وبلىستىق پوليتسيا دەپارتامەنتىنىڭ قىزمەتكەرلەرى جامبىل, تۇركىستان وبلىستارىنىڭ جانە الماتى مەن شىمكەنت قالالارىنىڭ تۇرعىندارىنان تۇراتىن قىلمىستىق توپتىڭ زاڭسىز ارەكەتىن اشكەرەلەپ, ولاردىڭ «جۇمىسىنا» توسقاۋىل قويدى. دەپارتامەنتتىڭ ءباسپاسوز قىزمەتى تاراتقان حابارلامادا قىلمىستىق توپتىڭ قۇرامىندا بىرنەشە ادامنىڭ بولعانى, ولاردىڭ بۇل ءىستى بىرلەسە اتقارعانى ايتىلعان.
پوليتسيا دەپارتامەنتىنىڭ حابارلاۋىنشا, قىلمىستىق توپ مۇشەلەرى كولىك تىزگىندەگىسى كەلگەندەردىڭ وقۋعا ءتيىس ساباقتارىن جانە كولىك باسقارۋ مۇمكىندىگىن تاجىريبە جۇزىندە قاداعالاپ تەكسەرمەگەن. قارجىلاي سىياقى ءۇشىن جۇرگىزۋشى كۋالىگىن شۇلەن تاراتقانداي زاڭسىز ۇلەستىرۋمەن ۇزاق ۋاقىت بويى اينالىسىپ كەلگەن. «مىڭ اسقانعا – ءبىر توسقان». كۋالىك «ساۋداسىنىڭ» كوركىن قىزدىرعانداردىڭ كەيبىرى جۇمىس ورنىندا جايباراقات وتىرعان جەرىنەن ۇستالدى.
دەرەككە سەنسەك, قىلمىستىق توپتىڭ قۇرامىندا حقكو قىزمەتكەرلەرىنەن بولەك, جوعارىدا ايتىلعان وڭىرلەردەن جۇرگىزۋشى كۋالىگىن الۋعا نيەت بىلدىرگەن تۇتىنۋشىلاردى ىزدەستىرگەن ارنايى «كومەكشىلەر» دە بار. ەڭ سوراقىسى, قۇجاتتار تاراز قالاسىندا ورنالاسقان حالىققا قىزمەت كورسەتۋ ورتالىعىندا راسىمدەلىپ, يەلەرىنە تاراتىلىپ وتىرعان.
قۇزىرلى ورگان قىزمەتكەرلەرىنىڭ جەدەل ىسكە كىرىسۋىنىڭ ارقاسىندا كۇدىكتىلەر دەر كەزىندە ۇستالدى. قازىرگى كەزدە زاڭ تالابىنا سايكەس تەرگەۋ جۇمىستارى جۇرگىزىلىپ جاتىر. قولعا تۇسكەن كۇدىكتىلەردىڭ قاتارىندا حالىققا قىزمەت كورسەتۋ ورتالىعىنىڭ باسشىلارى سەكىلدى لاۋازىمدى تۇلعالار دا بار.
«تىركەلگەن قىلمىستىق ءىس بويىنشا تەرگەۋ ارەكەتتەرى جۇرگىزىلىپ جاتقانىن ايتا كەتكەن ءجون. قازىرگى ۋاقىتتا جۇرگىزۋشى كۋالىگىن زاڭسىز بەرۋدىڭ 35 دەرەگى انىقتالدى. قىلمىستىق جۇيەنى ۇيىمداستىرۋشىلار مەن ورىنداۋشىلار ۋاقىتشا ۇستاۋ يزولياتورىنا قاماۋعا الىندى», دەيدى وبلىستىق پوليتسيا دەپارتامەنتى باسشىسىنىڭ ورىنباسارى الماز الماتوۆ.
جامبىل وبلىسى
