرەك», دەدى ول.
پرەمەر-ءمينيستردىڭ ورىنباسارى تامارا دۇيسەنوۆا «اۋىل اماناتى» جوباسى اياسىندا جۇمىسپەن قامتىلعان ازاماتتار سانىن ارتتىرۋعا ارنالعان ناقتى جوسپارمەن ءبولىستى. ال اۋىل شارۋاشىلىعى ءمينيسترى ايداربەك ساپاروۆ فراكتسيا مۇشەلەرىن جوبانىڭ نەگىزگى كورسەتكىشتەرى تۋرالى حاباردار ەتتى. وتىرىس بارىسىندا بەينەكونفەرەنتسيا رەجىمىندە بىرقاتار ءوڭىردىڭ وكىلدەرى ءسوز الىپ, جوبانى جەرگىلىكتى جەردە جۇزەگە اسىرۋ ماسەلەسىنە قاتىستى پىكىر ءبىلدىردى.
تالقىلاۋ بارىسىندا ءماجىلىس سپيكەرى وڭىرلەر اراسىنداعى قارجىلىق تەڭگەرىمسىزدىككە نازار اۋداردى. بىلتىر جالپى نەسيە سوماسىنىڭ 43,9 ملرد تەڭگەسى جامبىل جانە تۇركىستان وبلىستارىنا بەرىلدى. الايدا نەبارى 1 ميلليارد تەڭگە العان ايماقتار دا بار. سونداي-اق ەرلان قوشانوۆ ۇكىمەت ءىرى اۋىل شارۋاشىلىعى كووپەراتيۆتەرىن قۇرۋعا ءتيىستى كوڭىل بولمەيتىنىن اتاپ ءوتتى. پارتيا جانىنداعى جوبالىق كەڭسە بىلتىر اۋىل شارۋاشىلىعىنداعى جەكەلەگەن سالالاردىڭ ەكونوميكالىق باعدارى مەن دامۋ الەۋەتىن انىقتاۋ ءۇشىن 166 اۋداندا, 16 شاعىن قالا مەن 2 260 اۋىلدىق وكرۋگتە سكرينينگ جۇرگىزگەنىن ەسكە سالدى.
«بولاشاقتا بارلىق كەم-كەتىكتى ەسكەرۋ قاجەت. جوسپارلانعان كورسەتكىشتەرگە قول جەتكىزۋ ءۇشىن الداعى كەزەڭدە كەمىندە جىل سايىن 50 مىڭ جۇمىس ورنىن اشىپ وتىرۋعا ءتيىسپىز. قاعاز بەتىندەگى ادەمى تسيفرلاردىڭ قاجەتى جوق دەپ سانايمىن. باستىسى – جۇمىسسىز اۋىل تۇرعىندارىن تۇراقتى ەڭبەكپەن قامتۋ», دەدى ەرلان قوشانوۆ.
جيىندى قورىتىندىلاعان پارتيا توراعاسى جوبا اياسىندا نەسيە بەرۋدى تسيفرلاندىرۋ ۇدەرىسىن جەدەلدەتۋدى, مال ساتىپ الۋ جانە تەحنيكامەن قامتاماسىز ەتۋ ماسەلەلەرىن پىسىقتاۋدى, ستاتيستيكا دەرەكتەرىن بىرىڭعاي ستاندارتقا كەلتىرۋدى, سونداي-اق اۋقىمدى ءتۇسىندىرۋ جۇمىسىن جۇرگىزۋدى تاپسىردى. «اۋىل اماناتى» جوباسىن جۇزەگە اسىرۋ بارىسى پارتيا فراكتسياسىنىڭ ەرەكشە باقىلاۋىندا بولادى.
ءىس-شارا اياسىندا اۋىل شارۋاشىلىعى مينيسترلىگى ازىرلەگەن «اۋىل اماناتى» اقپاراتتىق جۇيەسى تانىستىرىلدى. پلاتفورما «اۋىل اماناتى» باعدارلاماسىنا ونلاين رەجىمدە ءوتىنىش بەرۋگە جانە ول ءوتىنىشتىڭ جاي-كۇيىن باقىلاۋعا مۇمكىندىك بەرەدى. بۇگىندە پلاتفورما قاناتقاقتى رەجىمدە جۇمىس ىستەيدى. بيىل شىلدەدە پلاتفورما تولىق ىسكە قوسىلادى. سونداي-اق فراكتسيا مۇشەلەرى «اۋىل اماناتى» جوباسى اياسىندا وندىرىلگەن اۋىل شارۋاشىلىعى ونىمدەرىمەن تانىستى.
