فوتو: ult.kz
باسقوسۋعا زەرتتەۋشىلەر, جوو وقىتۋشىلارى, زاڭگەرلەر, جۋرناليستەر, ەرىكتىلەر قوزعالىسى, تكش, الەۋمەتتىك سالا, بيزنەس وكىلدەرى جانە تاعى باسقا بىلىكتى ماماندار قاتىستى. كەڭەستە ينستيتۋت ديرەكتورى ەركىن تۇقىموۆ ساراپشى قاتىسۋشىلاردىڭ نازارىن مەملەكەتتىك ساياسات قالىپتاساتىن قاعيداتقا اۋداردى.
– كۇنى بۇگىنگە دەيىن مەملەكەتتىك ۇيىمدارمەن نەمەسە ءىرى كومپانيالارمەن بايلانىستاعى ۇلتتىق ساراپشىلارعا باسىمدىق بەرىلدى. سالدارىنان ايماق دەڭگەيىندە تالداۋ جاسايتىن ساراپشىلاردىڭ جەتىسپەۋشىلىگى ماسەلەسى تۋىندادى. وسى رەتتە باستى ماقساتىمىز – وڭىرلەردە ساراپتامانى دامىتۋعا جاردەمدەسۋ جانە رەسپۋبليكانىڭ تۇكپىر-تۇكپىرىندە ەل دامۋىنىڭ ءتيىمدى تەتىكتەرىن ازىرلەۋ, قابىلدانىپ جاتقان ءىس-شارالار تۋرالى ەل باسشىلىعىن بارىنشا وبەكتيۆتى جانە وزەكتى اقپاراتپەن قامتاماسىز ەتۋ. ياعني تۇپكى مەجە – مەملەكەتتىڭ زياتكەرلىك الەۋەتىن بىرىكتىرۋ. ال قسزي شەشىم قابىلداۋشى ورگاندار مەن تۇلعالار اراسىندا ەرەكشە مارتەبەگە يە. سوندىقتان ءبىز بىرلەسكەن ايماقتىق زەرتتەۋلەر جاساپ, ۇسىنىستار ەنگىزىپ, وڭىرلەردىڭ ساپاسىن كوتەرۋگە كومەكتەسەمىز. ينستيتۋت باسىن قوسقان وڭىرلەردەگى ساراپشىلارىمىز جان-جاقتى ءبىلىم مەن بىرەگەي تاجىريبەسى بار ماماندار. ءارى بۇگىندە مەملەكەتتىك ساياساتتىڭ باعىتىن «Top down approach» نەمەسە «جوعارىدان تومەن» قاعيداتىن «Bottom up approach» نەمەسە «تومەننەن جوعارىعا» قاعيداتىنا الماستىرۋ جولىندا جۇمىستانامىز, – دەدى قسزي باسشىسى.
جالپى, پرەزيدەنت قاسىم-جومارت توقاەۆ بىلتىر ۇلتتىق قۇرىلتايدىڭ ەكىنشى وتىرىسىندا مەملەكەتتىك ساياساتتىڭ تالدامالىق سۇيەمەلدەۋ ساپاسىن ارتتىرۋ مىندەتىن جۇكتەگەن-ءدى. وسىلايشا, قسزي جانىنداعى وڭىرلىك ساراپشىلار كەڭەسى جاساقتالعان. مۇنداعى زەرتتەۋشىلەر, وقىتۋشىلار, مەملەكەتتىك قىزمەتشىلەر, ازاماتتىق قوعام ينستيتۋتتارى, جۋرناليستەر جانە بەلسەندى ازاماتتار وڭىرلەردىڭ زياتكەرلىك الەۋەتىن, وزەكتى ماسەلەلەردى انىقتاپ, تالداۋ جاساپ, ۇسىنىستار ازىرلەۋگە اتسالىسادى.
– مۇنداي باستامانىڭ ماڭىزى زور. قسزي-دان قازاقستاننىڭ ساراپشىلار قاۋىمداستىعىن بىرىكتىرۋدى جانە ءارتۇرلى سالالارداعى ساراپشىلاردىڭ اقپاراتتىق بازاسىن قۇرۋدى سۇرايمىن. ءبىز ءبىر-ءبىرىمىزدى ءبىلىپ, بىرگە جۇمىس ىستەۋىمىز كەرەك. ساراپشىلار قاۋىمداستىعى كوپ جاعدايدا ارىپتەستەرىنىڭ نە ىستەپ جاتقانىن بىلمەيدى. بىرلەسكەن عىلىمي زەرتتەۋلەر مەن بىرلەسكەن مونوگرافيالار شىعارۋدى ۇيىمداستىرۋعا بولار ەدى. قسزي ساراپشىلاردىڭ باس قوساتىن الاڭعا اينالسا دۇرىس بولادى, – دەدى قوستاناي وبلىسى قازاقستان حالقى اسسامبلەياسىنىڭ عىلىمي-ساراپتامالىق توبىنىڭ توراعاسى دەنيس كاچەەۆ.
سپيكەردىڭ ءسوزىن جالعاعان جۋرناليست بوتاگوز وماروۆا ينستيتۋت بازاسىندا جۋرناليستەر پۋلىن قۇرۋ قاجەت دەگەن پىكىرىن ورتاعا سالدى. وعان باستى سەبەپ – جاسالعان جۇمىستىڭ حالىق اراسىنداعى ناسيحاتىنىڭ ازدىعى. ال الماتى دامۋ ورتالىعىنىڭ باسقارۋشى ديرەكتورى رۋسلان بارماشەۆ ارنايى سايت جاساقتاۋدى ۇسىندى.
– كەڭەستىڭ دۇرىس جۇمىس ىستەۋى ءۇشىن ءوزىڭىزدىڭ ۆەب-سايتىڭىزدى, تالداۋلار مەن زەرتتەۋ ناتيجەلەرىن جاريالاۋعا بولاتىن پورتال قۇرۋدى ۇسىنامىن. اناليتيكا ەڭ الدىمەن, دەرەكتەردى تالداۋ, سوندىقتان ۆەب-سايت تەك ءبىرىنشى قادام, ال بولاشاقتا ساراپشىلار مەن مەملەكەتتىك ورگاندارعا شەشىم قابىلداۋعا كومەكتەسەتىن, جاقسى اناليتيكا جۇرگىزۋگە نەگىز بولاتىن «Data lakes» دەرەكتەر بازاسى اۋاداي قاجەت, – دەدى ول.
