الەمنىڭ شاڭعىشى جۋرناليستەرى الماتىعا جينالادى

بۇگىندە 31 ەلدىڭ 3 مىڭنان استام شاڭعىشى ءجۋرناليسى مۇشەسى سانالاتىن  SCIJ (The Ski Club of International Journalists) كلۋبىنىڭ نەگىزى 1955 جىلى قالانعان.  وسى جىلى  فرانتسۋز  جيل دە لا روك  جۋرناليستەر مەن سپورتشىلار اراسىنداعى ساياسي قاقتىعىستاردىڭ  ۋشىقتىرماۋ ماقساتىندا وسى كلۋبتى قۇرادى. داستۇرگە اينالعان كلۋبتىڭ جىل سايىنعى وتىرىسى الەمنىڭ  تاۋ شاڭعى كۋرورتتى ايماقتارىندا  ۇيىمداستىرىلىپ  ءجۇر. دۇنيە ءجۇزىنىڭ 70-تەن استام تاۋلى كۋرورتتى كەشەنىندە  وتكىزىلگەن وتىرىس بيىل «شىمبۇلاق» تاۋ شاڭعى كۋرورتىندا بولادى.  بۇعان دەيىن   يسپانيانىڭ  «Baqueira-Beret», يتاليانىڭ  ««Sestriere», فرانتسيانىڭ  «Val Cenis Vanoise  Val d’Arly», رەسەيدىڭ  «روزا حۋتور» ءھام  بولگاريانىڭ «پامپوروۆو» سىندى كۋرورتتى كەشەنىندە ءوتتى. بىلتىر  الەمنىڭ شاڭعىشى جۋرناليستەرى  كانادانىڭ ايگىلى «Marble Mountain»  كۋرورتتى كەشىندە توقايلاسقان ەدى.

«بۇل شارا بىزگە پايدالى ما؟ پايدالى بولعاندا قانداي,  ىشكى تۋريزمدە تۇمەن  جۇرتتىڭ الدىندا  ءسان-سالتاناتىن كەلىستىرە ناسيحاتتاپ ءدۇيىم جۇرتقا پاش ەتۋدىڭ تاپتىرماس  مۇمكىندىگى.  الەمنىڭ ءار قيىرىنان كەلەتىن 100-دەن اسا جۋرناليست تەك وتىرىسقا قاتىسىپ قانا قويماي,  قازاقستاننىڭ كورىكتى مەكەنى, جاۋھارى سانالاتىن  «شىمبۇلاق» تاۋ شاڭعى كۋرورتى تۋرالى,  ەلىمىزدىڭ مادەنيەتى مەن ۇلتتىق  بولمىسى  جايىندا  ءوز  ەلىنە بارعاندا ايتادى, جازا جۇرەدى. مۇنىڭ بارلىعى دا ءتۋريزمنىڭ تامىرىنا قان جۇگىرتەرى ءسوزسىز.  ءبىزدىڭ شاڭعىشى جۋرناليستەردىڭ  كلۋبى    SCIJ  ۇيىمىنا 2013 جىلى قابىلداندى. ال ەلىمىزدە وتىرىستى وتكىزۋ قۇقىعىن 2020 جىلى يەلەندىك. بىراق پاندەمياعا قاتىستى  شەگەرىلىپ, بيىلعى جىلعا بەكىتىلىپ وتىر. بۇگىنگى تاڭدا ءبىزدىڭ  شاڭعىشى جۋرناليستەر  كلۋبىنا 45 باق وكىلى مۇشە.   

وتىرىس اياسىندا ەلىمىزدىڭ  ءتۋريزمىن دامىتۋ جايى دا قوزعالادى. 6 ناۋرىزدا «شىمبۇلاق» تاۋ شاڭعى كۋرورتىندا   شاڭعىشى جۋرناليستەر دوداعا تۇسەدى. ال 9 ناۋرىز كۇنى تالعارداعى  «الاتاۋ» بياتلون كەشەنىندە شاڭعىمەن جۇگىرۋدەن باعىن سىنايدى.  شاڭعىشى جۋرناليستەردىڭ بەيرەسمي الەم چەمپيوناتى دەپ تە ايتىلاتىن  ايتۋلى الامانعا  دۇنيەنىڭ ءتورت تارابىنان تاڭداۋلى ارىپتەستەرىمىز  قاتىسادى. ەلىمىزدىڭ اتىنان سىنعا تۇسەتىن شاڭعىشى-جۋرناليستەرىمىز دە دايىندىقتى ۇدەتىپ كەلەدى», دەدى SCIJ قازاقستان كلۋبىنىڭ  پرەزيدەنتى يرينا باجەنوۆا.