باسقوسۋدا سەنات توراعاسى قازىرگى قوعامدى قالىپتاستىرۋدىڭ جانە ۇلتتىق قۇندىلىقتاردى دارىپتەۋدىڭ نەگىزگى فاكتورى ءبىلىم بەرۋ, عىلىم جانە مادەنيەتتى كەشەندى تۇردە دامىتۋ ەكەنىن اتاپ ءوتتى. وسىعان بايلانىستى ساپالى جانە قولجەتىمدى ءبىلىم بەرۋ مەملەكەت ساياساتىنىڭ باسىم باعىتتارىنىڭ ءبىرى ەكەنى دە ايتىلدى. بۇل رەتتە جاڭا تاسىلدەردى قالىپتاستىرۋعا جانە مەنەدجمەنتتى جاقسارتۋعا ەرەكشە كوڭىل ءبولىنىپ وتىر.
سونداي-اق ماۋلەن اشىمباەۆ مەملەكەت باسشىسىنىڭ تاپسىرماسىمەن ەلىمىزدە پەداگوگ مارتەبەسىن ارتتىرۋعا, وسى سالاداعى جاس مامانداردى ىنتالاندىرۋعا ارنالعان رەفورمالار ىسكە اسىرىلعانىن اتاپ ءوتتى.
ء«بىلىم بەرۋ سالاسى پرەزيدەنت قاسىم-جومارت توقاەۆتىڭ ءاردايىم باستى نازارىندا. ەلىمىزدە ۇستازداردىڭ جالاقىسى ايتارلىقتاي ءوستى جانە پەداگوگ مارتەبەسى زاڭمەن ايقىندالدى. مەملەكەت باسشىسى جولداۋدا اتاپ وتكەندەي, ءبىز مادەنيەتتى, ءبىلىمدى, عىلىمدى دامىتۋ ارقىلى قازىرگى اشىق الەمنىڭ ءبىر بولشەگى بولۋعا ۇمتىلۋىمىز كەرەك. وسى قۇندىلىقتارعا نەگىز بولاتىن جانە ولاردى بويعا سىڭىرەتىن باستى ورتا – مەكتەپ ەكەنى داۋسىز. شىن مانىندە, مەكتەپ – ادامي كاپيتالدى دامىتاتىن جانە زاماناۋي قوعام قالىپتاستىراتىن نەگىزگى ورىن», دەدى ماۋلەن اشىمباەۆ.
پالاتا سپيكەرى ۇلتتىق ءبىلىم بەرۋ جۇيەسىن رەفورمالاۋ بارىسىندا وقۋشىلاردى تۇلعا رەتىندە, ولاردىڭ بىرەگەي قابىلەتتەرىن دامىتۋعا باسىمدىق بەرۋ قاجەت ەكەنىنە نازار اۋداردى. قازىرگى جالپىلاما وقىتۋ ءتاسىلى بۇعان تولىق مۇمكىندىك بەرمەيدى.
«مەكتەپ – ادامي كاپيتالدىڭ ساپاسىن قالىپتاستىراتىن جانە ەلدىڭ بۇگىنگى بولمىسى مەن بولاشاق الەۋەتىن ايقىندايتىن بىردەن-ءبىر ورتا. وسى ورايدا مەكتەپتىڭ نەگىزگى ءۇش فۋنكتسيانى جۇزەگە اسىرۋى ماڭىزدى. ءبىرىنشىسى – ءبىلىم بەرۋ. بۇل رەتتە وقۋشىلاردىڭ تۇلعالىق ەرەكشەلىگىن ەسكەرۋگە, جاڭا, بىرەگەي ءبىلىم بەرۋ باعدارلامالارىن قۇرۋعا, جۇيەلى تۇردە مۇعالىمدەردىڭ بىلىكتىلىگىن ارتتىرۋعا جانە ينتەرنەت پەن تسيفرلى رەسۋرستاردىڭ مۇمكىندىگىن ءتيىمدى پايدالانۋعا باسا ءمان بەرۋ قاجەت. ەكىنشىدەن, وقۋشىلاردىڭ بويىندا ءارتۇرلى داعدىلاردى – «soft skills» دامىتۋ دا ۇلكەن مىندەت. قازىر وقۋشىلارعا سىني جانە شىعارماشىلىق ويلاۋ داعدىسىن ۇيرەتۋ, ولاردىڭ بويىنا كوممۋنيكاتسيالىق قابىلەتتەردى, كوماندامەن جۇمىس ىستەۋدى, كەز كەلگەن ورتاعا تەز بەيىمدەلۋدى ءسىڭىرۋ ماڭىزدى. ۇشىنشىدەن, مەكتەپتىڭ تاربيە وشاعى ەكەنىن ۇمىتپاۋىمىز كەرەك. ادامي جانە ۇلتتىق قۇندىلىقتاردى دارىپتەۋدە, ۇلكەنگە قۇرمەت, كىشىگە ىزەت, ەڭبەكقورلىق, مەيىرىمدىلىك, جاۋاپكەرشىلىك سياقتى قاسيەتتەردى جاس بۋىننىڭ ساناسىنا سىڭىرۋدە مەكتەپتەردىڭ ءرولىن ارتتىرعان ابزال», دەدى ماۋلەن اشىمباەۆ.
سونىمەن قاتار وتىرىستا پەداگوگتەردىڭ قۇزىرەتتەرىن ارتتىرۋ, ءبىلىم بەرۋ باعدارلامالارى مەن وقىتۋ ادىستەمەلەرىن كەڭەيتۋ, عىلىم سالاسىنداعى مەملەكەتتىك ساياساتتى ىسكە اسىرۋ جانە جاس عالىمدارعا زەرتتەۋلەر جۇرگىزۋ باعىتىندا قولداۋ كورسەتۋ جونىندە ۇسىنىستار ايتىلدى.
«ۇلتتىق مۇددە» ديالوگ الاڭىنىڭ وتىرىسىنا سەناتورلارمەن قاتار وقۋ-اعارتۋ ۆيتسە-ءمينيسترى ەدىل وسپان, ۇعا اكادەميگى ديحان قامزابەك ۇلى, Maqsut Narikbayev University باسقارما توراعاسىنىڭ ورىنباسارى اينۇر كارىبوزوۆا, «نازارباەۆ زياتكەرلىك مەكتەپتەرى» باسقارما توراعاسىنىڭ ورىنباسارى ايدانا شىلىبەكوۆا, حالىقارالىق «قازاق ءتىلى» قوعامىنىڭ پرەزيدەنتى, «Bilim Media Group» ديرەكتورى راۋان كەنجەحان ۇلى, «IQanat» قورىنىڭ اكادەميالىق ديرەكتورى زۋحرا شەگەنوۆا, PISA زەرتتەۋلەرى بويىنشا ۇلتتىق جوبالىق مەنەدجەر, «تالداۋ مەكتەبى» جوباسىنىڭ قاتىسۋشىسى ريزاگۇل سىزدىقباەۆا, تاعى باسقا ساراپشىلار قاتىسىپ, ءسوز سويلەدى.
