قالالىق ءماسليحات كەزەكتەن تىس XIV سەسسيا بارىسىندا سەيسميكالىق قاۋىپسىزدىك جانە جۇمىلدىرۋ دايىندىعى باسقارماسىن, سونداي-اق قوعامدىق كەڭىستىكتەردى دامىتۋ باسقارماسىن قۇرۋدى بەكىتتى.
ء بىرىنشى باسقارمانىڭ نەگىزگى مىندەتى – سەيسميكالىق قاۋىپسىزدىك ستاندارتتارىنىڭ ساقتالۋىن قامتاماسىز ەتۋ, جەر سىلكىنىسى قاۋپىن باسقارۋ, تابيعي اپاتتار كەزىندە قالاي ارەكەت ەتۋدىڭ بازالىق داعدىلارىن ۇيرەتۋدى ۇيىمداستىرۋ, سونداي-اق تج دەپارتامەنتتەرىن, پوليتسيانى, قالالىق قىزمەتتەردى جانە سەيسميكالىق قاۋىپسىزدىك ماسەلەلەرى جونىندەگى ۇيىمداردى ۇيلەستىرۋ.
«اتالعان باسقارمانىڭ جۇمىسى سەيسمواۋديت جۇرگىزۋگە, تابيعي جانە تەحنوگەندىك سيپاتتاعى توتەنشە جاعدايلاردىڭ تۋىنداۋ قاۋپىن مونيتورينگتەۋدىڭ بىرىڭعاي جۇيەسىن ازىرلەۋگە, سونداي-اق ازاماتتىق قورعانۋ, جۇمىلدىرۋ دايىندىعى سالاسىنداعى مەملەكەتتىك رەتتەۋ ماسەلەلەرىن شەشۋگە مۇمكىندىك بەرەدى», دەپ اتاپ ءوتتى الماتى قالاسى اكىمى اپپاراتىنىڭ باسشىسى بەيبىت شاحانوۆ دەپۋتاتتار الدىندا سويلەگەن سوزىندە.
ونىڭ ايتۋىنشا, سەيسميكالىق قاۋىپسىزدىك جانە جۇمىلدىرۋ دايىندىعى باسقارماسى ءىس-شارالاردىڭ الدىن الۋ جانە جۇزەگە اسىرۋ ماسەلەلەرىمەن اينالىساتىن بولادى, سونىڭ ءبىرى – سەيسمواۋديت جۇرگىزۋ. بەيبىت شاحانوۆ وسى جىلدىڭ سوڭىنا دەيىن اياقتالاتىن سەيسمواۋديتتىڭ ناتيجەلەرى بويىنشا الماتى قالاسىندا سەيسميكالىق قاۋىپسىزدىكتى قامتاماسىز ەتۋ جونىندە كەشەندى شارالار قابىلداۋ جوسپارلانىپ وتىرعانىن اتاپ ءوتتى.
«الماتى قالاسىن دامىتۋ باعدارلاماسىنىڭ نەگىزگى باعىتتارىنىڭ ءبىرى جايلى قالالىق ورتانى قالىپتاستىرۋ, قوعامدىق كەڭىستىكتەردى جاڭعىرتۋ, سالۋ جانە اباتتاندىرۋ تۇجىرىمدامالارىن ازىرلەۋ بولىگىندە قالا باسقارمالارى مەن اۋدان اكىمدىكتەرىنىڭ جۇمىسىن ۇيلەستىرەتىن بولادى», دەدى بەيبىت شاحانوۆ.
جاۋاپتىلاردىڭ ايتۋىنشا, جاڭا باسقارمالاردى قۇرۋ شتات سانىن كوبەيتۋدى كوزدەمەيدى, ويتكەنى ولار اۋداندىق اكىمدىكتەردىڭ باسقا باسقارمالارى مەن اپپاراتتارىن وڭتايلاندىرۋ ەسەبىنەن قۇرىلادى جانە قوسىمشا بيۋدجەت قارجىسى بولىنبەيدى.
الماتى
