وبلىستىق پد-نىڭ مالىمەتىنشە, 13 اقپاننىڭ بوراپ تۇرعان كەشىندە ليساكوۆ قالاسىنىڭ تۇرعىنى پوليتسيا بولىمىنە ۇلىنىڭ جوعالىپ كەتكەنى تۋرالى حابارلاعان. پوليتسيا جوعالعان ازاماتتىڭ بورانعا قاراماستان, كۇندىز تانىسىنىڭ كولىگىنە مىنگەسىپ نوۆويلينوۆ اۋىلىنا قاراي شىعىپ كەتكەنىن بىردەن انىقتايدى.
كەيىن بەلگىلى بولعانداي, نوۆويلينوۆتەن قايتىپ كەلە جاتقان كولىكتىڭ جولاۋشىسى قاسىنداعى جۇرگىزۋشىمەن داۋلاسىپ قالعان. سودان اشۋلانعان جولاۋشى ورتا جولدا كولىكتەن ءتۇسىپ قالىپ, قالاعا قاراي جاياۋ تارتىپ وتىرادى. اشۋعا مىنگەن جولاۋشى اقىرى اداسىپ جولدان شىعىپ كەتكەن. قايتا پوليتسيانىڭ كەشىكپەي ىزدەۋ شارالارىن دەر ۋاقىتىندا باستاعانى ابىروي بولعان. ايتپەسە, تۇتەپ تۇرعان بوران تاعى ءبىر جالعىز جاياۋدىڭ ءومىرىن جۇتىپ تىنۋى مۇمكىن ەدى. جەرگىلىكتى پوليتسيا ءبولىمىنىڭ ۋچاسكەلىك ينسپەكتورى دانابەك يگەمبەرديەۆ پەن پاترۋلدىك پوليتسيا قىزمەتكەرى الىبەك ءجۇنىسوۆ جولدان اداسقان ازاماتتى قار ۇستىندە جاتقان جەرىنەن تاۋىپ الدى.
«مەن بۇل توڭىرەكتى جاقسى بىلەمىن. 3 جىلدان بەرى وسىندا جۇمىس ىستەپ جاتىرمىن. ارىپتەسىم ەكەۋمىز قىزمەتتىك كولىكتى جولدىڭ جيەگىنە قالدىرىپ, ءبىرتالاي جەردى جاياۋ شارلاپ شىقتىق. ءسويتىپ ءجۇرىپ جوعالعان ەر ادامدى قاردىڭ ۇستىندە جاتقان جەرىنەن تاۋىپ الدىق. ءبىر جارىم ساعاتتان استام ۋاقىت جاتىپ قالعان. ءسال كەشىكسەك, ۇيىقتاپ كەتۋى دە مۇمكىن ەكەن», دەيدى دانابەك يگەمبەرديەۆ.
تابىلعان ازاماتتىڭ ەش جەرىن ۇسىك شالماعان. اناسى جالعىز ۇلىن ون ەكى مۇشەسى ساۋ كۇيدە ءدىن امان قولىنا اكەپ تاپسىرعان پوليتسيا قىزمەتكەرلەرىنە العىس ايتادى. «شىنىمدى ايتسام, ۇلىمدى ەندى تىرىدەي كورەمىن بە, كورمەيمىن بە دەگەن قورقىنىش بيلەپ الدى. بوران بولسا, مىناۋ. ەشكىمنىڭ باسىنا بەرمەسىن. ۇلىم كولىكتەن ءتۇسىپ قالعان جەردى ءدال انىقتاپ, كەتكەن باعىتىن دۇرىس بولجاي بىلگەن, السىرەپ قۇلاعان جەرىنەن تاۋىپ الىپ, امان-ەسەن ۇيگە جەتكىزگەن پوليتسيا قىزمەتكەرلەرىنە العىسىم شەكسىز!» دەيدى قۋانعان انا.
وبلىستىق پوليتسيا دەپارتامەنتى ءوڭىر تۇرعىندارىن اۋا رايىنا قاتىستى حابارلامالارعا مۇقيات بولۋعا جانە جول قاۋىپسىزدىگىن قاتاڭ ساقتاۋعا شاقىرادى.
قوستاناي وبلىسى
