باستاپقى باسەكەلەردە قىتايلىق چجۋ لين (№57) مەن امەريكالىق ەمما ناۆاررودان (№23) ايلاسىن اسىرعان قازاقستاننىڭ تەننيسشىسى شيرەك فينالدا لەيلا فەرناندەسپەن (№38) كەزدەستى. كانادانىڭ وكىلى وسىدان ءۇش جىل بۇرىن نەبارى 18 جاسىندا US Open ءتۋرنيرىنىڭ فينالىندا ويناپ, جەر جاھان جانكۇيەرلەرىنىڭ نازارىن وزىنە اۋدارعان ەدى. ءبىرىنشى سەتتە 1:4 ەسەبىمەن ۇتىلىپ جاتقان ەلەنا كامبەك جاساپ, جەڭىستى قارسىلاسىنىڭ ۋىسىنان ج ۇلىپ اكەتتى – 6:4, 6:2. جارتىلاي فينالدا جەرلەسىمىزدىڭ جولى رەسەيلىك اناستاسيا پاۆليۋچەنكوۆامەن (№32) قيىستى. 32 جاستاعى سامارانىڭ تۋماسى – توكيو وليمپياداسى مەن دۇنيەجۇزىلىك ۋنيۆەرسيادانىڭ جەڭىمپازى, 2021 جىلى رولان گارروستىڭ ءفيناليسى. پاريجدەگى «ۇلكەن دۋلىعا» ساناتىنداعى جارىستىڭ شيرەك فينالىندا ولار ءوزارا كەزدەسىپ, بۇل باسەكەدە پاۆليۋچەنكوۆا باسىم تۇسكەن ەدى. بۇل جولى رىباكينا كەتكەن ەسەنى قايتاردى. ەسەپ – 6:2, 6:4.
فينالدا وتانداسىمىز ينگا شۆەنتەكپەن شەبەرلىك بايقاستى. پولشانىڭ ماقتانىشى «رولان گارروستا» ءۇش رەت توپ جارىپ, اقش-تىڭ اشىق بىرىنشىلىگىندە ءبىر مارتە دارا شىقتى. WTA تۋنيرلەرىندە 17 رەت باس جۇلدەنى ولجالادى. بۇل باسەكەنى وتە جاقسى باستاعان ەلەنا ءاۋ باستا 4:1 ەسەبىمەن الدا كەلە جاتتى. سول كەزدە دوپتى ويىنعا قوسۋ بارىسىندا ول راكەتكامەن ابايسىزدا ءوز اياعىن قاتتى سوعىپ الىپ, دارىگەرلەردىڭ كومەگىنە جۇگىنۋگە ءماجبۇر بولدى. سول اسەر ەتسە كەرەك, ودان كەيىن رىباكينانىڭ ويىنى مۇلدە جۇرمەدى. ناتيجەسىندە, وتانداسىمىز 6:7, 2:6 ەسەبىمەن جەڭىلىس تاپتى.
جالپى, بيىلعى ماۋسىم ەلەنا رىباكينا ءۇشىن ءساتتى باستالدى دەپ ايتۋعا بارلىق نەگىز بار. اۋستراليانىڭ اشىق بىرىنشىلىگىندە ءساتسىز ونەر كورسەتكەنى بولماسا, بريسبەن مەن ءابۋ-دابيدەگى ءدۇبىرلى دودالاردا دارا شىقتى. دوحاداعى ءتۋرنيردىڭ اقتىق سىنىندا عانا ۇتىلدى. قاتارداعى جارىستىڭ فينالىنا شىققانى ءۇشىن رىباكينا 308 320 دوللاردى قالتاسىنا باسىپ, 650 رەيتينگتىك ۇپايدى ەنشىلەدى.
ال ايەلدەر اراسىنداعى قازاقستاننىڭ ەكىنشى راكەتاسى يۋليا پۋتينتسەۆا كەيىنگى كەزدەرى ءجيى ءسۇرىنىپ ءجۇر. جەرلەسىمىز دۋبايداعى WTA ءتۋرنيرىنىڭ ىرىكتەۋ سايىسىنىڭ ەكىنشى كەزەڭىندە پولشالىق ماگدالەنا فرەنگكە جول بەردى – 3:6, 6:3, 4:6.
الەكساندر شەۆچەنكو (№57) روتتەردامداعى ءتۋرنيردىڭ تۇساۋكەسەر كەزدەسۋىندە قىتايدىڭ وكىلى چجان چجيچجەنگە (№50) شاڭ قاپتىرسا, كەلەسى كەزەڭدە اتر تىزىمىندە جەتىنشى ورىندا تۇرعان دانيالىق رۋنە حولگەردى 6:4, 1:6, 6:3 ەسەبىمەن ۇتىپ, سەنساتسيالىق ناتيجە تىركەدى. جارتىلاي فينالدا الەكساندر ۇزدىكتەر رەيتينگىندە 13-ساتىعا جايعاسقان گريگور ديميتروۆپەن كۇش سىناستى. وسىدان ءبىراز جىل بۇرىن بولگاريانىڭ بەتكەۇستارى ۋيمبلدون, اقش پەن اۋستراليانىڭ اشىق بىرىنشىلىكتەرىندە ۇزدىك ءتورت تەننيسشىنىڭ قاتارىنان كورىنگەن. قوس ساڭلاقتىڭ سايىسىندا ديميتروۆتىڭ مىسى باسىم بولدى – 7:6, 3:6, 6:4.
اقش-تىڭ فلوريدا شتاتىندا ءوتىپ جاتقان حالىقارالىق تۋرنيردە دميتري پوپكو باس جۇلدەگە تالاسۋ مۇمكىندىگىنە يە بولدى. شيرەك فينالدا امەريكالىق اكسەل نەفەنى ۇتقان ول جارتىلاي فينالدا رۋمىنيالىق گابي ادريان بويتادان باسىم ءتۇستى. شەشۋشى ويىندا وتانداسىمىز اندرەاس اندرادە (ەكۆادور) پەن الەكس رىباكوۆ (اقش) اراسىنداعى كەزدەسۋدىڭ جەڭىمپازىمەن كۇش سىناسادى. بۇل – ءبىر اپتا عانا ۋاقىت ارالىعىندا پوپكونىڭ ITF تۋرنيرلەرىندە ەكىنشى رەت فينالعا شىعۋى. جۋىردا عانا ول سانرايزدەگى جارىستىڭ جەڭىمپازى اتاندى.
باحرەينىڭ استاناسى مانامادا ميحايل كۋكۋشكين جاقسى ويىن ورنەگىن كورسەتتى. جارتىلاي فينالدا ول چەحيالىق ياكۋب مەنشيكوۆتى 6:3, 6:2 ەسەبىمەن جولىنان ىعىستىردى. باس جۇلدە ءۇشىن باسەكەدە جەرلەسىمىز فرانتسيالىق ريشار گاسكەنى ۇتتى – 7:6, 6:4. 2018 جىلعا دەيىن «چەللەندجەر» ساناتىنداعى سايىستاردا 14 رەت توپ جارعان كۋكۋشكيننىڭ سودان بەرى ۇزاق ۋاقىت بويى باعى جانباي جۇرگەن ەدى. مىنە, ەندى اراعا التى جىل سالىپ, ول ءوزىنىڭ 15 تيتۋلىنا قول جەتكىزدى.
