فوتو: vlast.kz
ۇلتتىق ستاتيستيكا بيۋروسى اتىراۋ وبلىسى بويىنشا دەپارتامەنتىنىڭ باسشىسى نۇرجان قۇمارعاليەۆتىڭ دەرەگىنە سۇيەنسەك, كەيىنگى بەس جىلدا ءوڭىر تۇرعىندارىنىڭ سانى 57 مىڭ 900-گە ارتىپتى. ءوسىم – 9 پايىز. شاھار تۇرعىندارى – 10,6, ال اۋىلدىقتار قاتارى 7 پايىزعا ۇلعايعان. تۇرعىنداردىڭ كوبەيۋىنە اسەر ەتەتىن باستى فاكتور – تۋ كورسەتكىشى. وسى تۇرعىدان ايتقاندا, بىلتىرعى 11 ايدا 15 مىڭ 156 ءسابي دۇنيەگە كەلدى. ونىڭ ىشىندە 7 892 ۇل, 7 264 قىز بار. تابيعي ءوسىم – 12 مىڭ 20 ادام. وتكەن جىلى 3 980 نەكە قيىلسا, 396 نەكەنى بۇزۋ تۋرالى اكت جازباسى تىركەلگەن.
مۇنايلى وڭىردەن 27 مىڭ 953 ادام كوشىپ كەتكەن. ماسەلەن, سىرتقى كوشى-قون بويىنشا – 121 ادام, ونىڭ ىشىندە تمد ەلدەرىنە – 74, الەمنىڭ باسقا مەملەكەتىنە 47 ادام قونىس اۋدارعان.
«اتىراۋ وبلىسىنا وزگە وڭىرلەردەن كوشىپ كەلگەندەر دە بار. ولار – 26 مىڭ 34 ادام. ونىڭ ىشىندە سىرتقى كوشى-قون جەلىسىمەن 562 ادام كەلگەن. ناقتىلاي ايتقاندا, تمد ەلدەرىنەن – 533, ال الەمنىڭ باسقا مەملەكەتتەرىنەن 29 ادام قونىس اۋداردى. ال قازاقستاننىڭ باسقا وڭىرلەرىنەن 6 441 ادام اتىراۋ وڭىرىنە تۇراقتى تۇرۋعا شەشىم قابىلدادى. ماسەلەن, اقتوبە وبلىسىنان – 18,9, استانادان – 16,6, ماڭعىستاۋ وبلىسىنان كەلگەندەر ۇلەسى – 15,8 پايىز», دەپ مالىمدەدى نۇرجان قۇمارعاليەۆ.
اتىراۋ وبلىسى
