اتالعان اگەنتتىك ساراپشىلارىنىڭ پىكىرىنشە, جالپىكوماندالىق ەسەپتە اقش قۇراماسى جەكە-دارا كوش باستايدى. فرانتسيانىڭ باس شاھارىندا امەريكالىقتار 129 جۇلدەگە قول جەتكىزەدى. ونىڭ 37-ءسى – التىن, 46-سى – كۇمىس جانە 46-سى – قولا. ەكىنشى ورىندى قىتاي ولجالايدى. قىتاي ەلىنىڭ وكىلدەرى 85 (35+28+22) مەدالدى موينىندا جارقىراتادى. ءۇشىنشى ساتىعا جارىس قوجايىندارى (26+16+11) جايعاسادى. سونداي-اق توپ-5 كوماندانىڭ قاتارىنا ۇلىبريتانيا (17+22+25) مەن جاپونيا (17+15+24) قوسىلادى.
«Gracenote» ۇيىمىنىڭ ساراپشىلارى قازاقستان قۇراماسى پاريج وليمپياداسىن 30-ورىنمەن قورىتىندىلايدى دەپ بولجاپ وتىر. وتانداستارىمىزدىڭ 2 التىن, 1 كۇمىس جانە 6 قولانى قاناعات تۇتادى-مىس. بارلىعى – 9 جۇلدە. بۇل رەتتە ءبىز ىرگەلەس وزبەكستاننان دا قالىپ قويادى ەكەنبىز. «الا تاقيالى» اعايىندارىمىز تورتجىلدىقتىڭ باستى دوداسىندا 13 مەدالدى (3+3+7) قورجىنعا سالادى.
سالىستىرمالى تۇردە الساق, 2021 جىلى توكيودا الاۋى تۇتانعان وليمپيا ويىندارىندا اقش (39+41+33), قىتاي (38+32+18) جانە جاپونيا (27+14+17) قۇرامالارى الدىڭعى لەكتەن كورىندى. ءتورتىنشى ورىنعا ۇلىبريتانيا (22+21+22) تابان تىرەدى. ءوز ەلىنىڭ وليمپيادالىق كوميتەتىنىڭ تۋى استىندا ونەر كورسەتكەن رەسەيدىڭ سپورتشىلارى (20+28+33) ۇزدىك بەستىكتى تۇيىندەدى. ءيا, سول جارىستا قازاقستان قۇراماسىنىڭ تىم سۇرەڭسىز ونەر كورسەتكەنى راس. كۇنشىعىس ەلىنە اتتانعان 93 ورەنىمىز 19 سپورت ءتۇرى بويىنشا باق سىنادى. وكىنىشكە قاراي, جەر-جاھاننىڭ جامپوزدارى جينالعان جارىستا نەبارى 8 قولانى قاناعات تۇتىپ, 83-ورىندا قالىپ قويدى. جاپونيانىڭ استاناسىندا بىزگە قاراعاندا وزبەكتەردىڭ قارقىنى كۇشتى بولدى. ولار 3 التىن مەن 2 قولانى يەلەنىپ, جالپى ەسەپتە 32-ورىندى ەنشىلەدى.
