سۋرەتتى تۇسىرگەن – دميتري ەروفەەۆ
كاسىپ يەسى توقا قارقىن – تاريحي وتانىنا ورالعان كوپ قازاقتىڭ ءبىرى. بىرنەشە جىل بويى ءتۇرلى سالادا باعىن سىناپ, اقىرى ءوز ءىسىن اشۋعا بەل بايلايدى. نارىق سۇرانىسىن زەرتتەي كەلە, ول تۇرمىستىق حيميا بيزنەسىمەن اينالىسۋدى ءجون كوردى. بيزنەستە تاجىريبەسى ازدىعى دا كاسىپ باستاۋىنا كەدەرگى كەلتىرمەدى. بۇكىل ۇدەرىستى زەرتتەپ, ەڭ الدىمەن قاجەتتى قۇرال-جابدىقتار ساتىپ الىپ, قولايلى بولمەنى جالعا الدى. زاماناۋي 3 ستانوك ورناتىپ, 4 ءتۇرلى ءونىم شىعارا باستادى.
«قۇرال-جابدىقتاردى قىتايدان ساتىپ الدىم. ۇيلەستىرۋشىلەر جابدىقتاردى ورناتىپ, قالاي قولدانۋدى ۇيرەتتى. قازىر «تازا» برەندىمەن ىدىس جۋعا ارنالعان گەل, كىر جۋعا ارنالعان گەل كونتسەنتراتىن جانە «Akzhol» اۆتوكولىك كوسمەتيكاسىنىڭ شىنى جانە كولىك جۋعا ارنالعان ەكى ءتۇرىن شىعارامىز. كاسىپورىننىڭ قۋاتتىلىعى تاۋلىگىنە 10 توننا دايىن ءونىم شىعارۋعا جەتەدى. ازىرگە 1 توننا ءوندىرىپ جاتىرمىز. كاسىپورنىمىز وتكەن جىلدىڭ جەلتوقسان ايىنىڭ سوڭىندا اشىلعاندىقتان, بۇل باستاماسى دەۋگە بولادى. ساۋدا-ساتتىقتى جولعا قويدىق. بىزدە جۇمىس ىستەيتىن 6 قىزمەتكەردىڭ 2-ەۋى وسى باعىتتى جۇرگىزەدى. ازىرگە ونىمدەرىمىز تالدىقورعان مەن الماتىداعى ءتۇرلى شاعىن دۇكەندە ساتىلىپ جاتىر. ال كاسىپورىنداعى ورتاشا جالاقى 200 مىڭ تەڭگەنى قۇرايدى», دەيدى «قارقىن گرۋپپ» جشس ديرەكتورى ت.قارقىن.
كاسىپورىندا ءونىم شىعارۋمەن قاتار سول ونىمدەرگە ارنالعان ىدىستار دا جاسالادى. ياعني تاۋلىگىنە 6 مىڭ دانا قۋاتتىلىعى بار ارنايى ستانوكتا پلاستيكالىق بوتەلكەلەر شىعارىلادى. كاسىپكەر بارلىق ونىمگە قاجەتتى شيكىزاتتى, ونىڭ قاپتاماسىنا ارنالعان ءوندىرىس قاجەتتىلىكتەرىن الماتىدان ساتىپ الادى. ماسەلەن, وسىنداي ينگرەديەنتتەردىڭ 15 ءتۇرى جەتكىزىلەدى, ونىڭ ىشىندە كارتون قوراپتارى دا بار.
«ونىمدەرىمىزدىڭ ساپاسى بەلگىلى برەندتەردەن ەش كەم ەمەس, سولاي بولا تۇرا الدەقايدا ارزان, ويتكەنى شيكىزاتتىڭ باسىم بولىگى – وتاندىق ءونىم. ماسەلەن, 2 ليتر سۇيىق ۇنتاقتىڭ زاۋىتتىق باعاسى – 1 200 تەڭگە, ىدىس جۋاتىن سۇيىقتىڭ 1,2 ءليترى – 800 تەڭگە. ءبىزدىڭ سۇيىق ۇنتاقتى ماشيناعا دا, قولمەن جۋعاندا دا قولدانۋعا بولادى. ول ءتۇرلى داقتاردى جاقسى كەتىرەدى, جاعىمدى ءيسى بار, گيپواللەرگەندى. ونىمدەردى ساتىپ الىپ جاتقان, قولدانىپ كورىپ, ساپاسىنا كوز جەتكىزگەن تۇتىنۋشىلارىمىز دا ءوز پىكىرلەرىن باسقالارمەن بولىسەدى دەپ سەنەمىز. ونىمدەرىمىزدى الەۋمەتتىك جەلىلەر ارقىلى ناسيحاتتاپ, اقپاراتتاردى Instagram جەلىسىندەگى @karkyn.grup پاراقشاسىنا سالىپ وتىرامىز», دەيدى كاسىپورىن ديرەكتورى.
كاسىپكەر مۇنىمەن توقتاپ قالماي, جاقىن ارادا شەبەرحاناسىنا ارناپ جەكە عيمارات سالىپ, شىعارىلاتىن ءونىم تۇرلەرىن كەڭەيتۋدى ارماندايدى.
«جەكە عيماراتىمىز بولسا عوي. ويتكەنى ءۇي-جايدى جالعا الۋ – ەداۋىر شىعىن. قۇرىلىس ءۇشىن بىزگە جەر تەلىمى كەرەك. بۇل جاعىنان مەملەكەتتىڭ قولداۋىنا جۇگىنەمىز. تۇرعىنداردى قولجەتىمدى باعادا كۇندەلىكتى تۇرمىسقا قاجەتتى ساپالى ونىمدەرمەن قامتاماسىز ەتۋدى جالعاستىرامىز», دەدى كاسىپكەر.
جەتىسۋ وبلىسى
