«ەشتەڭەدەن تارىقپايدى». پاريج وليمپياداسىنا قاتىساتىن سپورتشىلاردىڭ دايىندىعى تالقىلاندى

تۋريزم جانە سپورت مينيسترلىگىنىڭ سپورتتى دامىتۋ ديرەكتسياسى مەن قر ۇلتتىق وليمپيادا كوميتەتى وكىلدەرىمەن بىرىككەن كەزدەسۋ ءوتتى.

جيىن بارىسىندا بىرقاتار ماسەلەلەر تالقىلاندى. بۇگىندە قازاقستان قۇراماسىنىڭ قورجىنىندا سپورتتىڭ 8 ءتۇرى بويىنشا 19 جولداما بار (ساداق اتۋ - 4, تاس جولداعى ۆەلوسپورت - 3, نىسانا كوزدەۋ - 5, قازىرگى بەسسايىس - 2, بوكس - 2, گرەك-ريم كۇرەسى - 1, ەركىن كۇرەس - 1, سپورتتىق گيمناستيكا - 1).

جوسپار بويىنشا 25 سپورت ءتۇرى بويىنشا ليتسەنزيالاردىڭ سانىن 90-عا دەيىن جەتكىزۋ مىندەتى تۇر. سونداي-اق جۇلدەگە ۇمىتكەر 54 سپورتشىدان تۇراتىن ءتىزىم جاساقتالدى. قۇراما كوشباسشىلارى ءار سپورت ءتۇرىنىڭ ەرەكشەلىگىن ەسكەرە وتىرىپ, جەكە جوسپار بويىنشا دايىندالادى. ءبىر سوزبەن ايتقاندا - ولار ەشتەڭەگە مۇقتاج بولمايدى. وليمپيادا الدىنداعى تەستىلىك جارىستارعا قاتىسۋ دا ماڭىزدى ەكەنى تىلگە تيەك ەتىلدى. ءار سپورت ءتۇرىنىڭ جارىس كەستەسىنە سايكەس, كوماندالاردىڭ پاريجگە ۇشىپ بارۋ ۋاقىتى بەكىتىلەدى. سونىمەن قاتار ۇلتتىق قۇراما فورماسىنىڭ ديزاينى دا بەكىتىلىپ, ونى دايىنداۋ ەرەكشە نازاردا بولاتىنى ايتىلدى.

مينيسترلىك وسى  جىلدىڭ 17 ساۋىرىندە بۇكىل ەل بويىنشا «وليمپياداعا 100 كۇن» ءىس-شاراسىن وتكىزىپ,  فلەش-موبتار مەن سپورتتىق جارىستار ۇيىمداستىرىلادى.

الەمنىڭ 205 ەلىنەن 10 مىڭنان اسا سپورتشى قاتىسادى دەپ جوسپارلانعان پاريج جازعى وليمپيادا ويىندارى 26 شىلدە مەن 11 تامىز ارالىعىندا وتەدى.