اتالعان جارىستى قازاقستاننىڭ ويىنشىلارى جەڭىسپەن باستاعانى جايىندا ءبىز بۇعان دەيىن جازدىق. توپتىق ءتۋرنيردىڭ ءبىرىنشى تۋرىندا ەرلەر كومانداسى ساۋد ارابياسىنا (3:0) سان سوقتىرسا, ايەلدەر قۇراماسى اۋستراليادان (3:2) ايلاسىن اسىردى. كەلەسى كۇنى جەرلەستەرىمىز 2016 جىلعى الەم چەمپيوناتىنىڭ قولا جۇلدەگەرى انگلياعا قارسى ويناعاندا قازاقستاننىڭ كورەيا رەسپۋبليكاسىنداعى توتەنشە جانە وكىلەتتى ەلشىسى نۇرعالي ارىستانوۆ باستاعان ءبىر توپ لاۋازىم يەلەرى سپورتشىلاردى قولداۋ ماقساتىندا ارەناعا ارنايى كەلدى. الايدا ازۋلى اعىلشىندارعا ءالىمىز جەتپەدى. كيريلل گەراسيمەنكو پول درينحولل مەن ليام پيتچفوردتى ۇتقانىمەن, الان قۇرمانعاليەۆ پەن ايدوس كەنجەعۇلوۆ قارسىلاستارىنا ەسە جىبەردى. ەسەپ – 2:3.
ءۇشىنشى كۇنى جىگىتتەر وليمپيا ويىندارى (3 قولا) مەن الەم چەمپيوناتتارىندا (7 كۇمىس, 2 قولا) اتوي سالىپ جۇرگەن گەرمانيامەن كۇش سىناستى. بۇل كەزدەسۋ ءبىزدىڭ جىگىتتەر ءۇشىن ءساتتى باستالدى. گەراسيمەنكو وليمپيادانىڭ التى (2 كۇمىس, 4 قولا), الەم چەمپيوناتىنىڭ بەس (4 كۇمىس, 1 قولا) دۇركىن جۇلدەگەرى, ەۋروپا ويىندارى (3 التىن), قۇرلىق چەمپيوناتى (10 التىن,3 كۇمىس, 2 قولا ) جانە الەم كۋبوگىندە (1 التىن, 4 قولا) سان مارتە اتوي سالعان داڭقتى دميتري وۆچاروۆتان 3:1 ەسەبىمەن باسىم ءتۇستى. بارشا ماماندار بۇل ناتيجەنى سەنساتسياعا بالادى.
كوپ كەشىكپەي گەراسيمەنكو كوماندالىق سايىستا الەم چەمپيوناتىنىڭ كۇمىس جۇلدەگەرى, جەكەلەگەن باسەكەدە ەۋروپانىڭ ءۇش دۇركىن چەمپيونى, ەۋروپا ويىندارىنىڭ ەكى مارتە جەڭىمپازى تسيۋ داننان 0:2 ەسەبىمەن ۇتىلىپ جاتسا دا, سالى سۋعا كەتكەن جوق. كەرىسىنشە, شەشۋشى ويىندارعا ول شيرىعىپ شىقتى. سوڭعى ءۇش پارتيادا قارقىنىن كۇرت كۇشەيتكەن ەلىمىزدىڭ ءبىرىنشى راكەتكاسى جەڭىستى قارسىلاسىنىڭ ۋىسىنان ج ۇلىپ الدى – 3:2. بىراق كيريللدىڭ جەڭىستى جولىن كوماندالىق ارىپتەستەرى جالعاستىرا المادى. ناتيجەسىندە, نەمىستەردىڭ اسىعى الشىسىنان ءتۇستى. قورىتىندى ەسەپ – 2:3.
ءتورتىنشى تۋردا كىلەڭ لەگيونەرلەردەن جاساقتالعان اقش قۇراماسىمەن ايقاستىق. بۇل جولى دا اسقان شەبەرلىك تانىتقان گەراسيمەنكو سيد نارەش پەن نيكحيل كۋماردى قاپى قالدىردى. كەنجەعۇلوۆ ليشان لياننان باسىم ءتۇستى. قۇرمانعاليەۆ كۋماردان ۇتىلدى. وسىلايشا, جەرلەستەرىمىز بۇل باسەكەنى 3:1 ەسەبىمەن ءوز پايداسىنا شەشتى. ناتيجەسىندە, قازاقستاننىڭ ۇستەل تەننيسشىلەرى 2 توپتا ەكىنشى ورىندى يەلەنىپ, جارىستى ودان ءارى جالعاستىرۋ قۇقىعىنا يە توپ-24 كوماندانىڭ قاتارىنا قوسىلدى. ءبىز تەك گەرمانيادان عانا قالىپ قويدىق. ەندى وتانداستارىمىز 1/8 فينالعا شىعۋ ءۇشىن ۇندىستانمەن كەزدەسەدى.
ال ەلىمىزدىڭ ايەلدەر قۇراماسىنىڭ جاعدايى ءماز ەمەس. چەمپيوناتتىڭ تۇساۋكەسەر كەزدەسۋىندە اۋستراليادان (3:2) ايلاسىن اسىرعان ولار ەكىنشى تۋردا اۋسترياعا ەسە جىبەردى. بۇل ويىندا زاۋرەش اقاشەۆا سوفيا پولكانوۆاعا (ەۋروپانىڭ ەكى دۇركىن چەمپيونى), سارۆينوز مىرقادىروۆا ليۋ تسزياگە (ەۆروپا چەمپيونى, التى وليمپياداعا قاتىسۋشى) جانە اناستاسيا لاۆروۆا كارولينا ميشەككە جارىتىپ قارسىلىق كورسەتە المادى – 0:3. گونكونگقا قارسى كەزدەسۋدە ءدال سونداي ەسەپپەن اياقتالدى – 0:3. وليمپيا ويىندارى مەن الەم جانە قۇرلىق بىرىنشىلىكتەرىندە تالاي رەت جەڭىس تۇعىرىنا كوتەرىلگەن چجۋ چەنچجۋ, لي حو چين جانە دۋ حويكەم سىندى مىقتىلارعا سارۆينوز مىرقادىروۆا, انگەلينا رومانوۆسكايا جانە انەل باقىتتىڭ ءالى جەتپەدى. توپتىق تۋرنيردەگى سوڭعى ويىندى پورتۋگالياعا قارسى وتكىزىپ, پيرەنەي تۇبەگىنىڭ وكىلدەرىنەن تازا جەڭىلدىك – 0:3. ءسويتىپ, بۇرىمدىلارىمىز ءوز توبىندا ءتورتىنشى ورىندا قالىپ قويدى.
