قابىرعانى قايىستىرار سول سوعىستى 22 296 وتانداسىمىز باسىنان وتكىزسە, ونىڭ 927-ءسى قازا تاۋىپ, 19-ى حابارسىز كەتتى. مىڭداعان ادام مۇگەدەك بولىپ ورالدى. كۇنى كەشە استانادا «Tayelsiz Qazaqstannyn Halyq Batyrlary» قوعامدىق بىرلەستىگى ۇيىمداستىرعان ءباسپاسوز ءماسليحاتىندا بۇل تۋرالى مايدانداس دوستارىن ەسكە العان ارداگەرلەردىڭ وزدەرى ايتىپ بەردى. ولاردىڭ ايتۋىنشا, وتانداستارىمىزدىڭ بەسەۋى كەڭەس وداعىنىڭ باتىرى اتاعىن, بىرەۋى حالىق قاھارمانى اتاعىن السا, ەكەۋى «ايبىن» وردەنىنىڭ يەگەرى بولدى. جۇزدەگەن اسكەري قىزمەتكەر بۇرىنعى كسرو جانە قازاقستان رەسپۋبليكاسىنىڭ وردەندەرى جانە مەدالدارىمەن ماراپاتتالعان.
بىرلەستىك باسشىسى باقىتجان ەرتاەۆ: «اۋعان سوعىسى تاريحقا اينالدى. بىراق سوندا دا ولىلەر مەن تىرىلەردىڭ ءۇنى ءبارىمىزدى ءالى كۇنگە الاڭداتادى. جاقىندارىنان ايىرىلعاندار ءۇشىن, جاستىق شاعىن سوعىس پەن ىستىق اۋعان كۇنىندە كۇيدىرگەندەر ءۇشىن جوعالتۋ ازابى, ءتىرىنىڭ اۋىرسىنۋى ولاردىڭ ءومىرىنىڭ سوڭىنا دەيىن سوزىلادى», دەدى.
وتانىنا ورالعان ينتەرناتسيوناليست-جاۋىنگەرلەر شەنەۋنىكتەردىڭ تۇسىنىسپەۋشىلىگى مەن قوعامنىڭ نەمقۇرايدىلىعىنا تاپ بولعان. سوندىقتان 80-جىلدارى اۋعانستاننان ورالعان جاستاردى قولداۋ ماقساتىندا ارداگەرلەر وداقتارى قۇرىلا باستادى. سوعىس وتىنان ورالعان جىگىتتەر كاسىپوداقتاردان ءوز ورنىن تاپتى, ولارعا جان-جاقتى قولداۋ كورسەتىلدى. بۇگىندە جاس ۇرپاقتى ءوز جەرىنە, حالقىنا پاتريوتتىق رۋحتا تاربيەلەۋ – ارداگەرلەر قوزعالىسىنىڭ باستى باعىتتارىنىڭ ءبىرى. جىل سايىن 15 اقپان مەن 7 مامىردا بارلىق وقۋ ورنىندا اۋعان سوعىسى ارداگەرلەرىنىڭ قاتىسۋىمەن ەرلىك ساباقتارى, شىعارماشىلىق جانە سپورتتىق ءىس-شارالار وتكىزۋ داستۇرگە اينالعان. سونداي-اق اۋعانستان ارداگەرلەرى وداعى جانىنان ەرىكتىلەر قاناتى قۇرىلعان. پاندەميا كەزىندە اۋعان سوعىسىنىڭ ارداگەرلەرى مەن مۇگەدەكتەرىنە, سونداي-اق قيىن ومىرلىك جاعدايعا تاپ بولعان ادامدارعا 7 مىڭنان استام گۋمانيتارلىق كومەك تاراتىلدى. بۇل جۇمىس بۇگىنگى كۇنگە دەيىن جالعاسىن تاۋىپ كەلە جاتىر. سوعىس ارداگەرلەرى قاڭتار وقيعاسىندا دا شەت قالماي, الماتىدا ەلىمىزدىڭ كونستيتۋتسيالىق قۇرىلىسى مەن قۇقىقتىق ءتارتىبىن ساقتاۋعا كومەكتەسەتىن شتاب قۇردى. 7 قالالىق اۋرۋحانا, جەدەل جاردەم ستانساسى, بىرقاتار الەۋمەتتىك نىسان قورعاۋعا الىندى. 28 گۆاردياشى-پانفيلوۆشىلار اتىنداعى ساياباقتا پاترۋلدىك قىزمەت ۇيىمداستىرىلىپ, كومەككە مۇقتاج كەز كەلگەن ادام حابارلاسا الاتىن سەنىم تەلەفونى قۇرىلدى.
بىرلەستىك باسشىسى باقىتجان ەرتاەۆتىڭ ايتۋىنشا, ەلىمىز ەگەمەندىك العان كۇننەن باستاپ بۇگىنگى كۇنگە دەيىن 34 ادام حالىق قاھارمانى اتاعىن السا, 48-ءى «ەڭبەك ەرى» اتانعان. «ولاردىڭ ىشىندە بۇگىنگى كۇنگە حالىق قاھارمانى اتاعىن العان 11 جانە «ەڭبەك ەرى» اتاعىن العان 37 ادام ارامىزدا. ەندىگى جەردە ءبىزدىڭ ۇيىمنىڭ ماقساتى مەن مىندەتى – كونە داستۇرلەردى جاڭعىرتىپ, ءار ۇلتتىڭ مادەنيەتىنىڭ وزىندىك ەرەكشەلىگىن ءتۇسىنۋ. مەملەكەت جاس ۇرپاقتى تولەرانتتىلىققا, ءوزارا سىيلاستىققا تاربيەلەۋگە ىنتالى. ال كەز كەلگەن مەملەكەتتىڭ باسىم مىندەتى – پاتريوتتىق تاربيە بەرۋ. قوعامدىق بىرلەستىكتىڭ نەگىزگى ماقساتى – حالىق قاھارماندارىن, «ەڭبەك ەرلەرىن» ناسيحاتتاي وتىرىپ, ۇلتتىق جادىنى ساقتاۋ نەگىزىندە جالپىۇلتتىق تاريحي مادەنيەتتى قالىپتاستىرۋ ءۇشىن قوعام مەن مەملەكەتتىڭ كۇش-جىگەرىن بىرىكتىرۋ», دەيدى بىرلەستىك باسشىسى.
كەۋدەسىن وققا توسقان ەرلەردىڭ كوزسىز ەرلىگى تۋرالى ۇمىتۋعا حاقىمىز جوق. ء«وز باتىرلارىن قۇرمەتتەيتىن جانە ماقتان تۇتاتىن حالىق – ۇلى حالىق» دەمەكشى, جاقىندارىنان ايىرىلعاندار ءۇشىن, جاستىق شاعى وت پەن وقتىڭ ورتاسىندا وتكەندەر ءۇشىن اۋعان سوعىسى – جازىلمايتىن جارا. سەبەبى سوعىس ءورتى سونگەنىمەن, جاقىنىن جوعالتقانداردىڭ جان-جاراسى, قايعى-مۇڭى باسىلمايدى.
جاس ۇرپاقتىڭ ەندىگى مىندەتى – ەلدىكتى تۋ ەتكەن ەرلەردى ەسكە الىپ, ارداگەرلەرگە قۇرمەت كورسەتۋ.
