فوتو: gov.kz
«نەگە وسى وزىمىزدە جاقسى وسەتىن قىزعالداقتاردى الىستان اكەلەمىز دەپ ويلادىم. ونى سىرتتان تاسىمالداعاننان كەيىن ول گۇلدىڭ باعاسىنا دا, ساپاسىنا دا ايتارلىقتاي اسەر ەتەدى. مەنىڭ قىزعالداقتارىم ەش جەردە جاتىپ قالعان جوق, ەشقايدان اكەلىنگەن جوق, باقشامدا ءوسىپ تۇر, دەمەك ولاردىڭ گۇل شوقتارى دا الدەقايدا ۇزاعىراق تۇرادى», دەيدى باۋىرجان بولەگەنوۆ.
ونىڭ ايتۋىنشا, نەگىزگى جۇمىسى بار بولعاندىقتان, بۇل – ماۋسىمدىق جۇمىس, قىسقى ۋاقىتتى پايدالى وتكىزۋ نيەتىمەن قولعا العان. ول ءوز كۇشىمەن باقشاسى اۋماعىندا 110 شارشى مەتر كولەمىندەگى جىلىجاي سالعان. سودان سوڭ گوللاند قىزعالداقتارىنىڭ تامىر-تۇيىندەرىن ساتىپ العان, ولاردى ارنايى كومپانيا الماتىدان جەتكىزىپ بەرگەن. ونىڭ 14 ءتۇرلى سورتىنىڭ 30 مىڭعا جۋىق ءتۇبىرىن ەككەن. 4-5-ەۋى-ەرتە گۇلدەيتىن سورت ەكەن, قازىردىڭ وزىندە گۇلدەپتى.
«گۇلدەردى تەحنولوگيالىق ستاندارتقا ساي ساقتاۋعا قويامىن. جىلىجاي جىلى, سوندىقتان گۇلدەر جۇمساق, ال ساباعى مەن بۇرشىگى قاتتى ءارى سەرپىمدى بولۋى ءۇشىن ولاردى سۋىقتا ۇستاۋ كەرەك. سول ءۇشىن ماعان جازعى اس ءۇيدى جابدىقتاۋعا تۋرا كەلدى. بۇل دا جەڭىل بولعان جوق. كوكتەمگە قاراي قىزعالداقتارىما سۇرانىس بولادى دەگەن ۇمىتتەمىن. جالپى, گۇلدەردى ءوسىرۋ, اسىرەسە جىلىجاي جاعدايىندا كۇتىپ-باپتاۋ ەرەكشە كۇش-جىگەر مەن قامقورلىقتى قاجەت ەتەدى. تەمپەراتۋرا رەجيمىن ساقتاۋمەن قاتار ىلعالدىلىق دەڭگەيى جانە باسقا دا كوپتەگەن ۇساق-تۇيەك سياقتى كورىنگەنىمەن ماڭىزدى نارسەلەر بار. گۇل بيزنەسىنىڭ وسى بۇكىل ەرەكشەلىكتەرىن بىرتىندەپ يگەردىم, ەندى ءونىمىمدى ساتۋ ءۇشىن ىسكەرلىك بايلانىستار ورناتۋىم كەرەك», دەيدى الەۋمەتتىك جەلىلەردىڭ مۇمكىندىكتەرىن پايدالاناتىن كاسىپكەر.
وعان گۇل وسىرۋدە زايىبى كومەكتەسەدى. ەگەر ءونىمنىڭ ءوتىمى ويداعىداي بولسا, وندا ول كەلەسى جىلى قىزعالداق ءوسىرۋدى جالعاستىرىپ, كولەمىن بىرتە-بىرتە 150 مىڭعا جەتكىزبەكشى.
