«ايقاي» – رەجيسسەر كەنجەبەك شايقاقوۆتىڭ ەكىنشى تولىقمەتراجدى جۇمىسى, ال ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرگەن العاشقى ءفيلمى. كەيىپكەرلەرىن نازىك يۋمورمەن ساراپتايتىن رەجيسسەردىڭ سۋرەتكەرلىك قولتاڭباسى ايقىن. وتكەن جىلى وڭتۇستىك كورەيادا وتكەن ايگىلى پۋسان كينوفەستيۆالىنىڭ ا Window on Asian Cinema باعدارلاماسى اياسىندا كورسەتىلگەن فيلم ەندى كارى قۇرلىق كورەرمەندەرىن ءتانتى ەتتى.
– حالىقارالىق كينوفەستيۆالدەردە فيلمدەرىمىزگە دەگەن سۇرانىس جوعارى ەكەنىن كورىپ وتىرمىز. الەمدەگى ەڭ ءىرى كينوفەستيۆالدەردە توپ جارىپ جۇرگەن «ايقاي» كارتيناسى – وسىنىڭ دالەلى. جالپى, كينويندۋستريا وكىلدەرى جانە ءبىزدىڭ ورتالىق جۇمىستى ءبىر جۇيەگە قويىپ, ءار فيلم ءوز ماقساتىن ايقىنداۋعا ءتيىس. بىزگە فيلمدەرىمىزدىڭ سورەلەردە شاڭ باسىپ جاتقانى ەمەس, ولاردىڭ پروكاتقا شىعۋى, فەستيۆالدارعا قاتىسىپ, جەتىستىكتەرگە جەتكەنى ماڭىزدى, – دەپ اتاپ ءوتتى «ۇلتتىق كينونى قولداۋ مەملەكەتتىك ورتالىعى» كەاق باسقارما توراعاسى قۇرمانبەك جۇماعالي.
«ايقايدا» يادرولىق سىناقتاردان زارداپ شەككەن سەمەي پوليگونى قۇرباندارىنىڭ تاعدىرى باياندالادى. ەكى اياقسىز تۋعان باس كەيىپكەردىڭ ءومىرى ارقىلى يادرولىق جارىلىس قۇرباندارىنىڭ قاسىرەتتى تاعدىرى, سونىمەن قاتار اناسىنان ايىرىلعان بالانىڭ اكەسىنە جاناشىرلىعىن, قامقورلىق جاساۋعا دەگەن تالپىنىسى بوياماسىز سۋرەتتەلەدى.
كوركەم تۋىندىنىڭ ءتۇسىرىلىمى اباي وبلىسىنىڭ اياگوز اۋدانى, شىڭعوجا اۋىلىندا ءوتتى. باستى رولدەردە ويناعان ورىنبەك شايماعانبەتوۆ, ارنۇر اكرام, ەربولات القوجا, بەينۇر بايمۇحامبەتوۆ, ەرلان مالاەۆ, ايبەك يمانقۇلوۆ, ايعانىم نۇرسۇلتان سىندى اكتەرلەر جۇمىسى شىنايىلىعى ءھام بەينە ساراپتاۋداعى تەرەڭدىگىمەن دارالاندى.
