كەش باستالار ساتتە ءبىر مەزەت ۇنسىزدىك جاريالانىپ, كوپشىلىك اۋعان سوعىسىندا قازا تاپقان جاۋىنگەرلەردىڭ رۋحىنا تاعزىم ەتتى. ودان كەيىن ارداگەرلەر ءسوز الىپ, وقۋشىلارعا وتتى جىلداردان ەستەلىكتەر ايتتى.
«قازىر جۇرت اۋعان سوعىسى تۋرالى ءارتۇرلى اڭگىمە ايتادى. بىراق بۇل – كەزىندە كەڭەس وداعىنىڭ قۇرامىندا بولعان ەلدەردىڭ بارىنە ورتاق قانمەن جازىلعان تاريح. ودان ەندى ەشقاشان قاشىپ كەتە المايمىز. ول سوعىستا قانشاما قىلشىلداپ تۇرعان جىگىتتەر قازا تاپتى. سىزدەر ول زاماننىڭ قالپى قانداي, ادامى قانداي بولعانىن بىلمەيسىزدەر. سوندىقتان جاڭا ۋاقىتتىڭ مىنبەرىندە تۇرىپ ولار نە ءۇشىن قازا تاپتى, كىم ءۇشىن, نە ءۇشىن سوعىستى, سونى تۇسىنبەيمىز دەپ ايتا سالۋ وڭاي. ولار وتان اماناتىنا ادال ازاماتتار بولدى. وسىنى ۇمىتپاۋىمىز كەرەك. ەڭ باستىسى, زامانىمىز بەيبىت بولسىن. وق اتىلماسىن, بومبا جارىلماسىن! ءسابي جەتىم, انا جەسىر قالماسىن! ول ءۇشىن سىزدەر جاقسى وقىپ, مىقتى ازامات بولىپ شىعۋلارىڭىز كەرەك», دەدى اۋعان سوعىسىنىڭ ارداگەرى ەربول قالي ۇلى.
كەش قوناقتارى مەكتەپ وقۋشىلارى ازىرلەگەن كونتسەرتتىك باعدارلامانى, العاشقى اسكەري دايىندىق ءپانىنىڭ مۇعالىمى نۇرتاي ايتجانوۆ باسقاراتىن «جاس سارباز» ۇيىرمەسىنە قاتىسىپ جۇرگەن بالالاردىڭ ونەرىن تاماشالادى. جاس ساربازدار ساپقا تۇرىپ, ءتۇرلى سوعىس تاسىلدەرىن كورسەتىپ, وقۋ اۆتوماتىن جىلدام بولشەكتەپ, قايتىپ جيناۋدان جارىستى.
كەش بارىسىندا «وتتى جىلداردىڭ ساباعى» اتتى كىتاپ كورمەسى اشىلىپ, اۋعان سوعىسى تۋرالى قىسقا بەينەروليكتەر كورسەتىلدى.
«اۋعان سوعىسىندا جانە باسقا دا قاقتىعىستاردا قۇربان بولعان ارداگەرلەر قۇرمەت پەن قوشەمەتكە لايىق. مۇنى جاستار بىلۋگە ءتيىس. ولاردىڭ ەرلىكتەرىن ۇلگى ەتۋ ماڭىزدى», دەيدى مەكتەپ ديرەكتورى راعات قابىلان.
قوستاناي وبلىسى,
ايسارى اۋىلى
