بىلىكتى ماماندار شالعاي وڭىردەگى ونەر ۇجىمىنىڭ قويىلىمدارىمەن تانىستى. سونداي-اق جاستارعا اقىل-كەڭەس بەرىپ, باعىت-باعدار سىلتەدى.
الاتاۋدىڭ باۋرايىنان كەلگەن بىلىكتى ماماندار اپتالىقتىڭ العاشقى كۇنى د.ۋرباننىڭ «تىشقاندار» ەرتەگىسى مەن ر.كۋنيدىڭ ء«ازازىل اقشا» كومەدياسىن تاماشالاپ, قويىلىمنىڭ كەم-كەتىگى مەن ۇناتقان تۇستارىنا توقتالىپ, ساحنا شەبەرلىگى, رەجيسەردىڭ شەشىمى جونىندە ءوز پىكىرلەرىن ايتتى.
«بۇگىنگى تاڭدا شالعايداعى تەاتر ۇجىمى قالاي جۇمىس ىستەپ جاتىر؟ رەپەرتۋارلىق باعىتى قالاي؟ سپەكتاكلدەر قالاي وينالىپ جاتىر؟ مىنە, ءبىز وسىنداي سۇراقتارعا جاۋاپ تابۋ ءۇشىن ءبىرتالاي جۇمىستى قولعا الىپ جاتىرمىز. جالپى, قازىرگى كەزدە قازاق تەاترلارى الەمدىك تەاتر كونتەكسىندە ۇلكەن بەلەستى باعىندىرا الاتىنىن كورسەتىپ وتىر. باعىت-باعدارلارى دا جاقسى. جاستاردىڭ جاڭا سەرپىنمەن العا باسىپ بارا جاتقانى قۋانتادى. ارقالىق قازاق جاسوسپىرىمدەر تەاترىنىڭ تىنىسىنان دا حاباردارمىز. قارا شاڭىراقتى ۇستاپ وتىرعان ونەر ۇجىمىنىڭ دا ەڭبەگى زور. الىس ايماقتاردا ونەر شاڭىراعىن ۇستاپ تۇرۋ ۇلكەن جاۋاپكەرشىلىكتى تالاپ ەتەدى. ويتكەنى كادر ماسەلەسىن شەشۋ, اكتەرلەر مەن رەجيسسەرلەردى جۇمىسقا تارتۋ, ولاردى وسىندا كەلۋگە قىزىقتىرۋ, كورەرمەندى باۋراپ الۋ – وڭاي دۇنيە ەمەس. تەاتردىڭ تامىرى بۇلكىلدەپ سوعىپ, سپەكتاكلدەر قويىلىپ جاتىر ەكەن. ەندى بۇل ۇجىمنىڭ الدىندا ۇلكەن ماقسات تۇر دەپ ەسەپتەيمىز. بۇل – ونەر شىڭىنا شارىقتاپ كوتەرىلۋگە ۇمتىلىس جاسايتىن تەاتر بايگەلەرىنە قاتىسۋ. ءبىز كەيىنگى ون جىل ۋاقىت كولەمىندە ۇنەمى رەسپۋبليكالىق تەاترلار فەستيۆالى قازىلار القاسىنىڭ مۇشەسى بولىپ جۇمىس اتقارىپ كەلەمىز. تەاتر فەستيۆالدارىنا قاتىسىپ, وزدەرىن كورسەتسە, نۇر ۇستىنە نۇر بولار ەدى», دەيدى بەلگىلى تەاتر سىنشىسى باقىت نۇرپەيىس.
اپتالىق اياسىندا ارقالىق تەاترىنىڭ ۇجىمى ش.ايتماتوۆتىڭ «اق كەمە», گ.حۋگاەۆتىڭ «قارا شەكپەن», ءا.ايتۋاردىڭ «تۋعان كۇنىڭىزبەن, اناشىم!», ا.دۋدارەۆتىڭ «كەش» سپەكتاكلدەرىن ساحنالادى.
قوستاناي وبلىسى,
ارقالىق قالاسى
