«قاڭتار ايىندا جىلدىق ينفلياتسيا 9,5%-عا دەيىن باياۋلادى. 2023 جىلدىڭ قورىتىندىسى بويىنشا, ينفلياتسيانىڭ تومەندەۋى بيىلعى قاڭتار ايىندا بازالىق مولشەرلەمەنى تومەندەتۋگە مۇمكىندىك بەردى. ول قاڭتاردا 50 بازالىق تارماققا 15,25%-عا دەيىن تومەندەتىلدى. ال جىلدىق ينفلياتسيانىڭ تومەندەۋ قارقىنى باياۋلاپ كەلەدى. قاڭتار ايىنداعى ايلىق ينفلياتسيا الدىڭعى ورتاشا ماندەردەن جوعارى قالىپتاستى. قالىپتاسقان ينفلياتسيالىق احۋال دەزينفلياتسيالىق ساياساتتىڭ جالعاسۋىن تالاپ ەتەدى», دەدى اقىلجان بايماعامبەتوۆ.
قاڭتار ايىندا تەڭگە باعامىنىڭ 1 اقش دوللارى ءۇشىن 448,17 تەڭگەگە دەيىن, 1,4%-عا نىعايعانىن دا اتاپ ءوتتى. جىل باسىنان ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن ۆاليۋتا ساتۋدىڭ تەڭگەگە ەداۋىر قولداۋ كورسەتكەنىن دە جەتكىزدى.
«ونىڭ كولەمى 1 ملرد-تان استام دوللاردى قۇرادى. جىل باسىنان مەملەكەتتىك باعالى قاعازدار نارىعىنا بەيرەزيدەنتتەردىڭ كاپيتال اعىنى 194 ملن دوللار بولدى. ۇلتتىق قوردان ۆاليۋتا ساتۋ كولەمىنىڭ وسۋىنە جانە ساتۋ كولەمىنىڭ تەڭگە باعامىنىڭ كونيۋنكتۋراسىنا اسەر ەتۋىنە بايلانىستى سالىمشىلار مۇددەسى ءۇشىن «بىرىڭعاي جيناقتاۋشى زەينەتاقى قورىنىڭ» زەينەتاقى اكتيۆتەرىن ينۆەستيتسيالاۋعا بەلسەندى تۇردە ۆاليۋتا ساتىپ الۋ تۋرالى شەشىم قابىلداندى. وسىعان وراي اقپان ايىندا بجزق-عا ۆاليۋتا ساتىپ الۋ كولەمى 200 ملن دوللاردان 400-500 ملن دوللارعا دەيىن ۇلعايدى», دەدى.
تاعى ءبىر جاقسى جاڭالىق – ۇلتتىق بانكتىڭ التىن-ۆاليۋتا رەزەرۆتەرى جىل باسىنان بەرى 36,7 ملرد دوللارعا دەيىن, 1,9%-عا ۇلعايعان.
«ۇلتتىق بانكتىڭ ۆاليۋتالىق شوتتارىندا ەكىنشى دەڭگەيلى بانكتەردىڭ قاراجاتىنان مول قالدىق قالعان ەدى, بۇل سوعان بايلانىستى. ۇلتتىق قوردىڭ اكتيۆتەرى جىل باسىنان 1%-عا تومەندەپ, 59,4 ملرد دوللار بولدى. بۇل تومەندەۋ «ۇلتتىق قور – بالالارعا» باعدارلاماسى بويىنشا مىندەتتەمەلەردى ەسەپتەۋگە بايلانىستى. دەگەنمەن قاڭتار ايىنداعى ينۆەستيتسيالىق تابىس 18 بازالىق تارماقتى نەمەسە 0,11 ملرد دوللاردى قۇرادى. قاڭتار ايىندا ۇلتتىق قورعا تۇسكەن قاراجات 472 ملرد تەڭگە بولسا, ونىڭ ىشىندە 31 ملرد تەڭگە ۇلتتىق ۆاليۋتادا. ۇلتتىق قوردان رەسپۋبليكالىق بيۋدجەتكە بەرىلەتىن ترانسفەرتتەر كولەمى 600 ملرد تەڭگە», دەدى ۇب توراعاسىنىڭ ورىنباسارى.
