فوتو: akorda.kz
«شىن مانىندە, «بولاشاقتىڭ ويىندارى» – IT ينتەللەكت پەن سپورت ۇشتاسقان بىرەگەي فورمات. ءبىز مۇندا مىقتى كوماندا اكەلدىك. جاقسى ناتيجە كورسەتەدى دەپ ۇمىتتەنەمىز. جالپى قازاقستاندا IT سەكتورى دامىپ كەلەدى. ءبىزدىڭ ءوز ويىندارىمىز بار. حالىقارالىق دەڭگەيدە جارىستار وتكىزەمىز. رەسەي فەدەراتسياسى دەر كەزىندە قولعا العان وسى باستامانى جالعاستىرۋ ءۇشىن كەلەسى «بولاشاقتىڭ ويىندارىن» ءبىزدىڭ ەلىمىزدە ۇيىمداستىرۋدى ۇسىنامىن», دەدى پرەزيدەنت.
قاسىم-جومارت توقاەۆ قازاقستان مەن رەسەي اراسىنداعى ەكىجاقتى قاتىناستاردىڭ قارقىندى دامىپ كەلە جاتقانىن اتاپ ءوتتى.
«بۇل – ءبىزدىڭ جاڭا جىلداعى العاشقى كەزدەسۋىمىز, ۆلاديمير ۆلاديميروۆيچ. ءبىز ءبارىمىز رەسەيدە 17 ناۋرىزدا وتەتىن پرەزيدەنت سايلاۋىن كۇتىپ وتىرمىز. تۇپكىلىكتى ناتيجەنىڭ ويداعىداي بولارىنا كۇمانىمىز جوق. ويتكەنى رەسەي ءسىزدىڭ بەدەلدى باسشىلىعىڭىزبەن تاڭقالارلىق تابىسقا قول جەتكىزىپ كەلەدى. شىن مانىندە, ءسىز ءوز مالىمدەمەلەرىڭىزبەن, ءىس-ارەكەتىڭىزبەن جاھاندىق كۇن ءتارتىبىن قالىپتاستىراسىز. بۇل ءبىزدىڭ ىنتىماقتاستىعىمىزعا جانە ءسىزدىڭ بىلتىر قاراشا ايىندا قازاقستانعا جاساعان مەملەكەتتىك ساپارىڭىز كەزىندە قول جەتكىزىلگەن ۋاعدالاستىقتاردىڭ ورىندالۋىنا وڭ ىقپالىن تيگىزەتىنى ءسوزسىز. مەنىڭ ويىمشا, قوس تاراپ, ەكى ەلدىڭ ۇكىمەتتەرى اتالعان ۋاعدالاستىقتاردى تابىستى جۇزەگە اسىرىپ جاتىر. قازىردىڭ وزىندە ناقتى ناتيجە بار», دەدى قازاقستان پرەزيدەنتى.
ۆلاديمير پۋتين «بولاشاقتىڭ ويىندارى» ءتۋرنيرىنىڭ اشىلۋ راسىمىنە قاتىسقانى ءۇشىن قاسىم-جومارت توقاەۆقا العىس ايتىپ, رەسەي تاراپىنىڭ قازاقستانمەن ستراتەگيالىق سەرىكتەستىكتى ودان ءارى كۇشەيتۋگە بەيىلدى ەكەنىن راستادى.
«سپورت قانداي دا ءبىر ساياساتتان تىس بولۋى كەرەك, سونداي-اق حالىقتاردى جاقىنداستىرۋعا ءتيىس. مەن مۇنى بىرنەشە رەت ايتتىم, تاعى دا قايتالاعىم كەلەدى. بۇگىنگى تۋرنيرگە جۇزدەن استام ەلدەن, ناقتىراق ايتقاندا, ءارتۇرلى كونتينەنتتىڭ 104 ەلىنەن كوپتەگەن قاتىسۋشى كەلدى. ديدجيتال-سپورتقا جانە ناعىز ءداستۇرلى سپورتقا قىزىعۋشىلىق تانىتاتىن جاستارى قاتىسىپ وتىر. ال ەكىجاقتى قاتىناستارعا كەلەر بولساق, بايلانىستارىمىز اسا ماڭىزدى بارلىق سالا بويىنشا ناتيجەلى دامىپ كەلەدى. بىلتىر ءبىزدىڭ دەلەگاتسيانىڭ قازاقستانعا ساپارى ءساتتى بولدى. ءبىز الداعى دامۋ باعىتتارىن ايقىندادىق. ارىپتەستەرىم ماعان قازىرگى ۋاقىتتا ەنەرگەتيكا, ينۆەستيتسيا جانە وڭىرلەردەگى جۇمىستاردىڭ قالاي ءجۇرىپ جاتقانىن باياندايدى. مۇنىڭ بارىندە جالپى ەكى ەل, جەكەلەگەن ايماقتار جانە تۇتاس سالالار ءۇشىن ءوزارا مۇددە كوزدەلەدى», دەدى رەسەي پرەزيدەنتى.
سونىمەن قاتار ەكى ەل باسشىلارى وڭىرلىك جانە جاھاندىق كۇن تارتىبىندەگى ماسەلەلەر جونىندە پىكىر الماستى.
