ءتۇرلى ساياسي جانە باسقا دا جاعدايلارعا بايلانىستى رەسەيدىڭ نەگىزگى قۇرامىنداعى بالۋانداردىڭ ءبىرازى رۋمىنياعا ۆيزا الا المادى. سول سەبەپتى دە ولار قارت قۇرلىقتىڭ باستى دوداسىنا ەكىنشى جانە ءۇشىنشى ءنومىرلى بالۋاندارىن اتتاندىردى. سولاردىڭ قاتارىندا ادىلەت تولەۋباەۆ تا بار. ومبى وبلىسىندا تۋىپ-وسكەن 28 جاستاعى قانداسىمىزدىڭ قىراعى مامانداردىڭ نازارىنا ىلىككەنىنە ءبىراز جىلدىڭ ءجۇزى بولدى. گرەك-ريم كۇرەسىن سەرىك ەتكەن ول ءۇش رەت رەسەي چەمپيوناتىندا جۇلدەگەرلەر قاتارىنان كورىندى. 2016 جانە 2023 جىلدارى قولا مەدالدى يەلەندى. 2022 جىلى كۇمىسكە قول سوزدى. سۋزدالدا وتكەن جارىستىڭ فينالىندا 77 كگ سالماق دارەجەسىندە كۇرەسكەن ادىلەت الەم جانە قۇرلىق چەمپيونى, الەم كۋبوگىنىڭ يەگەرى ابۋيازيد مانتسيگوۆقا ەسە جىبەردى. ودان بولەك, ومبىنىڭ وعىلانى بىرقاتار حالىقارالىق تۋرنيردە جەڭىس تۇعىرىنا كوتەرىلدى.
جالپى, تولەۋباەۆتىڭ سالماعىندا كىلەڭ «سەن تۇر مەن اتايىندار» جينالعان. ابۋيازيد مانتسيگوۆتان بولەك, رومان ۆلاسوۆ (وليمپيادانىڭ ەكى, الەمنىڭ ءۇش جانە ەۋروپانىڭ ءتورت دۇركىن چەمپيونى), الەكساندر چەحيركين (الەم جانە قۇرلىق چەمپيونى, ەۋروپا ويىندارىنىڭ جەڭىمپازى), رامازان اباچاراەۆ پەن سەرگەي كۋتۋزوۆ (الەم چەمپيوناتىنىڭ قولا جۇلدەگەرلەرى), سەرگەي ستەپانوۆ پەن يسلام وپيەۆ (جاستار اراسىندا الەم جانە قۇرلىق چەمپيوندارى) جانە تاعى باسقا دۇلدۇلدەر بار. مىنە, سونداي تارلاندارمەن تىرەسىپ ءجۇرىپ, ادىلەتتىڭ دە شەبەرلىك دەڭگەيى ءوستى.
بيىلعى ەۋروپا چەمپيوناتىندا باپكەرلەردىڭ تاڭداۋى تولەۋباەۆقا ءتۇستى. بۋحارەستتە ول جاستاردىڭ الەم بىرىنشىلىگىنىڭ قولا جۇلدەگەرى, شۆەتسيالىق پەر البين ولوفسسوندى (6:1) جولىنان ىعىستىرعانىمەن, شيرەك فينالدا الەم چەمپيونى جانە ەكى دۇركىن قولا جۇلدەگەرى, ەۋروپانىڭ ەكى دۇركىن چەمپيونى جانە ءفيناليسى, ارمەنيالىق مالحاس امويانعا (2:3) ءبىر عانا ۇپاي ايىرماشىلىعىمەن ەسە جىبەردى. جۇبانىش بەلدەسۋىندە يتاليالىق ريككاردو ابرەشيادان (5:1) ايلاسىن اسىرعان قانداسىمىز ءۇشىنشى ورىن ءۇشىن تارتىستا مولدوۆانىڭ تانىمال بالۋانى الەكساندر گۋتۋدى (13:4) ايقىن باسىمدىقپەن ۇتتى. ءسويتىپ, ومبىنىڭ قازاعى ادىلەت تولەۋباەۆ ەۋروپا چەمپيوناتىنىڭ قولا جۇلدەگەرى اتاندى. ازىرگە بۇل – ونىڭ سپورتتىق مانسابىنداعى ەڭ ۇزدىك كورسەتكىش!
