فوتو: استانا حالىقارالىق اۋەجايىنىڭ ءباسپاسوز قىزمەتى
اۋەجايدىڭ ءباسپاسوز قىزمەتى حابارلاۋىنشا, ىشكى رەيستەر تەرمينالىندا جولاۋشىلاردى تىركەۋ قالىپتى جاعدايدا جۇمىس ىستەپ تۇر.
«ساعات 10:48-دە استانا حالىقارالىق اۋەجايىنىڭ ت2 ىشكى رەيستەر تەرمينالى پايدالانۋعا بەرىلدى. سونداي-اق حالىقارالىق اۋە تەرمينالىن قالپىنا كەلتىرۋ جۇمىستارى جۇرگىزىلىپ جاتىر. اۋەجايدا جۇمىستى جالعاستىرۋ توتەنشە جاعدايلار مينيسترلىگى ماماندارىنىڭ رۇقساتىمەن مۇمكىن بولدى», دەلىنگەن حابارلامادا.
ايتا كەتەيىك, بۇعان دەيىن استانا حالىقارالىق اۋەجايىنىڭ تەرمينالىندا ءورت شىققانى بەلگىلى بولعان ەدى. ءتۇتىننىڭ سالدارىنان عيماراتتان 500-گە جۋىق جولاۋشى ەۆاكۋاتسيالاندى. وقيعاعا بايلانىستى 18 رەيس كەيىنگە شەگەرىلدى. الدىن الا بولجام بويىنشا ءورتتىڭ شىعۋىنا ەلەكتر كابەلدەرىنىڭ تۇتانۋى سەبەپ بولۋى ىقتيمال.
