سۋرەتتەردى تۇسىرگەن – اقادىل رىسماحان
جاڭا نىساننىڭ اشىلۋ سالتاناتىنا ءوڭىر باسشىسى ەربول قاراشوكەەۆ باستاعان ازاماتتار ارنايى قاتىسىپ, قۇمشاعال تۇرعىن الابى حالقىنىڭ قۋانىشىنا ورتاقتاسىپ, ىزگى تىلەگىن ارنادى.
«جەرگىلىكتى حالىقتى بۇقارالىق سپورتقا تارتۋدىڭ ماڭىزى زور ەكەنى انىق. مەملەكەت باسشىسى دا بۇل ماسەلەگە ايرىقشا دەن قويىپ وتىرعانى بەلگىلى. سوندىقتان دا وڭىردە وسى باعىت بويىنشا اۋقىمدى جۇمىستار اتقارىلىپ جاتىر. قۇمشاعالدا اشىلعان دەنەشىنىقتىرۋ-ساۋىقتىرۋ كەشەنى – سول جۇمىسىمىزدىڭ ايقىن ءبىر دالەلى. كەشەنگە اعىلىپ كەلەتىن جەرگىلىكتى جاستار اراسىنان وليمپيادا ويىندارى مەن الەم چەمپيوناتىنىڭ, قۇرلىقتىق دودالاردىڭ جەڭىمپازدارى شىعاتىنىنا سەنەمىن. قۇمشاعال تۇرعىندارىن جاڭا نىساننىڭ اشىلۋىمەن شىن جۇرەكتەن قۇتتىقتايمىن», دەدى ە.قاراشوكەەۆ دەنەشىنىقتىرۋ-ساۋىقتىرۋ كەشەنىنىڭ اشىلۋ سالتاناتىندا سويلەگەن سوزىندە.
ءىس-شاراعا ارنايى قاتىسقان ەڭبەك ارداگەرى راحمانبەك ۇستاەۆ قۇمشاعالدىقتار اتىنان ءسوز سويلەپ, جاڭا كەشەننىڭ اشىلۋ سالتاناتىنا ارنايى قاتىسقان ءوڭىر باسشىسى ە.قاراشوكەەۆكە ريزاشىلىعىن جەتكىزىپ, العىس ايتتى.
كەيىنگى جىلدارى ءوڭىردىڭ سپورت سالاسىن وركەندەتۋ ماقساتىندا قازىنادان قوماقتى قاراجات قاراستىرىلىپ جاتىر. دەرەككە جۇگىنسەك, وتكەن جىلى 14,2 ملرد تەڭگە ءبولىنىپتى. جەرگىلىكتى بيلىكتىڭ قولداۋىن سەزىنگەن جامبىلدىق سپورتشىلار ءوز كەزەگىندە اۋىز تولتىرىپ ايتارلىقتاي تابىستارعا قول جەتكىزىپ, جانكۇيەرلەردى قۋانتىپ جاتىر. ماسەلەن, تاياۋدا عانا ەلوردا تورىندە وتكەن ەل چەمپيوناتىندا ەركىن كۇرەس شەبەرلەرى كوڭىل كونشىتەرلىكتەي ناتيجە كورسەتىپ, جالپىكوماندالىق ەسەپتى توپ جارعان ەدى.
استانا قالاسىندا ۇيىمداستىرىلعان ەل چەمپيوناتىندا 97 كگ سالماق دارەجەسىندە توپقا تۇسكەن الىشەر ەرعالي فينالدا الەم چەمپيونى ريزابەك ايتمۇحاندى جەڭىپ چەمپيون اتانسا, 70 كگ سالماق دارەجەسىندە بەلدەسكەن مەيىرجان ءاشىروۆ تە جەڭىستىڭ بيىك تۇعىرىنان كورىندى. تاعى ءۇش بالۋان كۇمىس جۇلدەگە قول جەتكىزسە, ءبىر سپورتشى قولا مەدال يەگەرى اتاندى.
«قۇمشاعال تۇرعىن الابىندا بوي كوتەرگەن دەنەشىنىقتىرۋ-ساۋىقتىرۋ كەشەنى – تۇرعىندار كوپتەن كۇتكەن قۋانىش. بۇل كەشەندە جەرگىلىكتى ازاماتتارمەن بىرگە بالالار مەن جاسوسپىرىمدەر دە سپورتپەن شۇعىلدانىپ, سالاماتتى ءومىر سالتىن ۇستاناتىنى انىق. ءبىر سوزبەن ايتقاندا, جاڭا كەشەن قۇمشاعالدىقتاردىڭ كاسىبي سپورتپەن دە, بۇقارالىق سپورتپەن دە اينالىسۋىنا زور مۇمكىندىك تۋدىرىپ وتىر», دەيدى وليمپيادا ويىندارىنىڭ ەكى دۇركىن جۇلدەگەرى, داڭقتى دزيۋدوشى ەلدوس سمەتوۆتىڭ العاشقى باپكەرى احمەت جۇماعۇل.
ەكى قاباتتى جاڭا سپورت نىسانىندا بالالار مەن جاسوسپىرىمدەر دەنەشىنىقتىرۋ كلۋبى قۇرىلعانىن ايتا كەتكەن ءجون. مۇندا 7-17 جاس ارالىعىنداعى جەرگىلىكتى جاسوسپىرىمدەر سپورتتىڭ سەگىز تۇرىمەن شۇعىلدانا الادى.
دەرەككە سەنسەك, بىلتىر ءوڭىر بويىنشا 9 سپورت كەشەنى اشىلعان. ال وسى جىلدىڭ سوڭىنا دەيىن 13 نىساننىڭ قۇرىلىسى تولىقتاي اياقتالىپ, تۇرعىنداردىڭ يگىلىگى ءۇشىن پايدالانۋعا بەرىلەدى دەپ جوسپارلانىپ وتىر. قازىرگى كەزدە 492 مىڭنان اسا جامبىلدىق نەمەسە ءوڭىر حالقىنىڭ 40,3 پايىزى بۇقارالىق سپورتقا تارتىلعان.
قالاي دەسەك تە, ءوڭىر سپورتىن دامىتۋ ماقساتىندا كەيىنگى جىلدارى ايتارلىقتاي جۇمىستار اتقارىلىپ جاتقانى انىق. بيلىك قولداۋىن سەزىنگەن جامبىلدىق سپورتشىلار جاقسى ناتيجەلەرمەن قۋانتادى دەگەن سەنىم زور.
جامبىل وبلىسى
